Шэджэм, Бахъсэн къалэхэм сабийхэм я зыужьыныгъэм тегъэщIауэ щылажьэ «IKALAND» клубхэр къызэрызэIуахрэ куэд мыщIами, я Iуэхутхьэбзэхэм адэ-анэхэр арэзы ещI, цIыкIухэри дехьэх.
IуэхущIапIэхэр къызэзыгъэпэща Къуныжь Заирэ 2012 гъэм диплом плъыжькIэ къиухащ Къэбэрдей-Балъкъэр къэрал мэкъумэш университетым «Бухгалтерский учёт, анализ и аудит» и къудамэр. Апхуэдэуи КъБКъУ-м щIэныгъэ нэхъыщхьэ етIуанэр щызригъэгъуэтащ зэдзэкIакIуэ IэщIагъэмкIэ.
Сабий клуб къызэIухыным куэдрэ егупсысакъым Къуныжьыр, уеблэмэ хьэрычэт Iуэхуми егъэджэныгъэ лэжьыгъэми зэрыпэIэщIэм къагъэувыIакъым. «СцIыху егъэджакIуэ куэдым чэнджэщ къызатырт а Iуэхум сыхэмыхьэну. «Уэ уегъэджакIуэкъым, сыт ар зэрыпщIынур?» - жаIэу. Ауэ си цIыхугъэ хьэрычэтыщIэ зыбжанэм саущиящ: «Тегушхуэ, арыншауэ зыри зэбгъэхъулIэфынукъым». Арати, сытегушхуащ, - жеIэ Заирэ.
Хъыджэбзым и Iыхьлыхэми къыдаIыгъащ и Iуэхур, уеблэмэ и анэм ахъшэ щIыхуэ къыIихри, пэш щхьэхуэ бэджэнду къищтащ, парт, шэнт зыбжанэ, доска зэригъэпэщри, лэжьыгъэр иригъэжьащ.
Бзэхэр джыныр фIыуэ зылъагъу (зэрыжытIауэ, и етIуанэ щIэныгъэр аращ зэхьэлIар) Заирэ сабийхэм инджылызыбзэр яригъащIэу щIидзащ. А Iуэхум ар иригушхуэрт, ауэ щIэх дыдэу къыгурыIуащ цIыкIухэр нэхъыбэж зэрыхуейр, ахэр къыдэпхьэхын щхьэкIэ унэтIыныгъэ зэмылIэужьыгъуэхэр къазэрыхузэгъэпэщыпхъэр. Апхуэдэу абы и Iуэхум зригъэубгъуащ, гимнастикэр, лъэпкъ къафэхэмкIэ, псынщIэу есэп щIынымкIэ дерсхэр, сабийхэм зезыгъэужь нэгъуэщI гупжьейхэр и школым епхауэ къызэIуихри.
Апхуэдэу 2018 гъэм и кIэухым къызэIуиха клубыр псынщIэу хэIущIыIу хъуащ икIи лэжьыгъэ купщIафIэхэр 2019 гъэм и щIышылэм щегъэжьауэ ирагъэкIуэкIыу хуежьащ.
- Шэч хэмылъу, лэжьыгъэм сыщыхуежьагъащIэм гугъу сехьащ си унагъуэмрэ сабийхэмрэ сакъыдэхуэу, IуэхущIапIэми зезгъэужьын хуейти. Пэжыр жыпIэмэ, зэман къыщысхудэхуэр мащIэт. Щхьэхуэу фIыщIэ яхуэсщIыну сыхуейщ си щхьэгъусэми Iыхьлыхэми сакъызэрыгурыIуам, зыкъызэрысщIагъэкъуам папщIэ, - жеIэ хьэрычэтыщIэ цIыхубзым.
2020 гъэм и мазаем Заирэ тегушхуэри, и IуэхущIапIэм и къудамэ Бахъсэн къалэми къыщызэIуихащ. АрщхьэкIэ коронавирусым зэрызиубгъум и зэранкIэ ар пIалъэкIэ къызэтригъэувыIэжын хуей хъуащ. Мы зэманым Шэджэм къалэм дэт «IKALAND» клубым унэтIыныгъэ 15-кIэ гуэшауэ зэпымыууэ сабии 150-рэ йокIуалIэ.
Псом нэхъыщхьэу Заирэ иропагэ зэфIэкI зиIэ егъэджакIуэхэр и IуэхущIапIэм зэрыщызэщIигъэуIуэфам. Гугъуехь къызыхэмыкI IэнатIэ щыIэу къыщIэкIынкъым, ауэ «IKALAND»-м и ехъулIэныгъэхэри мащIэкъым. «5» защIэкIэ еджэ зэрыхъуам, е зи ныбжьыр илъэсищ фIэкIа мыхъу я хъыджэбз цIыкIур шпагат тIысу зэрызигъэсам, е нэгъуэщIу ирехъуи, я бынхэм я ехъулIэныгъэхэм адэ-анэхэм гу щылъатэкIэ, Къуныжьым псалъэ гуапэкIэ зыхуагъазэ. Заирэ зэрыжиIэмкIэ, а дакъикъэхэм дежщ гушхуэныгъэ щызыхищIэр, и къарум щыхэхъуэр.
НэгъуэщI лъэныкъуэкIи и Iуэхум бгъэдохьэ Къуныжьыр. Псом хуэмыдэу гулъытэшхуэ хуещI ныбжьыщIэхэм я гукъыдэжыр зыхуэдэм.
- Сабийм и адэри анэри зэпымыууэ щылажьэ зэманым дыхопсэукIри, щIэблэм я «ныбжьэгъуфI» хъуар иджырей гаджетхэрщ. Нобэ ди гугъуехь нэхъыщхьэхэр къызыхэкIыр ахэрауэ къызолъытэ. Дауэ сабийр ди зэманым гъэсэн зэрыхуейр, гъащIэм имыудыныщIэн, и щхьэ зыхуей хуигъэзэжыфын щхьэкIэ?! Сабий къэс абы Iуэху бгъэдыхьэкIэ щхьэхуэ иIэщ. Езым хуейуэ телефоныр зригъэтIылъэкIрэ сурэт гуэр ищIыну гупыж ищIмэ е къэфэным, есэп щIыным дихьэхмэ, ахэращ си дежкIэ ехъулIэныгъэр», - жеIэ Заирэ.
НэгъуэщI зы гугъуехьми хегъэгупсы-сыхь Къуныжьыр. Ар унэ жьэгур сыт щыгъуи зыхъумэн хуей, ауэ я лэжьыгъэм къызэрыдэмыхуэм къыхэкIыу зи къарури зэманри унагъуэмрэ сабийхэмрэ зыхуримыкъуж анэхэм чэнджэщкIэ, псалъэкIэ зэрызыщIагъэкъуапхъэрщ. Абы и лъэныкъуэкIэ Заирэ и мурадщ «IKALAND» клубым епхауэ Анэхэм папщIэ ресурс центр къызэригъэпэщыну. Ар зэрылэжьэну программэм мы зэманым зэгъусэу йолэжь клубым и психологымрэ егъэджакIуэхэмрэ.
- Зыми и дежкIэ щэхукъым коронавирусыр зэранышхуэ зыхуэхъуахэм хьэрычэт Iуэхур зэращыщыр. Гугъущ мыпхуэдэ зэманым улэжьэну, псом хуэмыдэу ар сабийхэм ехьэлIамэ. Ауэ дыщыгугъынщ псори и пIэ иувэжыну, - дыщIегъу бзылъхугъэм.
Заирэ сабийхэр фIыуэ зэрилъагъур IупщIщ, цIыхубз насыпыр зрипхыр унагъуэрщ, и дыгъэ-щыгъэхэрщи, щIэблэм ядэлэжьэнри Iэмал имыIэу абы къехъулIэнщ.