КъБР-м Къалэн куэд щагъэзащIэ и центрым щIалэгъуалэ зэчиифIэхэр щолажьэ. Абыхэм ящыщщ IуэхущIапIэм и Iуэхутхьэбзэхэр цIыхухэм телефонкIэ щыхуащIэ секторым и лэжьакIуэ Серкэ Дианэ. Мы гъэм коронавирусым зиубгъун зэрыщIидзэрэ зи Iуэхур нэхъ гугъу хъуахэм а IэнатIэр ящыщщ, сыту жыпIэмэ IэщIагъэлIхэм я нэхъыбэм я лэжьыгъэр цIыху­хэм япэIэщIэу къызэрагъэпэщын хуей ­хъуащ. Къэбгъэлъагъуэмэ, зы махуэм ­къриубыдэу IуэхущIапIэм цIыху миным нэблагъэ телефонкIэ щыпсалъэ къэ­хъуащ.
- Иджыпсту дызэрыт щытыкIэр (коронавирусым ехьэлIауэ) къэплъытэмэ, зыкъыт­хуэзыгъазэхэм я Iуэхухэр зэрыхъукIэ телефонкIэ зэфIэдгъэкIыну иужь дитщ. Гугъуехьхэми, дауи, дыIуоуэ, ауэ IуэхущIапIэм и унафэщIхэр тщIыгъуу хэкIыпIэхэр къыдогъуэт. Ди лэжьыгъэр цIыхухэм да­дэ­Iэ­пыкъунырщ, чэнджэщ еттынырщ зы­теу­хуари, къыдэхъулIэмэ, с гур хохъуэ, - жеIэ Дианэ.
Курп Ищхъэрэ къуажэм къыщалъхуащ Дианэ, КъБКъУ-м урысыбзэмрэ литературэмкIэ и къудамэр къиухащ. Лэжьэн зэрыщIидзэрэ и щытхъу куэд зэхэтхащ. Апхуэдиз цIыхум я упщIэхэм жэуап епту махуэ псом улэжьэныр, дауи, тыншкъым. ЛэжьапIэ нэужьым Дианэ гухэхъуэгъуэ ­къезытыр, и къарум хэзыгъэхъуэжыр хьэпшып зэмылIэужьыгъуэхэр зэрызэрихъэрщ. Псом хуэмыдэу абы гулъытэ зы­хуищIыр сумкэхэмрэ цIыхубзхэм гъэмахуэм къагъэсэбэп пыIэ бгъуфIэ­хэмрэ ищIынырщ.
- Хьэпшыпхэр зэIущэн зэрыщIэздзэрэ илъэситI мэхъу. Цы IуданэкIэ зэIуща сумкэхэр зэращI Iэмалыр Интернетым къы­щыслъэгъуати, сэри сехъуэпсащ апхуэдэ зыгуэрхэр си Iэдакъэ къыщIэкIыну, - дыщегъэгъуазэ Дианэ. - Iэпэхъ гуэрхэр схуэ­щIу щытащ курыт школым дызэрыщIэс лъандэрэ. А IэщIагъэр фIыуэ сэзыгъэлъэгъуа ди гъэсакIуэ Багъэтыр Рае абы щхьэкIэ фIыщIэ хузощI. Япэ сумкэр си шыпхъум тыгъэ хуэсщIат, къыкIэлъыкIуэу си IэдакъэщIэкIхэмкIэ си ныбжьэгъухэм сахуэупсащ. ЕплIанэу зэIусща сумкэращ си щхьэм къыхуэзгъэнэжар. А хьэпшыпхэр си Iэдакъэ къызэрыщIэкIар къыщищIэм, си ныбжьэгъу Аидэ сытригъэгушхуащ инстаграмым напэкIуэцI къыщызэIусхыу си лэжьыгъэхэр нэхъыбэм езгъэлъагъуну, зэбгрызгъэкIыну. Къапщтэмэ, цы зэрыхъэныр щIэупщIэ зиIэ, ди зэманым екIуу къыхыхьэжа IэщIагъэу къэплъытэ хъунущ. Нэхъ пасэм цы IуданэкIэ зыгуэрхэр зэIузыщэу щытар ди анэшхуэхэрамэ, иджыпсту зи щIалэгъуэ хъыджэбз цIыкIу куэдым абы зыхуагъасэ. Ар IэпщIэлъапщIагъэ къудейуэ щыткъым, атIэ хьэп­шып гуэрым ущелэжькIэ гузэгъэгъуэ ­къозытщ. Иджыпсту инстаграмым Iэмал къыует цIыхубз IэпщIэлъапщIэ куэд зэб­гъэцIы­хунуи, абыхэм я лэжьыгъэхэм зы­щыбгъэгъуэзэнуи, я зэфIэкIым къыпхуэ- щхьэпэн гуэр къыхэпхынуи. Цы IуданэкIэ сыти зэрыпхъэ хъунущ - сумкэм деж къы­щыщIэдзауэ щыгъыни, гъэщIэрэщIа тхьэгъухэмрэ щыгъэхэмри. Сэ си лэжьыгъэ­-хэм щIэщыгъуэ гуэр зэрахэслъхьэным сыт щыгъуи сыхущIокъу. Цы Iуданэ лIэу­жьы­гъуэ зэхуэмыдэхэр къызэрызгъэ­сэбэпым хуэдэу, зэIусщэ сумкэхэри зэ­мыщхьу зэ­рысщIыным иужь ситщ. Псалъэм папщIэ, иджыпсту сызэлэжь сумкэм и щIыкIэр адрейхэм куэдкIэ къащхьэщокI. ФIыщIэ ин яхузощI си Iыхьлыхэми си ныбжьэгъухэми, си Iуэху цIыкIур езгъэ­фIэкIуэнымрэ хьэп­шыпхэр зэбгры­кIы­нымкIэ сэбэп къы­зэ­рысхуэхъуам папщIэ.
Мы зэманым ирихьэлIэу Дианэ и Iэдакъэ къыщIэкIа сумкэхэр 60-м ноблагъэ, цIыхубз пыIэу зэкIэ 4 иIэщ. Абы и IэдакъэщIэкIхэм щIэупщIэ яIэ хъуащ, уеблэмэ и сумки 5 Москва иригъэшащ.