КъБР-м и Iэтащхьэ КIуэкIуэ Казбек мазаем и 6-м щыIащ Шэрэдж Ищхъэрэ къуажэм. Республикэм и УнафэщIым Инстраграмым щиIэ напэкIуэцIым абы щилъэгъуахэм ятеухуауэ иритхащ:
«Нэхъ пасэуи зэрыжысIащи, Шэрэдж Ищхъэрэм дэт курыт школыр зэдгъэпэщыжынущ. Нобэ сыкъакIуэри зэзгъэлъэгъуащ абы и щытыкIэр.
ШколыщIэхэр жыджэру зэрыдухуэм, нэхъ пасэу ящIахэр зэрызэдгъэпэщыжым, ди еджакIуэхэр тыншыпIэ псори зиIэ иджырей IуэхущIапIэхэмкIэ къызэрызэдгъэпэщым къыдэкIуэу, ди жагъуэ зэрыхъущи, иджыри школ зыбжанэ щыIэщ сыткIи зыхуей хуэгъэзапхъэу.
Сэ пщэрылъ зэращысщIам тету зэман гъунэгъум республикэм ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм игъэбелджылынущ апхуэдэ еджапIэхэр дэтхэнэхэрами. Мы илъэсым ахэр тэмэму зэдгъэпэщыжынущ».
