Нальчикде Борис Темиркановну ахыр жолгъа ашыргъандыла
27 октябрьде Къабарты-Малкъарны жамауаты дуниясын бу кюнледе алышхан совет эмда россей дирижёр, композитор, Россей Федерацияны халкъ артисти, айтхылы музыкант эмда республиканы белгили жамауат къуллукъчусу Борис Хатуевич Темиркановну ахыр жолуна ашыргъанды.
Нальчикде Къырал концерт залны мекямында баргъан ол бушуулу жыйылыугъа республиканы къалайындан да келгендиле. Жыйылгъанланы арасында къоншу халкъланы келечилери да бар эдиле.
Митингни КъМР-ни культура министри Мухадин Кумахов ачханды эм бардыргъанды. Ол Борис Темиркановну жашау жолуну юсюнден толу хапар айтханды. Аны ата юйюнде культурабызгъа къошумчулукъ этиу бек баш ишге саналгъанын да чертгенди министр. Ол, Борис Хатуевич КъМР-ни Композиторларыны союзуну таматасы, КъМР-ни Къырал филормониясыны симфония оркестрини тамата дирижеру болуп тургъанда да къаллай уста оноучу болгъанын ачыкълагъанын белгилеп, дунияны къалайында да бизни белгили музыка устабызгъа берилген сый бла барыбыз да ёхтемленнгенибизни, мындан ары да ёхтемленип турлугъубузну чертгенди.
Ызы бла Мухадин Лялюшевич сёзню Къабарты-Малкъар Республиканы Башчысыны къуллугъун болжаллы халда толтургъан Казбек Коковха бергенди. Ол Борис Хатуевич республиканы музыка искусствосунда къаллай магъананы тутханын, ол жаланда бизни угъай, уллу Россейни, саулай дунияны да айтхылыкъ жашы, бийик фахмуну иеси, терен интеллигент да болгъанын белгилеп, аны жууукъларына, ахлуларына, шуёхларына, бери келген жамауатха къайгъы сёз бергенди.
Къабарты-Малкъар Республикада Адамны эркинликлери жаны бла уполномоченный Зумакъулланы Борис а: «Бу хапарны мен Москвада халкъла аралы форумгъа баргъанлай эшитгенме. Сагъыш эте да турмай, олсагъат окъуна аэропортха жетип, бери ашыкъгъанма, эрттегили, татлы шуёхуму ашырыргъа», – дегенди.
Зумакъул улу КъМР-ни айтхылы музыканты кесини рухий ишлери бла бизни кёлюбюзню кётюрюп, жюреклерибизни таза этип тургъанын, ол не жаны бла да бек фахмулу адам болгъанын, къырал идеология бузулгъанда, республиканы госфилармониясыны симфония оркестрин сакълар ючюн къаллай бир кюрешгенин эсгертип, оркестрге Борис Хатуевични атын атаргъа керекди дегенди эм малкъар тилде ауушханнга жаннет тилегенди.
Бу бушуулу кюнде бизни биргебизге болургъа къоншу республикаланы келечилери да келгендиле. Адыгеяны, КъМР-ни, КъЧР-ни да халкъ жазыучусу, СССР-ни эм РФ-ни къырал саугъаларыны лауреаты Исхакъ Машбаш Борис Темирканов бла эрттеден шуёхлукъ жюрютгенин, ол къаллай магъаналы адам болгъанын, аны арабыздан кетгени къайсыбызгъа да, бютюнда адыг халкъына, бек уллу жарсыу салгъанын айтханды.
- Мен бери терк-терк келиучюме. Шуёхларым кёпдюле. Аладан бек жууукъ кёргеним Борис Хатуевич эди. Ол къайда да, стол артында, башха жерде болса да, таматаны, кичини энчи сыйлай, алагъа тийишли намыс эте, хар бирибизге энчи сёзле таба билген огъурлу адам эди. Бек таза жюреги бар эди аны. Ол ариу къылыкълары ючюн мен анга бек ыразыма», – деп, Исхакъ Машбаш кесини эм аны бла бирге келген адыг делегацияны атындан ауушханны ол дуниясы жарыкъ болурун тилегенди.
Халкъла аралы черкес ассоциацияны президенти Хаути Сохроков белгили композиторну, дирижерну юсюнден бушуулу сёзле айтхан анга бек къыйын болгъанын чертгенди. Аны битеудуния культураны, искусствону сартындан билими ким да сукъланырча эди дегенди. Бу эки къарындашны, Юрий бла Борис Темиркановланы, бирликлерин, татлылыкъларын юлгюге тутаргъа боллугъун белгилегенди.
Север Осетия-Алания Республиканы культура министри Руслан Мильдзихов маэстрону ауушханы бла байламлы Къабарты-Малкъарны жамауатына къайгъы сёз бергенди. Сора: «Борис Хатуевич бизге къарындаш эди. Музыка жууукъ этген адамла бирча сагъыш этедиле. Ма ол себепден бу ачыулу, мудах кюн мени бла бирге бери осетин артистлени да къаууму келгенди. Ол къуру сизни угъай, битеу Кавказны да жашы эди. Биз аны бир заманда да унутурукъ тюйюлбюз», – дегенди ол.
Дагъыда бушуулу жыйылыуда Къабарты-Малкъарда Эсгертмелени сакълау жаны бла управленияны таматасы Игорь Дроздов, дирижёрну биргесине ишлегенле, тукъумну атындан Анатолий Темирканов, дагъыда ауушханны жууукъ-ахлулары сёлешгендиле.
Къабарты-Малкъарны фахмулу жашын ахыр жолгъа ашырыргъа республиканы алгъыннгы башчысы Юрий Коков, КъМР-ни Парламентини, Правительствосуну делегациялары, жамауат къуллукъчула, культураны, искусствону келечилери эм Борис Темиркановну бийик фахмусуна баш ургъанла, аны юсюнден жюрек сёзлерин айтыргъа сюйгенле келгендиле.
