КъМР-ни Башчысы Казбек Коков Север флотну келечилери бла бирге А.Г.Головкону атын жюрютген скверде терекчикле орнатыугъа эмда адмиралны  эсгертмесине гюлле салыугъа къатышханды.
Республиканы оноучусу бу кюнледе Россейни регбиден чемпионатыны ахыр эришиулерине къатышыр ючюн Нальчикге келип тургъан тенгизчилени жюрегинден къызыу алгъышлагъанды. Айтхылыкъ аскер башчы Арсений Григорьевич Головкону эсде тутханлары, флотну махтаулу аскер тёрелерин сакълагъанлары ючюн жюрек ыразылыгъын билдиргенди эмда спортда бийик жетишимле тежегенди.
Север флотну таматасыны болушлукъчусу полковник Павел Кошкарев а Казбек Коковха Север флотну командующисини, Россейни Жигити адмирал Александр Моисеевни ыспас сёзю жазылгъан къагъытны бергенди. «Ушаковну ордени бла саугъаланнган Къызыл байракълы Север флотну Аскер советини, тенгизчилени барысыны да атларындан эм кесим энчи да Сизге арада байламлыкъланы ким да юлгю алырча жюрютюрге себеплик этгенигиз ючюн уллу ыспас этеме. «Элбрус» тенгиз кемени тенгизчилери республиканы уруннганлары бла шуёхлукъну бек багъалайдыла. Къабарты-Малкъар Республикадан чакъырылгъан жашла Север флотну кемелеринде бла аскер бёлюмлеринде бет жарыкълы къуллукъ этедиле, тамата тёлюню махтаулу тёрелерин андан ары бардырадыла»,-деп жазылыпды анда.
Гюлле салыугъа дагъыда Нальчик шахар округну жер-жерли администрациясыны башчысы Таймураз Ахохов, Россейни Регбиден федерациясыны спортну бу тюрлюсюн Сауутланнган Кючледе бла РФ-ни кюч структураларында айнытыу жаны бла комитетини директору Богдан Дубин, республиканы жамауат къуллукъчусу Байсыланы Темиржан къатышхандыла.