Битеуроссей халкъ фронтну Къабарты-Малкъарда бёлюмюню келечилери республиканы муниципалитетлерини интернет-сайтларында информация, ол санда ГИС ЖКХ система бла байламлы болгъаны да къалай басмаланнганын тинтгендиле. Сёз мында «Тап шахар болумну къурау» федерал проектге кирген материалланы юсюнден барады. Алай бла бу ишни эсеплерине кёре жер-жерли власть органланы властьларына халкъны жашау болумун игилендириу жаны бла проектни чеклеринде не мадар этилгенин ачыкъ кёргюзтюрге чакъыргъандыла, деп айтылады ОНФ-ни билдириуюнде.
Тинтиуле быйыл сентябрьде эм октябрьде бардырылгъандыла. Алчы къауум сайтла къалай ишлегенлерине, информацияны терк, толу эм заманында чыгъарылгъанына къарагъандыла. «Биз регионда районланы эмда шахар округланы интернет-сайтларына, ГИС ЖКХ порталда бёлюмлерине да эс бургъанбыз. Биринчиден «Тап шахар болумну къурау» проект бла байламлы программагъа эмда аны заман болжалына къарагъанбыз. Ызы бла ол тийреледе тапландырыу ишлени жорукъларына, ала къачан жарашдырылгъанларына да. Ахырында уа муниципал жамауат комиссияланы протоколлары болгъанына эмда аланы ишлерине жамауат организацияланы келечилери къатышханына», - дегенди ОНФ-ни «Жашау журтла эмда шахар болум» тематика бёлюмюню таматасы Вероника Зимак.
Тинтиулени эсеплерине кёре жамауатны келечилери отчёт хазырлагъандыла. Анда ала битеу табылгъан кемчиликлени туура этгендиле. Сёз ючюн, Нальчик шахар округну мэриясыны интернет-сайтыны «Шахар болум» деген кесегинде озгъан жылда «Нальчик шахар округда 2019-2024 жылланы чеклеринде тап шахар болумну къурау» муниципал программаны проекти басмаланыпды. Алай анда быйылгъы жыл белгиленмегенди. Жамауат комиссияны жыйылыууну протоколу, 2020 жылда тап халгъа келтирилирге керек болгъан арбазланы эмда жамауат тийрелени тизмеси да басмаланмайды.
Бахсан шахар округну юсюнден айтханда, администрацияны сайтында, «Шахар округну жашауу» деген кесегинде тийишли программаны аты жазылгъанлыкъгъа, аны ачып окъур амал жокъду. Активистле порталны тинтип чыкъгъанлыкъгъа, тапландырыу программаны юсюнден жукъ да тапмагъандыла. Аллай проектлеге жамауатны келечилери къатышханларыны юсюнден да хапар берилмейди.
Экинчи Чегемни сайтында «Тапландырыу» бёлюмде жашау журт-коммунал мюлк бла байламлы информация басмаланады. Тапландырыуну юсюнден а анда бир тюрлю документ да табылмагъанды. Зольск эмда Лескен районланы администрацияларыны сайтларында да талай кемчилик болгъаны тохташдырылгъанды.
Интернет-сайтлары тап жарашдыргъан муниципалитетлени тизмесинде уа баш жерни Черек бла Бахсан районла алгъандыла. Алада битеу керекли информация табылады, документлени излеу жаны бла да чурумла жокъдула, деп белгилейдиле ОНФ-де.