Къэбэрдей-Балъкъэрым и гъуэгу-плъыр IэнатIэм пэрыт щIалэхэм мафIэ зыщIэнэнкIэ хъуну псэупIэм къыщIашащ сабиищ зыщIэс уна­гъуэр.
Урысей МВД-м и ГИБДД-м и ­гъуэгу-плъыр IэнатIэм Май щIыналъэм щиIэ къудамэм и лэжьакIуэхэу полицэм и лейтенант нэхъыжьхэу ­Макитов Зауррэ Чэтыкъуэ Мухьэ­мэдрэ, ОВ ПСПП-м и къудамэм и командир, полицэм и сержант нэхъыжь Къуэшы­къуей Анзор сымэ Май къалэм я ­къулыкъур щрахьэкIыу, пщэд­джы­жьым жьыуэ гу лъатащ Пролетарскэ уэрамым тет унэм пэгъунэгъу дыдэу щыт теплицэм мафIэ къызэрыщIэнам. Гъунэгъуу щыбгъэдыхьэм абы­хэм къалъэгъуащ мафIэсым псын­щIэу зэрызиубгъур икIи икIэщIыпIэкIэ мыгъэункIыфIамэ, гъу­нэгъуу щыт псэуалъэхэми, цIыхухэр щыпсэу унэми ар зэрыщIэнэнур.
Полицэм и плъыр частымрэ Къы­зэрымыкIуэ щытыкIэхэмкIэ министерствэмрэ хъыбар ирагъэщIа иужь, автоинспекторхэм унэм щIэсхэр къы­щIашащ. ПсынщIэ дыдэу къэсри, мафIэсгъэункIыфIхэм лыгъэр ягъэу­жьы­хащ. Лъапсэр зейхэм полицэм и лэжьакIуэхэм фIыщIэ хуащIащ я унэ­ри езыхэри къызэрырагъэлам папщIэ.