Жигитлигин бла антына кертичилигин юлгюге тутуп турлукъдула

Нальчикни 17-чи  номерли школунда РФ-ни МВД-сыны Черек районда бёлюмюню штабыны таматасы Гузиланы Тахирни хурметине эсгериу къанга ачылгъанды. Полицияны полковниги 2015 жылда 31 июльда аманлыкъчыланы къолларындан жоюлгъанды. Бандитле кече 3 сагъатда ол жашагъан юйге  от ачхандыла, офицер алгъан жараларындан алайда окъуна ёлген эди.
Гузиланы Билялны жашы Тахирни атын ёмюрлюк этиуге  аны биргесине окъугъан жашла бла къызла къыйын салгъандыла. «Адамны унутмасанг, ол ёмюрледе да сауду. Аны ючюн биз школгъа кирген жерде Тахирни атына эсгертме къанга салгъанбыз. Алай бла бери келген сабийле, ата-анала да  аны жигитлигине баш ургъанлай турлукъдула»,-дегенди Эльдар Афашагов.
Тахирни устазы Валентина  Дышекова  аны иш кёллюгюн, билимге тартыннганын белгилегенди. «Ол къалгъанлагъа не заманда да юлгю болгъанды. Дерсле болсунла, спорт эришиуле – хар неге да уллу кёл салгъанды, бир жумушха да ат башындан къарамагъанды. Ол право низамны сакълаудан башха жерде ишлеяллыкъ да болмаз эди – анга юйде атасы бла анасы тутхан ишине, берген сёзюне кертичи болургъа юйретгендиле»,-дейди ол.
Црайланы Альберт бла Тахир къоншулукъда жашагъандыла. Чабыууллукъну кечесинде ол нёгерине болушлукъгъа биринчи чапханды. «Мурдарла аны жукълап тургъанда  ёлтюргендиле. Къоркъакъла, малгъунла – алагъа башха сёзле тапхан да къыйынды. Жукълап болмаса, ол алагъа керекли жууап бераллыгъын бандитле бек иги ангылагъандыла»,-дейди ол. Бир ненча кюнден а энчи операцияны кезиуюнде полицияны полковнигине чабыуулукъ этген бандитле да жокъ этилген эдиле.
Тахир ич ишле органлада 22 жыл ишлегенди. Ол ахыр кюнюне дери борчуна кертичи болгъанды.  Ол право низамны сакълаучу органлада къуллукъ этерге сабийликден да сюйгенди, деген эди бизни бла ушакъда аны эгечи Марина. Аны юсюнден материал  «Заман» газетни 2015 жылда октябрь айда чыкъгъан номеринде басмаланыпды.
 Тахир  муратын толтургъанды, ол угъай, къуллугъунда уллу жетишимле да болдургъанды, полковник чыннга дери ёсгенди. Ол айырмалы офицерча РФ-ни къоруулауну федерал службасында Россейни  субъектлерини башчыларын сакълагъан бёлюмде къуллукъ этгенди, Къабарты-Малкъарны биринчи президенти Валерий Коковну къоркъуусузлугъун сакълагъанды.
Анга жаланда 30 жыл толгъанда уа, Ич ишле министерствону Черек районда бёлюмюне башчылыкъ этерге ышаннгандыла,  2003-2007 жыллада ол Элбрус районда полицияны бёлюмюне таматалыкъ этгенди.   Ызы бла КъМР-де МВД-ны штабыны баш инспекторуну орунбасарына салыннганды, жыл жарым да озгъунчу уа Нальчикде полицияны экинчи бёлюмюню башчысына тийишли кёрюлгенди.
2015 жылда июльгъа дери уа ол Черек районда ОМВД-ны штабыны таматасы болгъанды. Аны иш кёллюлюгюн, борчуна кертичилигин   министерствону оноучулары да кёрмей къоймагъандыла. Ол къуллукъ этиуде, право низамны сакълауда жетишимлери ючюн 12 кере белгиленнгенди.
Бюгюнлюкде уа Тахирни атасы Билялны бла анасы Нусаны баш ышаныулукълары,    насыплары да  Тахирни жашлары Муслим, Магомед, Ахмат бла байламлыдыла.
Тикаланы Фатима.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.