Урысей Федерацэм и Президентым и полномочнэ лIыкIуэу Кавказ Ищхъэрэ федеральнэ округым щыIэ Матовников Александр дыгъуасэ КъБР-м и Правительствэм и Унэм щригъэкIуэкIащ ди республикэм и социально-экономикэ зыу­жьы­ныгъэм теухуа зэIущIэ.

«Дэтхэнэ субъектми и социально-экономикэ зыужьыныгъэр зэрекIуэкIыр тэмэму къыбгу­рыIуэн папщIэ муниципальнэ щIыналъэхэм я Iуэху зыIутым ­щыгъуазэ зыщIыпхъэу къызолъытэ. Аращ Къэбэрдей-Балъкъэр Республикэм иджырей си къэкIуэгъуэм Май муниципальнэ районым сыкIуэу цIыхухэм я псэукIэм сыщIеплъар, IуэхущIапIэ зыбжанэ къыщIызыхэскIухьар. Апхуэдэ лэжьыгъэм дэ адэкIи пытщэнущ», - зэIущIэр къыщы­зэIуихым жиIащ УФ-м и Президентым и полномочнэ лIыкIуэм.
ЗэIущIэм щедэIуащ КъБР-м цIыхухэр егъэджэнымкIэ, щIэныгъэмкIэ, щIалэгъуалэм я Iуэху­хэмкIэ и министрым и къалэнхэр зыгъэзащIэ Къумыкъу Iэуес, ­КъБР-м узыншагъэр хъумэным-кIэ и министр Хъубий Мурат, Май ­муниципальнэ районым и щIы­налъэ администрацэм и Iэтащхьэм и къалэнхэр зыгъэзащIэ Саенкэ Татьянэ, Тэрч къэзакъы­дзэ зэгухьэныгъэм и Тэрч-Балъкъ окружной къэзакъ зэгухьэныгъэм и атаман Любуня Николай сымэ ящIа докладхэм.
Къэбэрдей-Балъкъэр Республикэм и Iэтащхьэм и къалэнхэр ­пIалъэкIэ зыгъэзащIэ КIуэкIуэ Казбек къэралым и унафэщIым и полномочнэ лIыкIуэм фIыщIэ ­хуищIащ муниципальнэ районым щыпсэухэмрэ абы и унафэщIхэм-рэ зэрызахуигъэзам, а щIыпIэм щыIэ гугъуехь пыухыкIахэр зэры­зэхигъэкIам папщIэ.
ЗэIущIэм и кIэухым абы кърихьэлIа унафэщIхэм гу лъаригъэтащ муниципальнэ, щIыналъэ ­IэнатIэхэм щылэжьэфыну цIыху ныбжьыщIэхэр къыхэхын зэры­хуейм.