КъБР-м и Парламентым и УнафэщI Егоровэ Татьянэ хабзэубзыху орган нэхъыщхьэм и зи чэзу зэIущIэр иджыблагъэ ири­гъэкIуэкIащ видеоконференц мардэм тету. Абы депутатхэр щедэIуащ кIэ­рыхубжьэрыхухэм елэжь «Экологистика» щIыналъэ операторым зэфIигъэ­кIам.
ЗэIущIэм хэтащ КъБР-м ухуэныгъэмрэ псэупIэ-коммунальнэ IэнатIэмкIэ и министр Бэрбэч Алимрэ ­КъБР-м Тарифхэмрэ псэу­пIэ кIэлъыплъыныгъэмкIэ и къэрал комитетым и уна­фэщIым и къалэнхэр зыгъэзащIэ Мэкъуашэ Алимрэ.
«Экологистика» IуэхущIапIэм и лэжьыгъэр Къэбэрдей-Балъкъэрым къы­щы­зэрегъэпэщ 2019 гъэм щIы­шылэм и 1-м щегъэжьауэ. Абы и къалэнхэм хохьэ кIэрыхубжьэрыхухэр зэщIэкъуэныр, дэшыныр, гъэсеижыныр.
«Экологистика»-м и унафэщI Джэдгъавэ Заурбэч тепсэлъыхьащ я Iуэхутхьэбзэхэр щызэфIагъэкI щIы­пIэхэр зыхуэдэм, уасэ­хэр зэрагъэувым, кIэрыху­бжьэрыхухэр гъэкъэбзэ­ны­м ехьэлIауэ къыхалъхьа зэ­хъуэкIыныгъэхэм я мыхьэ­нэм, нэгъуэщIхэми. Коммунальнэ IэнатIэм и кIэрыхубжьэрыхухэр дэшыным хуа­гъэува пщIэр зэхуэдэкъым: фэтэр куэду зэхэт унэхэм щыпсэухэр къапщтэмэ, зы цIыхум хуэзэу мазэм итын хуейр сом 60,77-м къы­щыщIэдзауэ сом 67,68-м нэсу щытщ, щIапIэ зиIэхэм я дежкIэ уасэр сом 64,43-м къыщыщIэдзауэ 71,75-м нос.
Къэбэрдей-Балъкъэрым кIэрыхубжьэрыхухэр щы­щIатIэ щIыпIэу тIу щыIэу аращ. Полигонхэр Аруан районымрэ Прохладнэ къалэмрэ щыIэщ.
«Аруан» полигоным кIэ­рыхубжьэрыхур щызэхадз линэу тIу иIэщ, илъэсым ­къриубыдэу тонн мини ­150-м елэжьу. ЩIыналъэ опе­раторым и мурадщ иджыри апхуэдэ линитI игъэу­выну. Къищынэ­мы­щIауэ, Iуэху­щIа­пIэм пIалъэ кIыхьым тещIыхьауэ бэ­джэнду къищтащ кIэрыхуб­жьэрыхухэр къызэрыдаш машинэ ­24-рэ.
Бахъсэн къалэ округым щагъэуващ кIэрыхубжьэ­рыхуу илъэсым тонн мин 50-м нэс зэхэзыдзыфыну линэ, ауэ абы иджыри лэжьэн щIидзакъым.
Джэдгъавэм къыхигъэщащ IуэхущIапIэм и гу­гъу­ехьхэр нэхъыбэу я Iуэху­тхьэбзэхэм пэкIуэ уасэр тэмэму цIыхухэм къызэрамытым зэрепхар.
- КъБР-м Тарифхэмрэ псэу­пIэ кIэлъыплъыныгъэмкIэ и къэрал комитетым игъэбелджыла уасэр къэралым щынэхъ мащIэ дыдэхэм ящыщми, республикэм процент 55,17-рэ ­къудейрщ къыщыхэкIыр, - жиIащ абы.
КъищынэмыщIауэ, гугъуехьхэм ящыщу Джэдгъавэм къигъэлъэгъуащ кIэ­рыхуб­жьэрыхухэр зрадзэ ашыкхэмкIэ жылэхэр ирикъуу къызэрызэмыгъэпэщар. Апхуэдэ гугъуехьхэм хэтщ фэтэр куэду зэхэт унэхэри щIапIэ зиIэхэри. Къэп­сэлъам зэрыжиIамкIэ, щIыналъэ операторым и къа­лэнхэм хыхьэркъым цIы­хухэр, IуэхущIапIэхэр кон­тейнерхэмкIэ къызэригъэпэщыну, арщхьэкIэ «Экологистика»-м и ахъ­шэкIэ къищэхури игъэуващ апхуэдэ идзапIэу 450-рэ зэхэдзауэ кIэрыхубжьэ­ры­хур зралъхьэн контейнер 250-рэ.
Къэпщытэныгъэ ирагъэ­кIуэкIахэм япкъ иткIэ, 2018 гъэм мэлыжьыхьым щегъэжьауэ щIыналъэ операторым муниципальнэ щIыналъэхэм къыщыщIигъэщащ хабзэм къемызэгъыу пхъэнкIий идзыпIэ ящIа щIыпIэу 114-рэ.
НэгъуэщI зы лэжьыгъи зэфIегъэкI щIыналъэ операторым - IэщIагъэлIхэр цIы­хухэм яIуощIэ я лэжьыгъэр зытеухуар гурагъэIуэн мурадкIэ. Апхуэдэу мы зэманым ахэр яIущIащ муниципальнэ щIыналъэхэм я лIыкIуэхэм, Прохладнэ, Тэрч, Май районхэм дэт фэтэр куэду зэхэт унэхэм я ТСЖ-хэм я унафэщIхэм. Телефонхэм папщIэ «Экологистика» гуэдзэныр зэхагъэуващ, дэтхэнэми итын хуей пщIэр е телъ щIыхуэр абдеж къыщищIэфын хуэ­дэу.
Республикэм и район псоми щIыналъэ операторым и къудамэхэр щолажьэ, цIы­ху­хэм яIэ упщIэхэмкIэ зы­хуа­гъазэ хъуну.
Егоровэ Татьянэ къы­щып­салъэм жиIащ IуэхущIапIэм зэфIигъэкI лэжьыгъэм мыхьэнэшхуэ зэриIэр, ауэ икIи цIыхухэм къабгъэдэкIыу тхьэусыхафэ куэд КъБР-м и Парламентым къызэрыIэрыхьэр. Нэхъыбэр зэпхар кIэрыхубжьэрыхур и чэзум зэры­дамы­шымрэ контейнерхэр здагъэува щIыпIэхэр къабзэу зэрызэрамыхьэмрэщ.
Егоровэм къыхигъэщащ кIэрыхубжьэрыхур зэрызэхадзым, «Аруан» полиго­ным и щытыкIэм епха ­гу­гъуехьхэм гулъытэ хэха зэ­рыхуащIыпхъэр, абы и ­лъэ­ны­къуэкIэ нэгъуэщI щIы­на­лъэхэр зэрылажьэм зэрыкIэлъыплъыпхъэр.
- Ухуэныгъэ Iуэхум ехьэлIа кIэ­рыхубжьэрыхур дэшы­ным, пщIэ хэха хуагъэувмэ, еувэлIэфыну «Эко­ло­гис­тика»-р? ЦIыхухэм лэжьа­кIуэхэр, транспортыр пщIэ­кIэ къащтэри, ахэр ­драгъэш, ауэ апхуэдэ ­кIэры­хубжьэрыхур здашэр гу­ры­­Iуэгъуэкъым, - къыхигъэщащ Егоровэ Татьянэ.
Джэдгъавэм жиIащ «Аруан»­ полигоным зра­гъэуб­гъуну зэрамурадыр, къапщтэмэ, дыгъэгъазэм икухэм а Iуэхум теухуа дэфтэр псори хьэзыр зэрыхъунур.
КIэрыхубжьэрыхур зэхэ­дзауэ къыхэшыным и гугъу щищIым, къэпсэлъам жи­Iащ гугъуехь зыбжанэ зэрыщыIэр, псом хуэмыдэу абы щхьэкIэ контейнер мини 7-м щIигъу зэгъэпэщын зэрыхуейр.
КъБР-м Тарифхэмрэ псэу­пIэ кIэлъыплъыныгъэмкIэ и къэрал комитетым и унафэщI Мэкъуашэ Алим уасэхэм къыщытеувыIэм жиIащ республикэм щагъэувар къэралым щы­нэхъ мащIэ дыдэхэм зэращыщыр икIи щапхъэу къихьащ Кавказ Ищхъэрэм и щIыналъэхэм къыщекIуэкI тарифхэр. Апхуэдэуи абы дыщIигъуащ Урысейм и ФАС-мрэ КъБР-м и прокуратурэмрэ 2020 гъэм ирагъэкIуэкIа къэпщытэныгъэхэм я лэжьыгъэм ныкъусаныгъэ хэлъу къызэримыгъэлъэгъуар.
КъБР-м и Парламентым Жылагъуэ шынагъуэншагъэмрэ Iулъхьэм пэ­щIэ­тынымкIэ и комитетым и унафэщI Кривко Михаил Прохладнэ районым щып­сэухэм къабгъэдэкIыу «Эко­логистика»-м и унафэщIым зыхуигъэзащ я гугъуехьхэм гулъытэ хуищIыну. Депутатхэм зэрызыхуагъэзамрэ ­социальнэ сетхэм щатхымрэ щыхьэт тохъуэ прохлад­нэ­дэсхэм полигоныр ­ягъу­нэгъуу щытми, кIэры­хубжьэрыхур щIэх-щIэхыурэ зэрыдамышым къыхэкIыу ар зэрыщызэтрихьэр, къабзагъэм и мардэхэр къызэпыуда зэры­хъур. Депутатым жиIащ щIы­налъэ операторым а ­гугъуехьхэр зэман гъунэ­гъум зэ­фIигъэкIыну зэры­щыгугъыр.
ЗэIущIэм щыжаIар къы­щызэщIакъуэжым лэжьыгъэ пыухыкIахэр яубзыхуа­щ. Псом хуэмыдэу къа­гъэ­лъэгъуащ кIэрыху­бжьэ­ры­хухэм папщIэ кон­тейнерхэр къэщэхуным ахъшэ зэрыхухахыну Iэмалхэм хэплъэну, хабзэм ­къемызэгъыу пхъэ­н­кIий идзыпIэ ящI щIыпIэхэр къэзыхутэ комиссэхэм я лэжьыгъэр нэхъ жыджэру къызэрагъэпэщыну, къабзагъэм епха мардэхэр къэ­лъытауэ кIэры­хубжьэ­ры­хур щрадз щIы­пIэхэм кIэ­лъыплъыну, нэгъуэщIхэри.
КъБР-м и Парламентым и комитетхэм пщэрылъ щащIащ кIэрыхубжьэрыхур жэ­щым дэшыным теухуауэ «Экологистика»-м къыхилъ­хьа зэхъуэкIыныгъэхэр за­конодательствэм зэрыхалъ­хьэну щIыкIэм егупсысыну.