Кёп болмай КъМР-ни къурулуш эмда жашау журт–коммунал мюлк министрини орунбасары Котченко Романны башчылыгъы бла «тёгерек стол» болгъанды. Анда бюгюнлюкде жамауатны жарсытхан къаты къалгъан-къулгъанла бла байламлы (ТКО) соруула сюзюлгендиле. Аны юсюнден бизге ведомствону пресс-службасындан билдиргендиле.
Жыйылыуда къалгъан-къулгъанла къурамларына кёре жыйылырча, бу жаны бла жамуатны сезимин кючлерча мадар этиу, ол санда багушну жарашдырырча къаллай онгла къуралгъанларына да къаралгъанды. Бюгюнлюкде Нальчикде багуш атхан контейнерле жетмегенлери, арбазлада уллу къалгъан-къулгъанны жыярча жерле болмагъанлары да сагъынылгъанды.
Элледе жашагъанланы уа кир-кипчикни жыйып тургъан адетлери къалса иги боллугъун чертип, хар элде уллу къалгъан-къулгъанланы ташырча майданла болургъа кереклиси да белгиленнгенди.
«ЭКО-Гармония» биригиуню таматасыны орунбасары Виктория Дорохова жараусуз батарейкаланы къайры болсада атаргъа жарамагъанын, ала экология заран салмазча энчи экобокслагъа жыйылсала тап боллугъун чертгенди. Аны бла бирге экологиягъа уллу кёллю болмазча жамауат бла тири ангылатыу иш бардыргъанларын да къошханды. Айтылгъан эсгертиулеге кёре «Экологистика» биригиуню келечилерине багуш атхан орунла бла бирге энчи экобоксла хайырланса иги боллугъу да эсгертилгенди.
Жыйылыуда «Экологистиканы» специалистлери Урванда багуш атхан полигон тола тургъанын, узакъгъа созмай аны оруна башхасын ачаргъа тийишлисин да сагъыннгандыла. Болсада специалистле тыйгъычланы кёплюгюнден бу жаны бла жумуш терк тамамланмазлыгъын ангылатхандыла.
Тюбешиуню ахырында республиканы бу жаны бла проблемалы жерлерин жалчытырча къысха заманда 700-ден аслам жангы контейнер алынырыгъы да айтылгъанды.
