КъМР-ни Къурулуш эмда жашау журт-коммунал мюлк министерствосунда бу кюнледе бардырылгъан «тёгерек столда» республикада киркипчикни жыйып, тийишли жерлеге ташыуну юсюнден ушакъ баргъанды. Жыйылыугъа ведомствону башчысыны орунбасары Роман Котченко, кир-кипчикни ташыу бла кюрешген организацияланы келечилери эм башхала къатышхандыла, деп билдиргендиле министерстводан.
Сюзюуню баш темасы - кир-кипчикни айырып жыйыу эмда жарашдырыу. Республикада бу жаны бла не мадар этерге боллугъун, адамла анга къалай хазыр болгъанларын да сюзгендиле. Дагъыда контейнерле азлыкъ этгенин, аланы орнатыучу жерле да жетишмегенин сагъыннгандыла.
Муниципалитетлени келечилери иели юйле тургъан тийреледе кир-кипчикни «челеклеге» жыйгъан тёреден кетерге кереклисин чертгендиле эмда элледе уллу къалгъан-къулгъанланы бир жанына элтип тёгерча жерле къураргъа чакъыргъандыла.
«ЭКО-Гармония» жамауат организацияны республикада бёлюмюню башчысыны орунбасары Виктория Дорохова уа эски батарейкаланы энчи орунлагъа (экобоксла) жыйгъан ахшы тёре бла шагъырейлендиргенди. Дагъыда ёсе келген тёлюледе кир-кипчикни айырып жыйгъан къылыкъ болурча, аланы къалай юйретирге боллугъуна кёз къарамын да туура этгенди.
«Экологистика» организация бла уа жер-жерледе барыбыз да кёрген контейнерле бла бирге экобоксла да орнатыргъа боллугъун сюзгендиле. Дагъыда биринчилеринден 700 жангысын сатып алгъанларын билдиргендиле.
Дагъыда бу организацияны келечиси Урванда полигон тола-толмаз чекге жетгенин айтып, анда жангы участканы хайырланып башларгъа чакъыргъанды. Аны этерча уа болжалына салмай энтта да кёп иш тындырыргъа керекди.