Сухомлинский Василий «Сердце отдаю детям» и тхылъыр гъуэгугъэлъагъуэ хуэхъуащ Дзэлыкъуэкъуажэ и курыт школ №1-м и егъэджакIуэ Хьэжнэгъуей ФатIимэ. Ар хущIокъу дэтхэнэ и еджакIуэ цIыкIуми и гу хуабагъэ ирихьэлIэну. ЕгъэджакIуэ хъуным ар щхьэусыгъуэ нэхъыщхьэ хуэхъуащ. Къыхэгъэщыпхъэщ мыхьэнэ мымащIэ зиIэ нэгъуэщI зы лъэны-къуи - ФатIимэ и анэшхуэм (Пщыунэ ФатIимэт пэщIэдзэ классхэм щIэсхэр илъэс куэдкIэ иригъэджащ) и деж къыщыщIэдзауэ а IэщIагъэр унагъуэм къазэрыдэгъуэгурыкIуэрщ. И анэ Пекъу ХьэIишэти илъэс пщIы бжыгъэ зыбжанэ хъуауэ биологиемкIэ егъэджакIуэу мэлажьэ.
- Си анэшхуэм егъэджакIуэу лэжьэн щыщIидзар Каменномост къуажэращ, зауэ нэужь илъэсхэм. Абы и дежкIэ егъэджакIуэ ухъун щхьэкIэ мащIэт махуэ ныкъуэкIэ доскам укIэрытыныр. Ар а IэщIагъэм ирипсэурт, и еджакIуэхэм я ехъулIэныгъэхэм ирипагэу. Уеблэмэ школыр куэд щIауэ къэзыухыу гъащIэ балигъым хыхьэжахэм щхьэкIи «си бынхэр» жиIэрейт. Иджы фIы дыдэу къызгуроIуэ си анэшхуэм и псалъэхэр: сыт хуэдиз ныбжь яIэ хъуами, ебгъэджахэр сыт щыгъуи уи дежкIэ сабийуэ щытынущ, - жеIэ Хьэжнэгъуейм.
И анэшхуэмрэ и анэмрэ я щапхъэращ ФатIимэ IэщIагъэр къыщыхихым къыхуэщхьэпар. 2005 гъэм ехъулIэныгъэ иIэу школыр къиуха нэужь, куэдрэ мыгупсысэу КъБКъУ-м «ПэщIэдзэ классхэм я егъэджакIуэ» и унэтIыныгъэр къыхихащ.
- Университетыр къыщыдухым, къыздеджа куэд тегушхуэртэкъым школ доскам кIэрыувэну. Сэ а дакъикъэр къысхуэмыгъэсу сыпэплъэрт, - жеIэ ФатIимэ. - Иджыри сыстуденту, физическэ щэнхабзэмкIэ егъэджакIуэу лэжьэн щIэздзащ, иужькIэ илъэскIэ Налшык къалэм и курыт еджапIэ №12-м егъэджакIуэ-къызэгъэпэщакIуэу сыщытащ. А илъэсым си зэфIэкIым хэзгъэхъуэну IэмалыфI сиIащ. ИтIанэ пэщIэдзэ классхэр къызатащ.
Хьэжнэгъуейр щылэжьащ сабий ныкъуэдыкъуэхэр щрагъаджэ Ресурс центрым епхауэ щыIэ ЩIэныгъэ-техникэ творчествэмкIэ еджакIуэхэм я щIыналъэ IуэхущIапIэми. ЯпэщIыкIэ ФатIимэ къилъытащ зэса лэжьэкIэм тету кIуэмэ, гугъуехь а Iуэхум къыхэкIын хуэмейуэ. АрщхьэкIэ езым зэрыжиIэмкIэ, «егъэджакIуэм и дерситI зэхуэдэ зэи хъуркъым».
- Ресурс центрым сыщыщыIэм цIыкIухэм япэIэщIэу (скайпкIэ) зырызыххэу садэлажьэрт. Си еджакIуэхэр зи узыншагъэм сэкъат иIэ сабийхэрати, жэуаплыныгъэ нэхъыбэ зэрысхьыр къызгурыIуэрт. Уеблэмэ абыхэм я гукъеуэри гукъыдэжри экранымкIэ зыхэсщIэрти, зэрысхузэфIэкIкIэ абыхэм щIэныгъэ зэрестым къыдэкIуэу, гулъытэ хэхаи зэрезгъэгъуэтыным сыхущIэкъурт, - жеIэ Хьэжнэгъуейм. - ИкъукIэ сфIэфIу сыдэлэжьащ дэтхэнэми. Пэжыр жыпIэмэ, цIыкIухэм сапыщIаурэ сэ езым си зэфIэкIми къэухьми хэхъуащ. Нэхъыщхьэрати, гъащIэм нэгъуэщI лъэныкъуэкIэ сеплъу, Iуэху мыхьэнэншэу къытщыхъуу щытахэм иджы гулъытэ яхуэсщIуу сыхъуащ. Абы сыщыщылэжьарщ къыщызгурыIуар зы махуэм егъэджакIуэ узэрымыхъур, атIэ а Iуэхум куэдрэ уелэжьын зэрыхуейр. Ар ещхьщ тепса жылэм асыхьэту гъавэ къузэримытым.
2016 гъэм и фокIадэм ФатIимэ Дзэлыкъуэкъуажэм и курыт школ №1-м пэщIэдзэ классхэр щригъэджэн щIидзащ. Ар и анэшхуэм и пIэ иувэжауэ жыпIэ хъунущ. 2019 гъэм абы и япэ гъэсэнхэр къыщIигъэкIащ.
Хьэжнэгъуейр илъэси 10-м щIигъуащ егъэджэныгъэ лэжьыгъэм зэрыхэтрэ икIи Iуэхуншэу щысыфхэм ящыщкъым, зэрызиужьынум зэпымыууэ йогупсыс. И мурадхэм ящыщщ абы психолог IэщIагъэри зригъэгъуэтыну зэрыхуейр.
- Си хъуэпсапIэхэм ящыщщ зи узыншагъэм сэкъат иIэ сабийхэм папщIэ школ къызэIусхыну. Апхуэдэ цIыкIухэм гулъытэ лей яIэн, я щхьэ Iуэху зэрахуэжыфу егъэсэн хуейщ. Абы щыгъуэщ гъащIэм щызиIэ фарзыр згъэзэщIауэ къыщыслъытэнур, - жеIэ ФатIимэ.