Къабарты-Малкъарны Башчысы Казбек Коков Чегем районну социал объектлерине къарагъанды. Жолоучулукъда аны биргесине Чегем муниципал районну жер-жерли администрациясыны таматасы Юрий Борсов, къурулуш эм ЖКХ министр Алим Бербеков, спорт министр Ислам Хасанов, подряд организацияланы оноучулары болгъандыла.
Казбек Коков Шалушка элни 2005 жылда «Спорт – жашау марда» федерал проект бла ишленнген спорт залында болгъанды. Проектни жашаугъа кийириуге 48,5 миллион сом бёлюннгенди. Мекямда баскетбол, волейбол эм мини футбол ойнарча онгла, тренажёр зал эм фитнес-ара, душ кабинала, тренерле тургъан, медицина эм массаж отоула бардыла. Мында хар сюйгеннге спорт бла кюреширча онгла къуралгъандыла, ол санда саулукъларында чекленнген онглары болгъанлагъа да.
Казбек Валерьевич жараула къалай ётгенлерине къарагъанды, жаш спортчула бла сёлешип, алагъа жетишимле тежегенди. Тренерле республиканы оноучусуна планларыны юсюнден айтхандыла, шалушкачыла не заманда да айырмалы болгъанларын чертип, элни энчи жыйымдыгъында 34 хорлам кубок болгъанын белгилегендиле.
Элде Казбек Коков 140 жери болгъан жангы сабий садха къараргъа да баргъанды, ол тиширыуланы ишге чыгъыу онгларына къайгъырыу – «Демография» миллет проектге кёре юч жылларына дери сабийлеге школгъа дери билим берген болумланы къурау программагъа кёре ишленнгенди. Багъасы жюз миллион сомдан аслам болгъан объект беш блокдан къуралыпды.
Анда 20-шар жери бла жети группа барды, аланы хар биринде жукълагъан отоула, тешиниучю жерле, къургъакъсытхан шкаф, ашхана эм санузелле бардыла. Махкемеде медицина эм процедура отоула, быстыр жуугъан эм итиу салгъан отоула, музыка эм физкультура залла, пищеблок эм подсобный отоула жарашдырылгъандыла. Сабий садны кесини котельнясы, трансформер подстанциясы эм дизель-генератору барды. Жууукъ заманда мында биринчи келген сабийчиклени сакълайдыла.
Казбек Коков къурулушчуланы ишлерине бийик багъа бергенди. Ол, мекямны жарашдырылыу эм жасаланыу халын дурус кёрюп, битеу сабий учрежденияланы низамлы эм гитчечиклени къууандыргъан халлары болургъа кереклисин белгилегенди.
Яникой элде Башчы физкультура-саулукъ кючлеу комплексде болгъанды. Аны къурулушу жамауат башламчылыкъла бла жандауурлукъ ахчагъа 2018 жылда башланнганды. 2019 жылда республика проектге себеплик этгенди: къырал-энчи партнёрлукъну чеклеринде республикалы эм муниципал бюджетледен тийишли ырысхы бёлюннгенди. Быйыл республикалы бюджетден къошакъ ырысхыгъа спорт комплексни къурулушу ахырына жетерикди.
Казбек Коков анда Совет Союзну Жигити Байсолтанланы Алимни юй-музейин жокълагъанды. Ол жигитни бюстуна гюлле салгъанды, аты айтылгъан лётчик-истребительни жашаууну юсюнден хапарлагъан къыйматлы экспонатла жыйылгъан музейге къарагъанды. Былтыр Уллу Хорламны 75-жыллыгъына жораланнган ишлени чеклеринде республикалы программагъа кёре мында реконструкция этилгенди.
Казбек Коков белгили жигитни къарындашындан туугъан Байсолтанланы Руслан бла махкемени мындан ары турмушун, аны республикалы маданият объект даражагъа кёчюрюу онгланы сюзгенди. «Сыйлы инсан, Къабарты-Малкъарны ахшы уланы, ол жаш адамлагъа юлгюдю. Аллай адамланы юслеринден эсгериуле ёмюрледе сакъланыргъа керекдиле», - деп чертгенди республиканы Башчысы.