Битеу жамауатны къууанч тыпырлы болдургъан хорламФутболдан чемпионатны 18-чи кюню Россейде спортну бу тюрлюсюн сюйгенлеге, анга артыкъ уллу эс бурмагъанлагъа да уллу къууанч келтиргенди. Къыралны жангы тарыхында биринчи кере болуп, РФ-ни жыйымдыкъ командасы эришиулени финалыны кесегине чыкъгъанды. Станислав Черчесов башчылыкъ этген футболчула байрым кюн Москвада «Лужники» стадионда бек кючлюлеге саналгъан испанлыла бла тюбешгенди.
Эришиулени аллында кёпле Россей хорларыгъына ышаннган эселе да, артыкъ бек ийнаннган а этмегендиле. 90 минутну ичинде бизни футболчула, битеу онгларын, къарыуларын да хайырланып, ариу оюн кёргюзтгендиле. Былайда матчны 11-чи минутунда биринчи топну кесибизни къабакълагъа Сергей Игнашевич ургъанын айтырчады. Биринчи таймны ахырында уа Артем Дзюба, пенальтини уруп, эсепни тенг этгенди. Оюнну экинчи жарымында, къошулгъан заманда да эки жаны да кючлерин салып не бек кюрешген эселе да, тенг эсепни тюрлендиралмагъандыла. Алай бла чемпионну аты ючюн андан ары ким эриширигин бла кийимлерин жыйып, юйлерине атланырыкъланы оюнну ахырында бардырылгъан пенальтиле айыргъандыла. Бизни спортчула барысы да топну къабакъ эшиклеге тюзюнлей кийиргендиле. Байрым кюнню жигитине уа бизни команданы вратари Игорь Акинфеевни санаргъа боллукъду. Ол испанлыла Яго Аспас бла Коке топну къабакъ эшиклени къайсы жанына атханларын ангылап, аланы умутларын юзгенди. Алай бла Россейни командасы чемпионну аты эм Кубок ючюн кюрешни андан ары бардырады. Финалны эндиги бёлюмюнде Станислав Черчесовну футболчулары 7 июльда Сочиде «Фишт» стадионда Хорватия бла тюбеширикдиле. Хорватлыла да Дания бла оюнну тенг эсеп бла бошап, финалгъа жолну пенальтилени уруп ачханларын эсгертирчады. Кертисин айтханда, бу эришиуледе кёп сейирлик ишле болгъандыла. Германияны дуния башында эм кючлю командасы бла бирге аргентиначы Лионель Месси бла португалиячы Криштиану Роналду да чемпионлукъ умутларын юзюп, юйлерине атланнгандыла. Ала уа шёндюгю ёмюрню бек иги футболчуларына саналадыла. Шабат кюн Аргентина Франциягъа хорлатханды, Португалия бла Уругвайны араларында оюнда да экинчиле кючлюрек болуп, чемпионатны кезиулю кесегине чыкъгъандыла. Финал эм Кубок ючюн кюреш андан ары барады. Материал басмагъа хазырланнган кезиуде уа Бразилияны бла Мексиканы араларында тюбешиу башланнган эди. Ингирде уа Бельгия бла Япония ким кючлю болгъанын сайлагъандыла.
Поделиться: ЧИТАТЬ ТАКЖЕ:
|