Къабарты-Малкъарны Башчысы Казбек Коков республикада Сабийлени эркинликлери жаны бла Уполномоченный Светлана Тлинова бла тюбешгенди. Ушакъларында Светлана Адалгериевна сабийлени эркинликлерин сакълау жаны бла ишни юсюнден айтханды.
2020 жылда пандемияны хатасындан Уполномоченныйни адресине обращенияла азайгъандыла, аны бла бирге излемлени кёбюсю консультация себепликни излегендиле. Социальный сетьледе эм СМИ-леде  акъылбалыкъ болмагъанланы эркинликлерине бузукълукъла этиу бла байламлы билдириулеге мониторинг тохтамай бардырылгъанын, жууаплы службала бла бирге амал этилгенин да белгилегенди ол. Регионну оноучусу бла ушакъда Светлана Тлинова сабий аманлыкъчылыкъны болдурмазча алгъадан иш бардырыу  сорууланы да белгилегенди,  ала ведомстволу аралы къысха байламлыкъланы излегенлерин да чертип.
Къолайсыз юйюрледе ёсгенлени эм орфанный ауруулары болгъан балаланы дарман бла жалчытыу тема да кётюрюлгенди тюбешиуде. Казбек Коков ахыр эки жылда дарманла бла жалчытыугъа республикалы бюджетден бёлюннген ырысхы кёбейгенин, бек багъа препаратла адресный амал бла федерал бюджетни ахчасына алыннганларын белгилегенди.
Пандемияны кезиуюнде  къыралны жанындан социал тёлеулеча болушлукъну сабийлери болгъан юйюрле алгъандыла, ол себеплик этилгенлей турлукъду. Аны бла бирге болум игиленирча ол соруу регион даражада тинтилирге тийишлиди. Казбек Коков жашаугъа къоркъуулу ауруулары болгъан сабийлеге билеклик этерча Россейни Президенти къурагъан «Круг добра» фонд бла республика байламлыкъ жюрютгенин айтханды.  Фондха сырт-сингир атрофиялары (СМА) болгъан тогъуз сабийни заявкасы жиберилгенди.
КъМР-де Сабийни эркинликлери жаны бла Уполномоченныйи билдиргенича, арт заманда республикада ёксюз сабийлени саны азайгъанды. Сабий юй-интернатлада шёндю жаланда ёксюзле угъай, къыйын болумлагъа тюшген, толу болмагъан юйюрледен жашчыкъла бла къызчыкъла турурча онгла бардыла.  Ол а ёсюп келгенни жамауатха къошулуууна, окъуууна эм тийишли къарау бла жалчытылыныууна себепликди.  Светлана Тлинова саулукъларында чекленнген онглары болгъан сабийлени реабилитация этиу жаны бла республиканы социал эм медицина махкемелерини ахшы ишлерин белгилегенди, социал бёлюмде бир-бир сабий учрежденияланы ишлерин тийишлисича бардырыр ючюн излемлерини юсюнден да билдиргенди.
Ушакъда къыралны жанындан билеклик изленнген сабийлеге социал болушлукъ этиуню эм аланы жарсыуларына къайгъырыуну битеу бёлюмлерине эс бурулгъанды. Ахырында Казбек Коков сабийлени эркинликлерин сакълау къырал политикада эм магъаналы болгъанын чертгенди эм къырал таматада Уполномоченныйни институту арт жыллада тири айныгъанын белгилегенди. Ол сабий омбудсмен бла тюбешиу бу жаны бла чурумланы ачыкълап, аланы заманында кетерир ючюн жылны аллында къуралгъанын айтып, бу жаны бла иш тири бардырыллыгъына ышаннганын да билдиргенди.