КIуэкIуэ Казбек илъэсыр къызэрихьэрэ япэу иригъэкIуэкIа «муниципальнэ сыхьэтыр» теухуауэ щытащ республикэм щыIэ санитар-эпидемиологие щытыкIэм, коронавирус узыфэм пэщIэтыф мастэхэр цIыхухэм яхэлъхьэным теухуа лэжьыгъэхэр республикэм и муниципальнэ зэгухьэныгъэхэм къыщызэгъэпэщыным, къэрал, республикэ проектхэмрэ программэхэмрэ гъэзэщIэным.
ЗэIущIэм хэтащ КъБР-м и Правительствэм и УнафэщI Мусуков Алий, КъБР-м и Правительствэм и УнафэщIым и япэ къуэдзэ Къуныжь МуIэед, КъБР-м и Правительствэм и УнафэщIым и къуэдзэ Хъубий Марат, КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим, КъБР-м транспортымрэ гъуэгу хозяйствэмкIэ и министр ДыщэкI Аслъэн, КъБР-м узыншагъэр хъумэнымкIэ и министр Къалэбатэ Рустам, республикэм и муниципальнэ щIыналъэхэмрэ къалэ округхэмрэ я щIыпIэ администрацэхэм я Iэтащхьэхэр.
Коронавирусым теухуауэ республикэр зэрыт щытыкIэм и гугъу щищIым КIуэкIуэ Казбек къыхигъэщащ, цIыху куэд зыхэт дауэдапщэхэр къэрал, муниципальнэ, щхьэзакъуэ IуэхущIапIэхэм щрагъэкIуэкIыу зэрыхуамыдам, апхуэдэуи цIыхухэр профилактикэ мардэхэм нэхъ тет зэрыхъуам я фIыгъэкIэ махуэшхуэхэм я ужькIэ сымаджэхэм я бжыгъэм хэпщIыкIыу къызэрыхэмыхъуар. Абы къыдэкIуэуи, республикэм и Iэтащхьэм къыхигъэщащ, щытыкIэр зэпIэзэрыту щытми, ар гугъуу къызэрынэжыр икIи сымаджэ хъухэм я бжыгъэм хэхъуэныр щыпхузэтеIыгъэнур абы ущызыхъумэ мастэхэр цIыху куэдым халъхьа нэужьу зэрыщытыр. Абы ипкъ иткIэ республикэм и Iэтащхьэм муниципалитетхэм я унафэщIхэм яхуигъэуващ щIыналъэхэмрэ къалэ округхэмрэ щыпсэухэм вакцинэр яхэлъхьэным теухуа лэжьыгъэр щIагъэхуэбжьэну.
ЦIыхухэм вакцинэр яхэIуным теухуа лэжьыгъэ псори зэгъэуIуным къыхузэрагъэпэща правительственнэ комиссэм и унафэщIу ягъэуващ Хъубий Марат.
Къалэбатэ Рустам зэрыжиIамкIэ, а хущхъуэгъуэр цIыху 1342-м халъхьащ, 572-м етIуанэ ехьэлIэгъуэри хаIуащ. Иджыри вакцинэ 1400-рэ къаIэрыхьащ икIи щIыналъэм щыпсэухэм жыджэру зрагъэтх ар зыхрагъэIуну хуейуэ. ЩIышылэм и 19-м къыщыщIэдзауэ мастэхэр цIыхухэм щыхалъхьэ республикэм и щIыналъэ сымаджэщ нэхъыщхьэхэмрэ амбулаторэхэмрэ, къуажэ жыжьэхэм щыщхэр мастэ хэIупIэхэм къешэлIэнымкIэ щыIэ хэкIыпIэхэр зэхуагъэхъу, апхуэдэуи жылэхэм мастэхэр яшэурэ абдеж щыхэIунымкIэ яIэ Iэмалхэри зэпалъыт.
«Дэ псынщIэу а Iуэхур зэрызэфIэдгъэкIым, зэдэууэ абы дызэрелэжьым елъытауэ щытынущ псэукIэ тэмэмым дыщыхуэкIуэжыну пIалъэр, республикэм и цIыхухэр я IэнатIэхэм хуиту щекIуэлIэжынур», - къыхигъэщащ Iэтащхьэм.
Дызэрыхьа илъэсым къэрал, республикэ проектхэу муниципальнэ щIыналъэхэмрэ къалэ округхэмрэ щызэфIагъэкIынухэм ятеухуауэ къэпсэлъащ Мусуков Алий. Абы къыхигъэщащ 2020 гъэм проектхэм щаубзыхуауэ щытахэр щIыналъэхэмрэ къалэ округхэмрэ зэрыщызэфIагъэкIар. Дызэрыт илъэсым республикэм и муниципальнэ зэгухьэныгъэхэм щелэжьынущ «Дэтхэнэ зы сабийми и ехъулIэныгъэр», «Гъуэгухэр», «Спортыр ди псэукIэм и мардэщ», «Щэнхабзэ», «Творчествэм дихьэх цIыхухэр», «Къалэм тыншыпIэ псори къыщызэгъэпэщыныр», «Ущыпсэуну къемызэгъыж унэ кхъахэхэм я бжыгъэр гъэмэщIэныр» щIыналъэ проектхэр гъэзэщIэным. Я мурадщ социальнэ IуэхущIапIэхэр яухуэну, жьы хъуахэр зэрагъэпэщыжыну, муниципальнэ жылэхэм я инфраструктурэр ирагъэфIэкIуэну. Премьер-министрым зэрыжиIамкIэ, проектхэр гъэзэщIэным трагъэкIуэдэну субсидиехэр муниципалитет псоми IэрагъэхьакIэщ. Муниципалитетхэм я Iэтащхьэхэм къалэн щащIащ зыхуэфащэ министерствэхэм быдэу япыщIауэ ядэлэжьэну.
«Лъэпкъ проектхэр гъэзэщIэным хуэгъэза лэжьыгъэр къэбгъэтIэсхъэнкIэ Iэмал иIэкъым. Зы щIыналъи щыIэкъым социальнэ IуэхущIапIэхэр щыухуэным, щыIэхэр зэIузэпэщ щыщIыным, муниципальнэ щIыпIэхэр зыхуей хуэгъэзэным теухуа проектхэр щамыгъэхьэзыра. Дэ илъэс кIуам зэдгъэхъулIам нэхърэ нэхъыби нэхъыфIи тхузэфIэкIын хуейщ», - къыхигъэщхьэхукIащ КIуэкIуэ Казбек.