«Ёлка желаний» деген Битеуроссей акция арт кезиуде къыралда кенг жайылгъан жандауурлукъ ишледен бириди. Къабарты-Малкъар да бу огъурлу жумушдан бир жанында къалмагъанды. Тюнене КъМР-ни Правительствосуну юйюнде да аллай назыны тёгерегинде республиканы Башчысы Казбек Коков, Правительствону Председатели Мусукланы Алий, Парламентни келечилери, министрле, тюрлю-тюрлю ведомстволаны таматалары жыйылып, сабийледен келген тилеклени толтурургъа сёз бергендиле.
Тёреде болуучусуча, бу акциягъа къыйын жашау болумгъа тюшген юйюрледен бла сакъатлыкълары болгъан жашчыкъла бла къызчыкъла къатышадыла. Ала жыл сайын Къар Аппагъа Жангы жылгъа къаллай саугъала сюйгенлерин къагъытха жазып ашырадыла. Ала уа Правительствону юйюне келедиле. Ма бу жол да аланы саны мингден артыкъ эди.
Жыйылыуну ача, Казбек Валерьевич, анга къатышыргъа сюйгенлеге ыразылыгъын билдирип, назыдан тешилген хар тилекни да толтурургъа сёз бергенди. Ызы бла ол кеси юч письмону тешгенди. Андан сора къалгъан къуллукъчула да ючюшерин алгъандыла. Эпидемиология болум бла байламлы сабийлени къонакъгъа чакъырыр амал болмагъанлыкъгъа, аланы тилеклери уа сансыз къаллыкъ тюйюлдюле.
- Битеуроссей акция къыралны хар субъектинде да бюгюн башланады. Ол тёрели болгъаны аламатды. Тюрлю-тюрлю сылтаула бла байламлы сабийлени тилеклерин юйюрлери толтуралмай эселе да, биз болушайыкъ.
Ма мен назыдан тешгенледен экисин окъуюм. Биринчисинде Дисана Хамизова сурат ишлерча мольберт бла бояула сюйгенин билдиреди. Артём Мещеряков а планшет тилейди. Къысха заманны ичинде ол тилеклени толтурлукъбуз. Андан тышында да, КъМР-ни Урунуу эм социальный айнытыу министерствосу аллай категориялы сабийлеге 12000 жангы жылгъы саугъа хазырлагъанды. Бирден аланы байрамларын жарыкъ эталсакъ, андан уллу саугъа болмаз барыбызгъа да, - дегенди Казбек Коков.
Дагъыда республиканы Башчысы башха къуллукъчуланы эм къолларындан келген адамланы акциядан кенгде къалмазгъа чакъыргъанды.
