Шуёхлукъ, келишиулюк, бир бирни хурметлеу

Халкъланы бирлигини кюню  республикабызда  «Бизни кючюбюз бирликдеди!» деген чакъырыу бла белгиленнгенди. Шахарлада, районлада,  элледе да  тюрлю-тюрлю къууанчлы ишле, ол санда  сурат кёрмючле, спорт эришиуле, митингле, концертле да бардырылгъандыла.
Бек уллу къууанчла уа, хар замандача, Нальчикде болгъандыла.  Ала Къырал концерт залны аллында  митингден башланнгандыла. Аны аллындагъы майдан РФ-ни эм КъМР-ни  къырал байракъларын суратлагъан тюрсюнлю шарла бла  жасалып эди. Мында малкъар, орус, къабарты тилледе жырла, тепсеу тартыула  узакъдан окъуна эшитилгендиле.
Сагъат онеки бола, алайгъа тюрлю-тюрлю партияланы, бийик эмда энчи окъуу юйлени, жамауат организацияланы да келечилери кёп санда  жыйылгъандыла. Аланы араларында КъМР-ни Башчысыны Администрациясыны таматасы Мухамед Кодзоков, КъМР-ни Правительствосуну Председателини орунбасары Мурат Карданов, КъМР-ни культура министри Мухадин Кумахов, дагъыда башхала болгъандыла. Саулай юйюрлери бла окъуна келгенле  кёп эдиле.
Жашла бла къызла  къолларында Россей Федерацияны, Къабарты-Малкъарны, партияланы, окъуу юйлени байракъларын чайкъалтхандыла.  «Кёп миллетли Россей - къыралны байлыгъы», «Россей бирлиги бла кючлюдю!» деген жазыулары бла плакатланы да бийикге кётюргендиле. Алайда  Россейге жораланнган назмула айтылгъандыла, Атталаны Азнор, Гергъокъаланы Халимат, Жаболаны Замира, Азамат Беков, Залим Катанчиев, Азамат Цавкилов да «Широка страна моя родная!» деген жырны айтхандыла.
Ызы бла волонтёрла Россейни юч тюрсюнлю уллу байрагъын ортагъа чыгъаргъандыла.  Олсагъат майданда РФ-ни Гимни эшитиледи. Аны КъМР-ни культурасыны сыйлы къуллукъчусу  Людмила Ашхотованы башчылыгъында КъМКъУ-ну  студентлерини хору жырлагъанды.
Жыйылгъанланы КъМР-ни Жамауат палатасыны председатели Хазратали Бердов алгъышлагъанды. Ол Россейни халкъы эркинлиги ючюн  не заманда бирча кётюрюлгенин эсге салгъанды.  «Бурун заманладан  келген тёрелерибиз, адетлерибиз бюгюн да сакъланадыла, миллетлени араларында келишиулюк кючленеди. Бизни туугъан Къабарты-Малкъарыбыз да анга юлюшюн къошады. Мында шуёхлукъда жюзден артыкъ миллетни келечилери жашайдыла, ала ана тиллеринде сёлешедиле, алагъа адабиятларын, маданиятларын, адет-тёрелерин да унутмазча онгла къураладыла. Жыйырмадан артыкъ миллет-культура ара ишлегени да анга шагъатды», -деп, Хазратали Александрович ол келишиулюкню бла ырахатлыкъны бютюн къаты сакъларгъа,  арагъа сууукълукъ салыргъа умут этгенлеге уа жол бермезге чакъыргъанды.
Андан сора  «Мени  Къабарты-Малкъарым» деген жыр айтылгъанды. Школчула бла студентле уа, РФ-ни эмда КъМР-ни байракълары бла ортагъа чыгъып, тепсегендиле.
Жыйылгъанланы дагъыда Къабарты-Малкъарда китапны сюйгенлени биригиуюню таматасы Наталья Шинкарёва, къарачай-малкъар жаш тёлюню айныууна себеплик этген  «Эльбрусоид» фондну Нальчикде бёлюмюню директору Аналаны Марат да алгъышлагъандыла.
Байрамгъа келгенлени жыр бла, тепсеу бла КъМР-ни халкъ артисти  Текуланы Амур,  «Терк къазакъла»,  Гульшах бла Тимур Балкизовла, Артур Губжоков, Артур Дышеков,  «Таулула»,  «Бзерабзе»,  «Арабеск»,  «Нальцук»,   «Шагди» ансамбльле эмда башхала къууандыргъандыла.
Сагъат тёрт  бола уа Къабарты орамда  «Победа»  кинотеатрны аллында майданда Нальчикни  культура эм солуу паркыны духовой оркестри халкъ сюйген макъамланы эшитдиргенди. Алайгъа жыйылгъанла, алагъа тынгылагъанлары бла къалмай, тепсеген да этгендиле. Жырчыла Роза Зашакуева, Юрий Погорелов, Али Ташло, Гергъокъаланы Халимат, муниципал коллективле да ариу ауазлары бла жыйылгъанланы кёллерин кётюргендиле.    

 

Холаланы Марзият. Суратланы автор алгъанды.
Поделиться: