Казбек Коков видеоконференция амал бла РФ-ни Президентини СКФО-да толу эркинликли келечисинде Советни жыйылыууна къатышханды. Анда сёз гитче эмда орта предпринимательликге себеплик этиуню, жаш политиканы баш магъаналы ишлерин тамамлауну, Шимал Кавказда казачествону айнытыуну юсюнден баргъанды.
Жыйылыуну башлай, Юрий Чайка гитче эм орта предпринимательликни шёндюгю заманда магъанасы уллу болгъанын, ол ишсизликни азайтыугъа, конкуренция къураугъа, экспорт онгланы кючлендирирге, ич эм тыш рынокланы товарла бла жалчытыргъа себеплик этгенин айырып айтханды.
-Бир реестрге кёре, бюгюнлюкде Шимал-Кавказ федерал округда аллай предприятияладан 195 мингден асламы эсепге алыныпды. Статистика шартла тинтилгенден сора гитче эм орта предпринимательликни эсепге алыннган объектлени саны бла СКФО-да федерал округланы барысындан да артха къалгъаны ачыкъланнганды. Ол а регионланы экономикаларына хаталыды. Бюгюнлюкде жер-жерледе предпринимательле эсепге тюшерча мадарла этмей жарарыкъ тюйюлдю,- деп чертгенди Юрий Чайка.
Къабарты-Малкъарда, Бир реестрни шартларына кёре, жылны башында предпринимательлик бла кюрешгенледен 17860 субъект эсепге алыннганды. Алагъа ахча бла болушлукъ этиу бла КъМР-ни Гарантия фонду, Гитче кредитле берген фонд да кюрешедиле. Быйыл биринчиси 237,3 миллион сомгъа 109 поручительство этгенди. Аны себеплиги бла 1,2 миллиард сомгъа кредитле алыннгандыла. Россейни экономиканы айнытыу министерствосу Гарантия фондну быйылгъы ишин бу къыйын кезиуде бек къыйматлыгъа санагъанды.
Гитче кредитле берген фонд быйыл гитче эм орта предпринимательлеге 348,7 миллион сомгъа микрозаймла бергенди – битеу да 177.
Жаш тёлю политиканы жашауда бардырыуну юсюнден сёз баргъанда, Юрий Чайка Владимир Путинни айтханларын юлгюге келтиргенди. Президент жаш адамла бла ишлеуню мураты – алагъа хунерлерин къыралларына бла халкъларына, кеслери башларына да жаратырча этиудю деп, кёп кере къатлагъанды. Шимал-Кавказ федерал округда жаш тёлюню «Машук-2021» форуна хазырланыу башланнганды.
СКФО-да кадрла жыйышдырыу жаны бла иш да андан ары бардырылады. «Кавказны келир заманы» деген билим бериу проектни биринчи кесегине 420 адам къатышханды. Битеу регионлада да жаш лидерлени клублары ачылгъандыла.
Казачествону айнытыуну амаллары сюзюлгенде, полпред ол жаны бла уллу иш бардырыргъа тюшеригин чертгенди. Аны баш борчларын да белгилегенди – россейли казачествону къырал управлениягъа бла къырал службагъа къошуу, къазакъланы жаш тёлюсюн аскер-патриот ниетледе, адеп-къылыкъгъа юйретиу, жаш тёлю организацияланы Россей Федерацияны къырал жаш тёлю политикасыны ишлерине къатышдырыу.
Ахырында Юрий Чайка коронавирусдан дарман салыу бла байламлы шартланы туура этгенди. Вакцинация этдиргенлени саны Россейде анга тийишли болгъанланы 16,5 процентин тутады. Округну субъектлерин алгъанда уа, ол кёрюмдюледе башхалыкъ уллуду – Ставрополь крайда - 14,5, Дагъыстанда уа -4,7. «Жамауатда ангылатыу ишни кючлендирмей жарарыкъ тюйюлдю. Басманы, социал сетьлени, тыш рекламаны болушлукълары бла адамлагъа ата журтлу вакцинаны къоркъуусузлугъуну, хайырлылыгъыны юсюнден дайым айтып турургъа керекди»,-деп буюргъанды полпред.