Кёп болмай Москвада эл мюлк кооперативлени VI Битеуроссей съезди ётгенди. Анга Къабарты-Малкъардан Правительствону Председателини биринчи орунбасары - эл мюлк министр Сергей Говоров, аны орунбасары Тимур Вадахов, Финансла, экономика эм АПК-гъа къырал болушлукъ бериу жаны бла управленияны таматасы Ирина Кулакова, эл мюлк кооперативлени эмда элли-фермер мюлклени ассоциацияларыны келечилери да къатышхандыла.
Жыйылыуну ача, Россей Федерацияны эл мюлк министри Дмитрий Патрушев элледе экономика эм социал бёлюмге да себеплик этген гитче эм орта бизнесни айныугъа эс бурургъа, алагъа онг берирге кереклисин билдиргенди. Министерство талай жылны ичинде эл мюлк кооперативлеге грантла бергенин, жыл сайын аны ёлчемине къошула баргъанын да айтханды. Алай бла быйыл ол ахча, 1,5 кереге ёсюп, 2,4 миллиард сомгъа жетгенди.
Министр регионлада толтуруучу власть органла бла бирге гитче эм орта агробизнесни бла кооперативлени болумлары тинтилгенлерин билдиргенди. Аны эсеплерине кёре къарыусуз субъектлеге, фермер мюлкле бла кооперативле къураугъа билеклик этилликди.
Форумда бара тургъан жылны ахырына дери «Фермерле себеплик этиу системаны къурау эмда элледе кооперацияны айнытыуну» 2024 жылгъа дери белгиленнген къырал проекти къабыл этиллигини юсюнден айтылгъанды. Анга деп 37,4 миллиард бёлюнюрюкдю. РФ-ни Эл мюлк министрини орунбасары Оксана Лут билдиргенича, жангы проект юч бёлюмден къураллыкъды. Биринчисини - «Агростартапны» чеклеринде сагъынылгъан мюлклени къураугъа эм айнытыугъа субсидияла берилликдиле. Эл мюлк хайырланыучу кооперативлени эмда методика бла информация-консультация болушлукъ бериу араланы айнытыугъа да аллай себеплик этилликди. Аны бла бирге финанс-мюлк жаны бла ишни игилендириуге да тийишли эс буруллукъду.
Дмитрий Патрушев РФ-ни Президенти Владимир Путинни буйругъу бла Эл мюлк министерство эл жерлени айнытыу жаны бла программа жарашдыргъанын айта, коллегаларын ол магъаналы проектге тири къатышыргъа чакъыргъанды. Элли-фермер мюлклени ассоциациясыны (АККОР) таматасы Владимир Плотников а жер-жерледе гитче фирмаланы продукцияларын сатыу-алыу сетьлеге чыгъарыргъа себеплик этерге кереклисин белгилегенди.