КъБР-м и Парламентым ПромышленностымкIэ, транспортымкIэ, свя­зым­рэ гъуэгу IуэхухэмкIэ и комитетым и зэIущIэм щы­тепсэлъыхьащ къалэ уэ­рамхэр машинэ гъэувы­пIэхэмкIэ къызэ­ры­зэ­ра-гъэпэщ Iэмалхэм.

Комитетым и унафэщI Гугу Владимир жиIащ транспортыр здагъэувыпхъэ щIыпIэхэр зэрымащIэм къыхэкIыу Налшык къалэр илъэс куэд хъуауэ гугъуехь зэрыхэтыр. Иужьрей илъэсхэр къапщтэмэ, автотранспортым и бжыгъэм куэдкIэ хэхъуащ. Псалъэм папщIэ, республикэм машинэ мин 280-м нэблагъэ итщ. Абы щыгъуэми уэ­рамхэмрэ гъуэгухэмрэ зегъэубгъунымрэ машинэ гъэувыпIэхэм хухах щIы­пIэхэм я бжыгъэм хэгъэ­хъуэнымрэ ехьэлIауэ къалэхэм лэжьыгъэ тэмэму щрагъэкIуэкIыркъым.

- Транспортыр зэрызе­кIуэмрэ нэхъыбэрэ ахэр къыщыувыIэн хуей хъу щIыпIэхэмрэ гъэбелджы­лын, УФ-м адрей и щIы­налъэхэм машинэ гъэувыпIэхэр къызэрыщызэ­рагъэпэщ щIыкIэм зы­щы­гъэгъуэзэн хуейуэ къы-

­золъытэ, - къыхигъэщащ Гугу Владимир.

Налшык къалэм и щIыпIэ администрацэм ПсэупIэ-коммунальнэ IэнатIэмкIэ и управленэм и унафэщIым и къуэдзэ Къардэн Мурат зэрыжиIамкIэ, IуэхущIапIэхэм я нэхъыбэр ухуэныгъэ куэд щызэхэт щIыпIэхэм зэрыхуэзэм къыхэкIыу, муниципальнэ щIыр къагъэсэбэпу машинэ гъэувыпIэхэр къызэрагъэпэщыну Iэмал ягъуэтыркъым. ЩытыкIэр нэхъ гугъуж ещI фэтэр куэду зэхэт унэхэр зыухуэхэм пщIантIэ кIуэ­цIым автомобиль гъэувыпIэхэр щащIыну хабзэм хуит зэримыщIым.

Къэпсэлъам жиIащ унэ лъабжьэхэм машинэ гъэувыпIэхэр хэту яухуэныр зэрыфIэкъабылыр. Налшык къалэ округым машинэхэр щагъэув щIыпIэхэр къыщызэрагъэпэщ унэхэр зейхэм я мылъкукIи.

И Iуэху еплъыкIэр къигъэлъэгъуащ КъБР-м щыIэ МВД-м и УГИБДД-м и къуда­мэм и унафэщI, п­о­лицэм и подполковник ­Къардэн Анзор.

ЗэIущIэм хэтхэм къыхагъэщащ машинэ гъэувыпIэхэр зэрымащIэр ­гъуэгу шынагъуэншагъэм, уэ­рамхэр зыгъэкъабзэ, цIыху­хэр къезышэкI транс­портым, медицинэ, мафIэсыр гъэункIыфIынымкIэ машинэхэм зэран зэрахуэ­хъур.

Депутатхэм ягъэбелджы­лащ зытепсэлъыхьа Iуэху­хэр зи пщэрылъхэм ящIа­пхъэр.