Шэджэм районым щыIэ ОМВД-м и унафэщIхэр я хьэщIащ къэрал кIуэцI IуэхухэмкIэ органхэм я ветеранхэм.
Урысей Федерацэм Къэрал кIуэцI IуэхухэмкIэ и органхэмрэ къэрал кIуэцI дзэхэмрэ я ветеранхэм я махуэр ягъэлъэпIащ мэлыжьыхьым и 17-м. Урысей МВД-м Шэджэм районым щиIэ и къудамэм и унафэщI, полицэм и полковник Бетрожь Мурат, къудамэм и Жылагъуэ советым и тхьэмадэ КIуэкIуэ Аскэрбийрэ ветеран организацэм и унафэщI Уэрыш Владимиррэ щIыгъуу щыIащ къэрал кIуэцI IуэхухэмкIэ органхэм щылэжьахэм я деж.
Полицэм и лэжьакIуэхэр щыIащ унагъуитхум: милицэм и подполковник Нэзрэн Мухьэмэд, къэрал кIуэцI къулыкъум и подполковник Балъкъыз Мухьэмэдин, милицэм и майор Нэгъуей Аскэрбий, милицэм и капитан Газаев Iэбубэчыр, юстицэм и подполковник Куэпэшэр МуIэед сымэ я деж.
-ФIыщIэ фхудощI фи къулыкъур хьэлэлу зэрефхьэкIам, къыхэфха IэщIагъэм фызэрыхуэпэжым папщIэ, зывгъэпсэхуну фытIысыжами, щIэгъэкъуэнышхуэ фыкъытхуохъу ди лэжьыгъэр къызэгъэпэщынымкIэ, щIэблэщIэр гъэсэнымкIэ,-жиIащ Бетрожь Мурат.
ХьэщIэхэм ветеранхэм иратащ саугъэтхэр, икIи узыншагъэ быдэ гъащIэ кIыхь, зэIузэпэщыгъэ яIэну ехъуэхъуащ.
Пенсионерхэми къахуеблэгъахэм папщIэ фIыщIэ хуащIащ, я къулыкъу мытыншым ехъулIэныгъэ щызыIэрагъэхьэмэ зэрагуапэри жаIащ.