Накъыгъэм хэт махуэшхуэхэр гъэлъэпIэным епха Iуэху дахэ куэд мы зэманым щокIуэкI ди къэралым и щIыпIэ псоми. Абыхэм ящыщщ «Фэеплъ хадэ» къэралпсо акцэр. ТекIуэныгъэм и махуэм хуэгъэпса а Iуэху дахэм жыджэру хэтщ ди республикэм и цIыхухэри.
Комсомолым и ветеранхэм я Аруан щIыналъэ зэгухьэныгъэм и Президиумым къищта унафэм тету, мы махуэхэм щIыпIэм щекIуэкIащ щэбэт щIыхьэху. «Фэеплъ хадэ» акцэм къриубыдэ лэжьыгъэ щхьэпэ щызэфIахащ Нарткъалэ щыIэ Комсомол паркым. АбыкIэ хъыбар къыдигъэщIащ зи цIэ къитIуа жылагъуэ зэгухьэныгъэм и пресс-IэнатIэм и унафэщI Мер Людмилэ. Абы зэрыжиIамкIэ, Комсомолым и ветеранхэм я щIыналъэ советым и тхьэмадэ Умэ Станислав щIыхьэхум щекIуэкIыну лэжьыгъэ псори къызыхуэтыншэу къызэригъэпэщащ. Къапщтэмэ, паркым щыхасэну жыгхэмкIэ ар нэхъ пасэу ягурыIуащ КъБР-м ЩIыуэпсымрэ экологиемкIэ и министерствэм и унафэщIхэм икIи абы тету Нарткъалэ къашащ мышхумпIей плъыжь, пкIей, блашэ жыгыщIэу 100, жыгыщIэ цIыкIухэм кIэщIасэну ягъэхьэзыра бжэгъухэр. КъинэмыщIауэ, лэжьыгъэм кърашэлIащ къэкIыгъэхэр зрасэну кумбхэр къэзытIыну техникэри.
А псори зэрагъэуIуу Iуэхур къызыхуэтыншэу зэфIахыну пщэдджыжьым къызэхуэсат цIыху куэд. Абыхэм яхэтт щIыналъэм щызэхэта комсомол зэгухьэныгъэм и ветеранхэу, IуэхущIапIэхэм щыIа комсомол ячейкэхэм я пашэу щытахэу Шыбзыхъуэ Жаннэ («Телеавтоматика»), Мер Люся (СПТУ №1), Бэрэздж Ахьмэд («Къэхъун» совхоз), комсомол зэгухьэныгъэм и пашэу щыта Умэ Станислав, сыт хуэдэ Iуэхуми жыджэрагъышхуэ зыхэлъу ноби хэт Мер Людмилэ сымэ я гъусэу. Зэрылэжьэну белхэмрэ пэгунхэмрэ яIыгъыу щIыхьэхум гукъыдэж хуаIэу къекIуэлIащ Къэхъун дэт курыт школ №1-м и еджакIуэхэри.
Зэдэууэ, зэгурыIуэрэ зэдэIуэжу, жыг хэсыным ехьэлIа хабзэри зыщамыгъэгъупщэу лэжьащ гуп дахэр. Абыхэм япэщIыкIэ къагъэкъэбзащ паркыщIэ щагъэтIысыну щIыпIэр. КъыкIэлъыкIуэу, кумбхэр къатIа нэужь, абыхэм жыгыщIэхэр хасащ, бжэгъухэри кIэщIасэжащ, къэкIыгъэ цIыкIу къэс псы пэгун тIурытIи щIа- кIэжащ.
Лэжьыгъэр тэмэму зэрызэфIэкIамкIэ арэзыуэ, щIыхьэхум хэтахэм псалъэ гуапэкIэ захуигъэзащ Умэ Станислав.
-ТекIуэныгъэм и махуэшхуэр гъэлъэпIэным ехьэлIа псапащIэ лэжьыгъэхэм ди Iыхьэ зэрыхэтлъхьам гукъыдэж къызитащ. Си гугъэщ щIыхьэхум хэта дэтхэнэми и гум апхуэдэ гурыщIэхэр щыхьэщIэу, - жиIащ Умэм. - Нарткъалэ и Комсомол паркыр къэгъэщIэрэщIэжыным хуэтча япэ лъэбакъуэщ нобэрей Iуэхур. ЛIэщIыгъуэ блэкIам и 50 гъэхэм зи лъабжьэр ягъэтIылъауэ щыта а хадэм кIэлъыплъыныр ди зэгухьэныгъэм къызэрищтэри къыхэзгъэщыну сыхуейт. Ирехъу паркыр цIыхухэм зыщагъэпсэху, спорт, щэнхабзэ Iуэхухэр щызэфIах щIыналъэ щхъуантIэ.
НэхъыжьыфIым фIыщIэ ин хуищIащ щIыхьэхур къыдэзыIыгъахэу Аруан щIыналъэ администрацэм и Iэтащхьэ Ажий Валерэ, КъБР-м щIыуэпсымрэ экологиемкIэ и министр Шаваев Ильяс, абы и къуэдзэ Хьэсанэ Аслъэн, «Аруангаз» IуэхущIапIэм и унафэщI Амирахмедов Замир, Къэхъун дэт курыт школ №1-м и унафэщI Понэж ФатIимэ, мафIэсым пэщIэтынымкIэ щIыпIэ къудамэм и пашэ Бахъуэ Рустам сымэ. Апхуэдэу абы щытхъу псалъэхэр яжриIащ школакIуэ ныбжьыщIэхэу Гулэжын Арсен, Кыржын Ратмир, Ирыгу Къантемыр, Хьэмгъуокъу Темыр, Тэхъу Беслъэн, Тхьэщыгъуей Лаурэ, Абазэ Заринэ, Созей Самирэ сымэ, ахэр жыджэру, я къару емыблэжу щIыхьэхум зэрыхэтам папщIэ.