Казбек Коков иш бла Элбрус районнга баргъанды. Башчыны жолоучулугъу эм алгъа Кёнделеннге болгъанды. Анда ол Хаймаша орамда автомобиль жолгъа къарагъанды. Ол тийреледе 120 юйюр жашайды эм элни билим бериу махкемелеринден бири орналыпды. Сакъ жауунланы хатасындан жол тозурап эди. «Эл мюлк жаны бла магъаналы объектлеге эм продукция чыгъарыучулагъа подъездле» программагъа кёре 650 метр узунлукъда жангыртыу ишле бардырылгъандыла.
Кёнделенде 6,3 минг адам жашайды. Элде солуу заманны ётдюрген жангыз бир ара барды – 1971 жылда ишленнген 400 жерге Маданият юй. Андан бери мекямгъа къаралмагъанды. «Культура» миллет проектни ызында 10 миллион сомдан артыкъгъа тынгылы ремонт бардырылгъанды. Бусагъатда ДК-ны мурдорунда республиканы кёп артистлери хайырланнган звукозаписывающий студия ишлейди, эл китапхана да тап жарашдырылгъанды.
Быллымда КъМР-ни Башчысы сабий спорт-саулукъ кючлеу комплекси эм воркаут бёлюмю бла кёп функциялы спорт оюн майданны тинтгенди. 2019 жылда мында жалгъан кырдыгы бла тёрели футбол майдан къуралгъанды. Анга къошакъгъа 2020 жылда битеулю билим берген мектепни тийресинде кёп функциялы оюн майданны къурулушу ахырына жетгенди.
Ол кюн Казбек Коков Элбрус элни суу бла жалчытыу системасыны жангыртыуу къалай баргъанына къарагъанды. Суу баргъан ызланы бузулгъанларыны сылтауундан эки объектни КъМР-ни «Таза суу» деген быйылгъы регионал программасына къошаргъа оноу этилгенди, 20 миллион сом чакълы бир битеулю ёлчемде.
Элбрус районнга иш бла барыуну чегинде регионну оноучусу Огъары Бахсан, Тегенекли элледе эм Нарзан талада жагъаланы тутхучлу этиу ишлеге эм автомобиль кёпюрлени халларына эс бургъанды. Белгиленнген объектле 2017-2018 жыллада суу къобуудан сора бузулгъандыла, жангы сооруженияланы ишлеу излене эди. Республикалы бюджетни ырысхысына эки кёпюрню тынгылы ремонту тамамланнганды, Огъары Бахсанда кёпюр хазыр бола турады.
Терс-Къолда Казбек Коков 42 жерге сабий садны къурулушуна эс бургъанды. Мындагъы мектеп 3-ден 7 жылларына дери 40 сабий жюрюген алгъыннгы школгъа дери бёлюмю ол жаны бла келишмеген жерледе орналып эди. Объектни толусунлай жашаугъа 2020 жылны декабринде кийирирге, дейдиле.
Журтлада жашагъан адамла бла ушакъладан сора жарсытхан соруула ачыкъланнгандыла, жууукъ заманда тындырылыргъа тийишли жумушла белгиленнгендиле, КъМР-ни толтуруучу эм муниципал власть органларыны таматаларына борчла салыннгандыла.