Кеси состав бла ишле жаны бла бёлюмню башчысы - Россейни МВД-сыны Черек районда бёлюмюню таматасыны болушлукъчусу ич службаны полковниги Башийланы Анатолийни къызы Аслижан жашаууну асламын - 23 жылны - право низамны сакълаучу органлагъа жоралагъанды. Тюрлю-тюрлю бёлюмледе бет жарыкълы, жууаплы къуллукъ эте, ол сайлагъан усталыгъына - кадр службагъа - кертичилей къалгъанды.
Право низамны сакълауну Аслижан бошдан сайламагъанды. Аны атасы Башийланы Абдурахманны жашы Анатолий ич ишле органлада 32 жыл тюрлю-тюрлю бёлюмледе ишлегенди. Ол Россейни МВД-сыны Ростовда юридический институтуну Нальчикде бёлюмюню кафедрасына таматалыкъ этгенди. Пенсиягъа милицияны полковниги чында чыкъгъанды.
Анасы Лидия Ахматовна уа УГИБДД-ны ветераныды, подполковник чыннга дери ёсгенди. Анатолий бла Лидия къызларыны сайлауун билгенде, анга ыразы болгъандыла эмда не жаны бла да болушхандыла.
1995 жылда Къабарты-Малкъар къырал университетни романо-герман филологияны факультетин бошагъандан сора ол ич ишле органлагъа къуллукъ этерге документлерин хазырлайды. Биринчи стажер болуп киреди, юч айдан а КъМР-де МВД-ны кадрла жаны бла бёлюмюню учёт эм къуллукъ этиу бёлюмюню инспектору болуп аладыла.
Жаш офицерни билимлилигин, иш кёллюлюгюн кёрюп, къысха замандан аны тамата инспекторну къуллугъуна кечюредиле. Аслижан Анатольевна билимин ёсдюрюуге баш магъана бергенди. 2004 жылда РФ-ни МВД-сыны Краснодарда академиясын тауусханды.
Аны биргесине ишлегенле айтханларыча, милицияны полициягъа тюрлендириу бла байламлы жумушланы кезиуюнде ол уллу къыйын салгъанды, бу кезиуде битеу билимин, сынауун аямагъанды.
2011 жылда МВД-ны оноучулары Башийланы Аслижаннга министерствону кадрла жаны бла бёлюмюне таматалыкъны ышанадыла, эки жылдан а ведомствону кеси состав бла ишлеу жаны бла управлениясыны башчысыны орунбасарына салынады. Энтта эки жылдан а анга эм къыйын, жууаплы бёлюмледен биринде - Экстремизмге къажау арада - кадрла бла ишлени ышанадыла. Черек районда ОМВД-ны кадр белюмюне таматалыкъны таулу полициячы 2015 жылдан бери этеди.
Къуллукь этиуде жетишимлери ючюн ол ведомстволу саугъала бла кёп кере белгиленнгенди. Ол санда "Къуллукъ этиуде жетишимле ючюн" майдалны юч даражасы бла, кёкюрекде жюрютюлген "Борчха кертичилиги ючюн", "МВД-да бет жарыкълы къуллукъ этгени ючюн" белгиле, РФ-ни МВД-сыны Сыйлы грамотасы бла да.
Бюгюнлюкде ич службаны полковниги Башийланы Аслижанны башчылыгъында кадрла автоматизацияланнган амал бла эсепге салынадыла, полициячыланы документлери бардырыладыла. Бек магъаналысы уа ич ишле органланы ветеранлары бла полицияда къуллукъ этерге кандидатланы сайлау, право низамны сакълаучуланы сынауларын ёсдюрюуде да уллу иш бардырадыла.
Анга ишинде себеплик этгенлени юслеринден айта, Аслижан Анатольевна кёп жылланы ичинде КъМР-де МВД-да кадрла жаны бла бёлюмге таматалыкъ этген Виктор Поповну эмда ведомствону кадрла бёлюмюню алгъыннгы таматасы Вячеслав Назрановну энчи жюрек жылыулукъда эсгереди.
Башийланы Аслижанны айтханына кёре, аланы оюмлулукълары, сабырлыкълары, билимлери, ишлерине жууаплы кёзден къарагъанлары, билимлерин жаш специалистледен аямагъанлары анга усталыкъны битеу жашырынлыкъларына юйренирге болушхандыла.
Заманыны асламын ишде ётдюре эсе да, таулу полициячы жолоучулукъну бек сюеди, классикалы литератураны, философия чыгъармаланы сайлайды.
- Тыш къыраллы жазыучула Э.Ремаркны, А.Камюну, А.Шопенгауэрни, башха классиклени чыгъармаларын къайтарып окъургъа бек сюеме, - дейди ол.
Мындан ары да Башийланы Аслижанны муратлары уллудула. Сёзсюз, Черек районда ОМВД-да биринчи атламла этген полициячыланы уа аны бетинде ахшы юлгюлери барды.
