Кёп болмай видеоконференция халда Россейни промышленниклери бла предпринимательлерини Шимал - Кавказ федерал округда координация советини кенгеши бардырылгъанды. Анга КъМР-ни Правительствосуну Председатели Мусукланы Алий, экономиканы айнытыу министр Рахайланы Борис эм промышленность, энергетика эмда сатыу-алыу министр Шамиль Ахубеков да кътышхандыл. Аны юсюнден КъМР-ни Экономиканы айнытыу министерствосуну пресс-службасындан билдиргендиле.
Жыйылыуну чеклеринде эпидемиология болумну кезиуюнде СКФО –ну субъектлеринде экономиканы, ол санда промышленность бла сатыу-алыу бёлюмлени айнытыу сюзюлгенди. Былтыр апрель-июнь айлада Къабарты-Малкъарда къоркъуусузлукъну жалчытырча чекле салыннганларыны кезиуюнде эм биринчи хайырланыучу (розница) рынок апчыгъанды. Болсада ала кетерилгенлеринден сора ёсюм эсленнгенди. Алай бла жылны ахырына розница рынокда сатыу-алыу оборот 95,2 процентге жетгенди.
Промышленность бёлюмню юсюнден айтханда да, озгъан жылны эсеплери осал тюйюлдюле. Пандемияны аясуз кезиуюнде окъуна эл мюлк эм промышленный предприятияланы ишлерин тохтатмазгъа оноу этилгенини хайырындан жетишимле болдурулгъандыла.
Саулай алып айтханда, былтыр онбир айгъа аслам файда ичги, кийим, къумач чыгъаргъан, териден, агъачдан этилген абериледен, химия, минерал продуктла, компьютерле, электрон эм оптика товарла, автотранспорт, прицеп сатхандан эм башхаладан тюшгенди.
