КIуэкIуэ Казбек видеоконференц мардэм тету дыгъэгъазэм и 2-м епсэлъащ Къэбэрдей-Балъкъэр Республикэм и щIыналъэхэм, къалэ округхэм я администрацэхэм я унафэщIхэм. ЗэIущIэм хэтащ КъБР-м и Премьер-министр Мусуков А. ТI., КъБР-м и Iэтащхьэм и Администрацэм и УнафэщI Къуэдзокъуэ М. М., КъБР-м и Правительствэм и УнафэщIым и къуэдзэ Хъубий М. Б., КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч А. Хь., КъБР-м транспортымрэ гъуэгу хозяйствэмкIэ и министр ДыщэкI А. З.
ЗэIущIэм щытепсэлъыхьащ республикэм и муниципальнэ щIыналъэхэмрэ къалэ округхэмрэ щрагъэкIуэкI ухуэныгъэхэр и кIэм нагъэсу лажьэу утIыпщыным ехьэлIа Iуэхухэм, апхуэдэуи лъэпкъ проектхэр гъэзэщIа зэрыхъум.
ЗэIущIэм хэтхэм захуигъазэри, КIуэкIуэ Казбек жиIащ ухуэныгъэхэр и чэзум зэфIэгъэкIыным, лэжьыгъэхэм я фIагъым набдзэнубдзаплъэу кIэлъыплъыным мыхьэнэшхуэ зэриIэр.
ЩIыналъэм и УнафэщIым къыхигъэщащ илъэс дызэрытым лэжьыгъэ куэд зэрызэфIагъэкIар. Республикэм Ухуэныгъэмрэ псэупIэ-коммунальнэ хозяйствэмкIэ и министерствэр и закъуэ ухуэныгъэщIэу 50-м елэжьащ. Щэнхабзэм и IуэхущIапIэ 19 сыт и лъэныкъуэкIи зыхуей хуэзэу зэрагъэпэщыжащ. Гъуэгу хозяйствэм и объекту 100-м щIигъум елэжьащ.
Абы къыдэкIуэу, къыхигъэщхьэхукIащ КIуэкIуэ К. В., и кIэм намыгъэса къалэнхэри щыIэщ, абыхэм еужьэрэкIын хуейщ, къыкъуэкI лъэпощхьэпохэр псынщIэу лъэныкъуэ егъэзауэ лэжьыгъэхэр и кIэм нэгъэсыпхъэщ. ЗэгурыIуэныгъэ зращIылIа IуэхущIапIэхэу контрактхэм къыщыгъэлъэгъуа фIагъхэм зи лэжьэкIэхэр хуэмыкIуэхэр, и чэзум объектхэр зымытхэр жэуапым ешэлIэн хуейщ икIи апхуэдэхэм дзыхь яхуэпщIу ухуэныгъэм ебгъэувалIэ зэрымыхъунур хэIущIыIу щIыпхъэщ.
КъБР-м Транспортымрэ гъуэгу хозяйствэмкIэ и министерствэм къызэритамкIэ, «Фагъ лъагэ зиIэ автомобиль гъуэгу шынагъуэншэхэр» лъэпкъ проектым хыхьэу 2020 гъэм дыгъэгъазэм и 1-м ирихьэлIэу Iуэху 93-рэ зэфIагъэкIащ - къыхуагъэув мардэхэм изагъэу зыхуей хуагъэзащ автомобиль зекIуапIэ гъуэгуу километри 103-рэ, абыхэм асфальтрэ бетонрэ зэхэлъу тралъхьащ, гъуэгухэм ящыщу километр 22-м хуэдизым я Iуфэхэм уэздыгъэхэр щыфIадзащ, гъуэгу километриплIым ябгъухэм къэухьхэр Iуагъэуващ, лъэпкъ мардэщIэм изагъэу лъэс зэпрыкIыпIэ 50 зэIузэпэщ ящIащ, абыхэм деж Т-7 лIэужьыгъуэм хуэдэ светофорхэр щыфIалъхьащ.
Илъэсым и кIэ пщIондэ къэнэжа зэманым гъуэгу километр 18-м щагъэувынущ ахэр къызэрагъэнэхуну пкъохэр, лъэсу къэзыкIухьхэм папщIэ зэпрыкIыпIэ 88-рэ зэIузэпэщ ящIынущ, апхуэдэуи Бахъсэн къалэ округым зы светофор щыфIадзэнущ. Абы Iэмал къитынущ щIыналъэ мыхьэнэ зиIэ автомобиль гъуэгуу километр 40-м нэблагъэ къагъэнэхунымкIэ, лъэпкъ мардэщIэхэм изагъэу лъэс зэпрыкIыпIи 138-рэ зыхуей хуэгъэзэнымкIэ.
Апхуэдэуи зэфIагъэкIа лэжьыгъэхэм ящыщщ Тегенекли, Бахъсэн Ипщэ, Псы хущхъуэхэм я ауз жылэхэм я лъэмыжхэу 2018 гъэм къе-ха псыдзэмрэ ятIэмрэ трахахэр зэрытралъхьэжар, ахэр псори зэхэту метр 80-м щIегъу.
КъБР-м и щIыналъэ гъуэгу фондым щыщу муниципальнэ зэгухьэныгъэхэм 2020 гъэм субсидиеу хуаутIыпщащ сом мелуан 300-м щIигъу. Муниципалитетиблым ахъшэ псори зыхухахэм къыхуагъэсэбэпащ, адрей тхум лэжьыгъэхр иджыри щокIуэкI.
2024 гъэ пщIондэ илъэс къэс ирагъэкIуэкIыну я мурад лэжьыгъэхэр яубзыхуащ. «ФIагъ лъагэ зиIэ автомобиль гъуэгу шынагъуэншэхэр» лъэпкъ проектым хыхьэу 2021 гъэм ирагъэкIуэкIыну ухуэныгъэхэм ирахьэлIэнухэр къащэхуащ.
Лъэпкъ проектхэр республикэм зэрыщагъэзащIэм теухуауэ къэпсэлъащ Къэбэрдей-Балъкъэр Республикэм и Премье-министр Мусуков Алий.
КъБР-м и Правительствэм къызэритамкIэ, лъэпкъ проектхэм щыубзыхуахэм я процент 79-рэ хуэдиз щIыналъэм щызэфIагъэкIащ. Ар Кавказ Ищхъэрэ федеральнэ округым хыхьэ адрей щIыналъэхэм ящIахэм нэхърэ нэхъыбэщ. (Зэры-Урысейуэ къапщтэмэ, псори зэхэту лъэпкъ проектхэр ику иту процент 69,2-кIэ, КИФЩI-м - 66,9-кIэ щагъэзэщIауэ аращ).
Къапщтэмэ, республикэм и щIыналъэ 13-м щыщу 11-м щызэфIагъэкIащ «Ущыпсэуну тынш къалэ» проектым щыубзыхуахэр, «Спортыр ди псэукIэм и мардэщ» щIыналъэ проектым хэт районипщIым щыщу хым абы ехьэлIа лэжьыгъэхэр щаухащ. «ПсэупIэ» лъэпкъ проектыр процент 99-кIэ гъэзэщIа хъуащ. «Дэтхэнэ зы сабийми и ехъулIэныгъэр» проектым ипкъ иткIэ зэфIахын хуей Iуэхухэр 2020 гъэм и фокIадэм и кIэм нагъэсакIэт. Адрей проектхэм хыхьэ лэжьыгъэхэри мыгувэу яухынущ.
«Муниципальнэ сыхьэтым» хыхьэу апхуэдэу хэплъащ коронавирус узыфэ зэрыцIалэм земыгъэубгъуным хуэунэтIауэ Къэбэрдей-Балъкъэрым щыщыIэ щытыкIэр зыхуэдэм.