КъМР-ни Башчысыны къуллугъун болжаллы халда  толтургъан Казбек Коков орта кюн Правительствону юйюнде «Россейни лидерлери» деген битеуроссей конкурсха къатышханла эм аны ахыр бёлюмюне чыкъгъанла бла тюбешгенди. Анда  «Жангы бийиклик» деген республикалы конкурс къалай баргъаны сюзюлгенди. Жыйылыугъа КъМР-ни Башчысыны Администрациясыны таматасы Мухамед Кодзоков да къатышханды.
«Россейни лидерлери» деген конкурсда уа республикадан эки адам хорлагъандыла – Аслангери Кумыков бла  Гыллыланы Мурат. Ала эмда жыйылыугъа къатышханла Казбек Коковха бла Мухамед Кодзоковха «Жангы бийиклик» не мурат бла бардырылгъаныны, аны энчиликлерини юслеринден соруула берирге эркин эдиле. Алай ушакъны аллында  Казбек Валерьевич алагъа федерал эришиуледе республиканы атын иги бла айтдыргъанлары ючюн ыразылыгъын билдиргенди эмда ала къаллай чырмаулагъа тюбегенлерин соргъанды.
Аслангери Кумыков «Россейни лидерлери» анга къатышханлагъа уллу сынау бергенин, аны бла бирге уа кеслерини фахмуларын, онгларын ачыкъларгъа, жангы билим алыргъа  болушханын чертгенди. Гыллыланы Мурат а бу эришиуню хайырындан кёп сейир адамла бла танышханын билдиргенди. «Мен бир затны ангылагъанма –  адам жашаууну ахырына дери билим алыргъа, окъургъа, айныргъа керекди. Энди мен аны битеу шуёхларыма, нёгерлериме да айтып, быллай конкурслагъа къатышыуну магъанасын ангылатханлай турама»,-дегенди ол.
Ызы бла сёз «Жангы бийиклик» кадрла конкурсну юсюнден баргъанды. Биринчиден а, Казбек Коковдан ол быллай эришиулеге къатышханын бла къалгъанын соргъандыла. «Мен тюрлю-тюрлю тестлени  кёп кере толтургъанма. Бюгюнлюкде уа тыш къыраллада  къуллукъгъа алгъанда угъай,  предприятиялада окъуна соруулагъа жууапла бердиредиле.  Мен акъыл этгенден,  бизде да бу сынамны сингдирирге боллукъ эди»,-дегенди ол.
Дагъыда конкурс ишлеге багъа ким берлигин, айырыу  тюзлюк бла бардырыллыгъын бла къаллыгъын, бюгюнлюкде анга ненча адам къатышханын да билирге сюйгендиле тюбешиуге келгенле.
Республиканы оноучусу айтханнга кёре, сайлаугъа къатышханланы атлары, тукъумлары белгили тюйюлдю, алагъа жаланда номерле бериледиле. «Аны ючюн хар иш да тюзлюк бла тинтиллигине сёз береме. Мында жууукълукъ, нёгерлик да болушурукъ тюйюлдюле. Хар ким да кесини билимине ышаныргъа керекди»,-деп къошханды.
Мухамед Кодзоков билдиргенича уа, 15 ноябрьни шартларына кёре сайтда 4,5 мингден аслам  адам эсепге тургъанды, аладан 800 анкетаны ахырына дери толтургъандыла. «Бу ишге жамауатда сейир уллу болгъанын айтыргъа сюеме, анга заявкала «Россейни лидерлерине»  берилгенден эсе кёпдюле»,-деп къошханды ол.
Конкурс не мурат бла башланнганды, деп да соргъандыла. Казбек Коков аны болушлугъу бла республиканы социал сферасын, экономикасын айнытыргъа себеплик эталлыкъ профессионал команда жыяргъа сюйгенин айтханды.
Аслангери Кумыков а «Россейни лидерлери» конкурсну ахыр бёлюмюне чыкъгъанла «Элбрус» клубну къурагъанларын билдирип, аны чеклеринде социал программала толтурургъа  белгиленнгенин чертгенди. Сёз ючюн, республиканы школларыны окъуучуларын, студентлени тюрлю-тюрлю конкурсланы болумлары, ала адамгъа къаллай онгла бергенлери, урунуу рынокда къаллай усталыкъла артыкъда изленнгенлери бла шагъырейлендирир мурат барды. «Биз, дерсле къурап, жаш адамлагъа тюз усталыкъ сайларгъа, кеслерини онгларын ачыкъларгъа болушургъа сюебиз да, бу ишде сизни себеплигигиз керекди»,-дегенди ол Казбек Коковха.
Республиканы оноучусу проект магъаналы болгъанын чертип, анга ыразылыгъын айтханды. «Ёсюп келген тёлю бла байламлыкъла къураргъа, алагъа болушургъа керекди. Сизге уа «Россейни лидерлеринде» КъМР-ни атын иги бла айтдыргъаныгъыз ючюн энтта бир кере ыразылыгъымы билдирирге сюеме. Тирилигигиз эсленмей къалмагъанды. Аны ючюн бу тюбешиуге къатышханланы барысын   да КъМР-ни кадр резервине къошууну дурус кёреме»,-дегенди ол.
 Эсигизге салайыкъ, «Жангы бийиклик»  республикалы конкурс Казбек Коковну башламчылыгъы бла бардырылады.  Ол быйыл 1 ноябрьде башланнганды эмда анга къатышыргъа сюйгенле 20 ноябрьге дери «Новая высота 2018» деген Интернет сайтда эсепге турургъа керекдиле. Ызы бла 27 ноябрьден 9 декабрьге дери тестле бардырыллыкъдыла, алада хорлагъанла 19-22 декабрьде очный бёлюмде эриширикдиле. Анда айырмалы болгъанла  уа  республиканы кадр резервине къошулуп, муниципал эм къырал къуллукълада, тюрлю-тюрлю сфералада ишге кирирге боллукъдула.