«Урысей зэкъуэт» Урысейпсо политикэ партыр къы­зэрызэрагъэпэщрэ илъэс 19 щрикъум ирихьэлIэу партым и Къэбэрдей-Балъкъэр щIыналъэ жылагъуэ егъэблэгъапIэм 2020 гъэм дыгъэгъазэм и 1 - 10-хэм къриубыдэу цIыхухэм щаIуощIэ партым и къудамэу щIыналъэм щыIэм и унафэщIхэр, УФ-м ФедерацэмкIэ и Советым хэтхэр, УФ-м и Къэрал Думэм и депутатхэр, КъБР-м и Парламентымрэ щIыпIэ унафэр зегъэкIуэнымкIэ органхэмрэ я депутатхэр. Апхуэдэ зэIущIэхэм кърохьэлIэ властым и гъэзэщIакIуэ органхэм, муниципалитетхэмрэ жы­лагъуэ зэгухьэныгъэхэмрэ я лIыкIуэхэр.
КъБР-м и Парламентым и УнафэщI Егоровэ Татьянэ дыгъэгъазэм и 1-м ВСК мардэм тету епсэлъылIащ я щхьэ IуэхукIэ зыкъыхуэзыгъэзахэм.
Республикэм и Хабзэубзыху орган нэхъыщхьэм и УнафэщIым зыкъыхуагъэзащ Къэбэрдей-Балъкъэрым и щIыпIэ зэмылIэужьыгъуэхэм щыщхэм. Абыхэм я гуныкъуэгъуэхэм ящыщт я псэупIэр ирагъэфIэкIуэ­ным, мэкъумэш IэнатIэм къыщагъэсэбэп щIы Iыхьэхэр зы лIэужьыгъуэм къыхагъэкIыу нэгъуэщIым хэгъэ­хьэным, тхьэкIумэкIыхь гъэхъуным пыщIа ветеринар-санитар экспертизэ егъэщIыным текIуадэ ахъшэр зы­хуэдизын хуейм ехьэлIа Iуэхухэр. ЦIыхухэм я упщIэхэм хэтт хуэмыщIауэ псэу унагъуэхэм къыщыхъу, илъэсищым къыщыщIэдзауэ илъэсиблым нэс ныбжьым ит сабийхэм иратын хуей ахъшэр тэмэму зэраIэрымы­хьэм, зэрылэжьапIэншэм къыхэкIыу цIыхур учётым ягъэуву ахъшэ къратыным, сымаджэм и ныкъуэдыкъуа­гъэр къегъэлъытэным, къыIаха щIыхуэр щхьэщахынымкIэ защIэгъэкъуэным теухуауэ цIыхухэр зыIууэ лъэпощхьэпохэм ехьэлIахэр.
ЦIыхухэм щаIущIэм абыхэм гурагъэIуащ я Iуэхум ­хабзэр зэреплъыр икIи зэрыхуа щытыкIэм къикIынымкIэ хэкIыпIэу яIэхэм теухуа чэнджэщхэр иратащ.
-Iуэху куэд абдеж занщIэу щызэфIэдгъэкIыфащ, ауэ абыхэм яхэтщ пIалъэ гуэркIэ зэхэгъэкIын хуейхэр. Ди къалэн нэхъыщхьэр цIыхухэм я хуитыныгъэхэм теухуауэ хабзэм къигъэувхэр ягурыдгъэIуэнырщ, ахэр зыхэт гугъуехьхэм къыхэкIынымкIэ зэрытхузэфIэкIкIэ дадэIэпыкъунырщ. Абы къыхэкIыу, зыкъытхуэзыгъэза дэтхэнэми и Iуэхур зытетыр щызэпкърыха тхыгъэ хуедгъэхьыжынущ, - къыхигъэщащ Егоровэ Татьянэ.
Абдеж къыщаIэта Iуэху псори зэрыдэкIым КъБР-м и Парламентым и УнафэщIым и нэIэ тетынущ.