КъМР-ни Башчысы Казбек Коков видеоконференция амал бла РФ-ни Президентини Шимал-Кавказ федерал округда толу эркинликни келечисинде Советни кенгешине къатышханды.
Анда ишсизликни азайтыуну, округда халкъны иш бла жалчытыуну сорууларына къаралгъанды. Дагъыда РФ-ни Президенти 2018 жылда 7 майда чыгъаргъан «РФ-ни 2024 жылгъа дери айнытыуну стратегиялы муратланы бла миллет борчланы юслеринден» 204-чю номерли Указы эмда миллет проектле жашауда къалай бардырылгъанлары да сюзюлгенди.Ахыры.
Жыйылыугъа Советни келечилери эмда къонакъла къатышхандыла - РФ-ни Федерал Жыйылыууну Къырал Думасыны башчысыны орунбасары Ольга Тимофеева, РФ-ни Президентини кенгешчиси Руслан Эдильгериев, РФ-ни Баш прокуроруну орунбасары Андрей Кикоть, РФ-ни урунуу эм социал къоруулау министрини орунбасары Елена Мухтиярова, «Диалог» коммерциялы болмагъан автоном организацияны башчысы Алексей Гореславский эм башхала. Аны ача, полпред Юрий Чайка Шимал-Кавказ федерал округда социал-экономикада кемчиликле болгъанларын, аланы хатасындан регион Россейни башха субъектлеринден артха къалгъанын чертгенди.
Округда кёп жылладан бери тамамларгъа къолдан келмеген артыкъда магъаналы сорууладан бири ишсизликди. Пандемияны кезиуюнде уа урунуу рынокда хал бютюнда осал болгъанды. Ишсизлени саны беш кереге кёбейгенди. Росстатны шартларына кёре, 2020 жылда октябрьде эсепге ишсизлеча салыннганланы саны уруннганланы 12 проценти тенгли болгъандыла. Ол а Россейде орталыкъ тарихледен эки кереге кёпдю (4,6 процент).
Аны бла байламлы полпред регионланы башчыларына урунуу болумну игилендириу жаны бла мадарланы хазырлауну эмда жашауда бардырыуну тирилтирге кереклисин эсгертгенди. Ол санда профессионал билим бериу эм сынауну ёсдюрюу жаны бла программаланы тамамларгъа, жаш адамлагъа стажировка къураргъа, Шимал Кавказны инсанларын Россейни башха регионларында иш бла жалчытыу жаны бла мадарлагъа эс бурургъа кереклиси да чертилгенди.
Юрий Чайка саулукъларына кёре чекленнген онглары болгъанланы иш бла жалчытыуну юсюнден да айтханды. «Биз жаш адамланы, аланы саулукълары осал болгъанына да къарамай, профессионал билим алыргъа кереклисине алландырыргъа борчлубуз. Ала жашауда кеслерине жер табар ючюн, профессионал билим алыргъа тийишли болгъанын ангыларгъа керекдиле»,-дегенди ол.
Бу жаны бла халны игилендирир ючюн а саулукъларына кёре чекленнген онглары болгъанлагъа ишчи жерлеге квотала тохташдырылыргъа керекдиле. Аны бла бирге шахарда мекямлагъа чырмаусуз кирирча мадарла тамамланыргъа тийишлидиле.
- Экономика болумну къыйынлыгъы ючюн ишчи жерле жокъдула. Алай аны бла тынчайып къалыргъа жарамайы. Ол инсанларыбызны жашау къолайлыкъларын осал этеди эмда бир жанындан аланы социал эркинликлерин бузады. Шимал-Кавказ федерал округда урунуу рынокда болумну игилендириу къыралны социал-экономика политикасыны баш борчу болургъа тийишлиди,-деп чертгенди полпред.
Урунуу эм социал къоруулау министрни орунбасары Елена Мухтиярова округда урунуу рынокда болумну юсюнден тынгылы доклад этгенди. Ол ишчи жыл санда инсанла кёп болгъанларын белгилеп, бу кемчиликни узакъ болжалгъа салмай федерал эм регион даражада тамамларгъа кереклисине эс бургъанды.
-2021 жылда халкъны иш бла жалчытыу РФ-ни Президенти бизге салгъан борчладан бириди. Регионладан ол жаны бла предложенияла сакълайбыз. Иш излеген инсанланы асламына себеплик этерча шарт мадарла керекдиле,-дегенди ол.
РФ-ни Къырал Думасыны башчысыны орунбасары Ольга Тимофеева парламентарийле ишсиз къалгъан инсанлагъа къыралны жанындан болушлукъ бериу жаны бла законланы хазырлагъанларын белгилегенди. Фахмулу жаш тёлю Шимал Кавказны регионларында къалыр ючюн вузла къаллай иш толтургъанларын Шимал-Кавказ федерал университетни ректору Дмитрий Беспалов доклад этгенди.
«Диалог. Регионы» коммерциялы болмагъан автоном организацияны башчысы Алексей Гореславский полпредге эмда регионланы оноучуларына Регионнга башчылыкъ этиу жаны бла араланы (ЦУР) къураргъа себеплик этилгени ючюн ыразылыгъын айтханды. Ала РФ-ни Президентини буйругъу бла 1 декабрьде ишлеп байшлагъандыла. Ала регионда жамауат бла байламлыкъланы жалчытыргъа, аладан келген тарыгъыуланы бла тилеклени тинтирге, социология соруула бардырыргъа тийишлидиле.
Жангы структураланы ишлерини хайырлылыкъларын жалчытыр ючюн Шимал-Кавказ федерал университет бла «Диалог. Регионы» организация СКФО-да ЦУР-ланы координация арасын къураргъа оноу этгендиле. «Бу башламчылыкъ жаш тёлюню фахмуларын ачыкъларгъа, илмуда кеслерине жол ачаргъа, алгъан билимлерин жашауда хайырланыргъа онг берликди»,-дегенди Гореславский.
- Регионлагъа башчылыкъ этиу жаны бла арала инсанланы бла власть органланы араларында хайырлы байламлыкъла къурар мурат бла ишлеп башлагъанларын эсгертирге сюеме. Адамла къыралны къайгъырыуун сезерге керекдиле – болушлукъну, къорууланнганларын. Барыгъыз да аны ючюн къайгъыргъаныгъызгъа ишексизме,-дегенди кенгешни ахырында Юрий Чайка.
