КъБР-м и Парламентым и еханэ зэхуэсым и ЩIалэгъуалэ палатэм хагъэхьэнухэр къыхахын щIадзащ.
ЩIалэгъуалэ палатэр илъэситIым тещIыхьауэ яубзыху. Абы хагъэхьэ республикэ, щIыпIэ жылагъуэ IуэхущIапIэхэм, муниципальнэ районхэмрэ къалэ округхэмрэ самоуправленэмкIэ я органхэм епхауэ лажьэ щIалэгъуалэ зэгухьэныгъэхэм, политикэ партхэм я щIыналъэ къудамэхэм, студент зэгухьэныгъэхэм я лIыкIуэхэр.
КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэ политикэмкIэ и комитетым къагъэхьащ цIыху 58-м я дэфтэрхэр. Абыхэм ящыщу епсэлъэну къыхахащ 55-р. Къыхэгъэщыпхъэщ, ЩIалэгъуалэ палатэм и етхуанэ зэхуэсым хэтам я процент 45-м адэкIи я жылагъуэ лэжьыгъэм пащэну гупыж зэращIар.
КъэпщытакIуэ гупым, депутатхэм къищынэмыщIа, къэрал, жылагъуэ лэжьакIуэхэмрэ щIэныгъэлIхэмрэ хэтщ, мы зэманым ирихьэлIэу зэIущIэу тIу ирагъэкIуэкIащ ЩIалэгъуалэ палатэм хагъэхьэнухэр къыхахыным теухуауэ.
Дэтхэнэ ныбжьыщIэми и къалэнт дакъикъитхум къриубыдэу езыми закъригъэцIыхуу зэлэжьыну и мурадхэм къэпщытакIуэхэр щигъэгъуэзэну, упщIэхэм жэуап иритыну. КъэпщытакIуэхэр щIэупщIащ федеральнэ, республикэ хабзэхэр егъэфIэкIуэн и лъэныкъуэкIэ щIалэгъуалэм яIэ гупсысэмрэ мурадхэмрэ зыхуэдэм.
КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэ политикэмкIэ и комитетым и унафэщI Азычэ Светланэ жиIащ ЩIалэгъуалэ палатэм щызэфIагъэкI лэжьыгъэм и фIыгъэкIэ абы хэтхэм зэрызаужьыр, къэкIуэну зэманым политик ныбжьыщIэхэр хуэгъэхьэзыра зэрыхъур. «Мыхьэнэшхуэ иIэщ палатэм муниципальнэ щIыналъэ псоми я лIыкIуэхэр зэрыхэдгъэхьэм. Сыту жыпIэмэ, район, къуажэ нэхъ пхыдзахэми я гугъуехьхэр абыхэм нэхъ наIуэ къащIыну, хэкIыпIэхэр къагъэлъэгъуэну Iэмал яIэ мэхъу», - къыхигъэщащ Светланэ.
Депутатыр тепсэлъыхьащ етхуанэ зэхуэсым и ЩIалэгъуалэ палатэм хэтхэм яIа ехъулIэныгъэхэми, псалъэм папщIэ, абыхэм язщ УФ-м и Къэрал Думэм иригъэкIуэкIа урысейпсо щIалэгъуалэ зэхыхьэм хабзэм теухуауэ дыдейхэм къыхалъхьа жэрдэмыр зэрыпхыкIар.
Комитетым мы лэжьыгъэр зэфIигъэкIмэ, ЩIалэгъуалэ палатэм цIыху 45-рэ хагъэхьэну КъБР-м и Парламентым къыщыхилъхьэнущ.