КъМР-ни Башчысы Казбек Коков бу кюнледе бардыргъан кезиулю жыйылыуда республиканы Правительствосуну 2021 жылны биринчи кварталында ишини эсеплери сюзюлгендиле. Кенгешде дагъыда сёз халкъны къырал эмда муниципал жумушла бла жалчытыуну юсюнден баргъанды. Анда КъМР-ни Правительствосуну таматасы Мусукланы Алий, аны биринчи орунбасары Муаед Кунижев, орунбасары Марат Хубиев, экономиканы айнытыу министри Рахайланы Борис, саулукъ сакълау министри Рустам Калибатов, жарыкъландырыу, илму эмда жаш тёлюню ишлери жаны бла министр Анзор Езаов, урунуу эмда социал къоруулау министри Асанланы Алим докладла этгендиле.
Мусукланы Алий билдиргеннге кёре, быйылны биринчи кварталында эл мюлк продукцияны ёлчеми былтырны ол кезиуюндеча къалгъанды. Къурулушда, розница сатыу-алыуда уа ёсюм барды. Быйыл тёрт уллу инвестиция проект андан ары бардырыллыкъдыла, дагъыда жетиси къолгъа алынырыкъдыла. Тышына аш-азыкъ эмда эл мюлк товарладан 4,3 миллион доллар багъасы сатылгъанды, ол а былтырны бу кезиуюнден эсе 13,9 процентге асламды.
Кенгешде айтылгъаныча, быйыл 26 къырал проектни (43 миллиард сомгъа) толтурургъа белгиленеди. Аланы асламысы социал жумушла бла байламлыдыла.
Казбек Коков Правительствогъа проектлеге чырмау этген проблемаланы тинтирге эмда аладан къутулууну амалларын этерге буюргъанды. Ол санда ёксюз сабийлени жашау журтла бла жалчытыр ючюн инвесторла социал магъаналы юйле ишлерге кёлленирча мадар этерге кереклисин айтханды.
Республиканы Башчысы саулукъ сакълауда, билим бериуде бла социал бёлюмде къырал эмда муниципал жумушланы тамамлауну игилендирирге кереклисине да эс бургъанды. Рахайланы Борис айтханнга кёре, жумушланы электрон амал бла тамамлау жаны бла Къабарты-Малкъар былтыр регионланы тизмесинде иги да кётюрюлгенди. СКФО-да уа барысын да озгъанды.
Казбек Коков РФ-ни Президенти Къырал советни бла Стратегия башламчылыкъланы агентствосуну 15 апрельде ётген жыйылыуларында бу ишни тамыры бла тюрлендирирге: «къырал документле бла ишлейди» деген амалдан «къырал адам бла ишлейди» дегеннге кёчерге, бир-бир административ жорукълагъа бла оноулагъа кёре угъай, адамланы жашау болумларына кёре мадар этерге деп аллай борч салгъанын жыйылгъанланы эслерине салгъанды. Ол къырал эмда муниципал жумушланы тамамлауну игилендириу,документлени сурауну азайтыу, административ тыйгъычланы кетериу бла кюреширик ишчи къауум къураргъа буюргъанды.
Ахырында КъМР-ни Башчысы былай чертип айтханды: «Уллу иш бардырабыз, алай не гитче кемчиликни окъуна болдурмазгъа кюрешигиз. Ол битеу ишни жокъгъа санарча этеди. Минг километрле бла жолланы тапландырыргъа боллукъду, аны кёрмезге да болурла, алай бир уруну уа эслемей къоярыкъ тюйюлдюле. Бек иги больницада да иш тапсыз къуралса,адамла чамланмай къаллыкъ тюйюлдюле. Жамауат властьны ишине ыразы болурча тамамларгъа керекди боюнугъузгъа салыннган борчну».