«Книжная среда» («Sreda book») - ап­хуэдэцIэ зэрехьэ нобэ фэдгъэ­цIыхуну ди мурад тхылъ тыкуэным. Ар илъэс ныкъуэ хъуауэ егъэлажьэ ­КъБР-м епха инстаграмым пщIэшхуэ щызиIэ блогер КIуэкIуэ Мурат.
«Дэ ди плъапIэщ Налшык тхылъеджэ нэхъыбэ дыдэ зыдэс ­къалэ къыхэтщIыкIыну!» Жыжьэ дэ­Iэбей а псалъэхэр Iурылъу и Iуэхур ирихьэжьащ Мурат. Иджы илъэс ­ныкъуэ ирикъуа абы и «Тхылъ дуней» тыкуэным («среда» урыс псалъэм щIалэм, дауи, къригъэ­кIыр «бэрэ­жьейкъым» ) зы мазэм хуэзэу тхылъ миным пэблагъэ (махуэм - 29 - 30) ­щащэ.
Дызытепсэлъыхь тыкуэным и лэ­жьэ­кIэм гъэщIэгъуэну хэлъыр тхылъ­хэр уи унэ ущIэсу къэпщэху зэры­хъурщ. Абы­хэм Мурат и инстаграм ­напэкIуэцIым ущеп­лъыфым къы­щы­нэркъым. Тыкуэныр зейр абыхэм гупсэхуу къытху­топ­сэлъыхь. Абдежми къыщымыувы­Iэу, Мурат тхылъыр ­зэпха щIэныгъэ къудамэм щылъэ­рызехьэ псэлъэгъухэр къре­гъэб­­лагъэ. Псалъэм папщIэ, щэн-щэ­хуэным техуа тхъылъхэм я гугъу зы­-щIыр хьэрычэтыщIэ Тэтрокъуэ ­Баширщ, литературэм теухуахэм - егъэджакIуэ, журналист Битокъу ­Маринэщ. Езы Мурат зэджахэми ­гунэсу щыгъуазэ дещI. Сыхьэт 15-м ипэ къихуэу къащэхуа тхы­лъыр Налшык кIуэцI пщIэншэу, къалэ­хэмрэ къуажэхэмрэ маршруткэкIэ е ­пощт ­IэмалкIэ щIэупщIэм Iэрагъэхьэ.
«Тхылъ дунейм» IуэхущIэу ди псэу­кIэм къыхилъхьар сыт жыпIэмэ, ар иджыри къэс ди щIыпIэм щамылъэгъуа тхылъ бэзэрхэрщ. Тхылъымрэ бэзэрымрэ мы­хьэнэкIэ нэхъ зэпхы­гъуей бгъуэтын? Ауэ щыхъукIэ, Мурат апхуэдэ бэзэритI зэ­хишакIэщ, къы­зэ­рыщIэкIымкIи, Налшык къалэр абы хуэныкъуэт.
ЩIалэ жыджэрым и Iуэху зехьэ­кIэм уимытхьэкъункIэ Iэмал иIэкъым. ­Мурат сабийхэми балигъхэми, хамэ­хэми хэ­гъэ­рейхэми нэмыс хэлъу зэ­реп­сэ­лъылIэм къегъэлъагъуэ абы тхы­лъыф­I­хэр кърихьэкI къудей мы­хъуу, ярытми зэреджэр, зэджэри къызэрыгурыIуэр, кIэщIу жыпIэмэ, гъэсэныгъэ дахэ зэ­рыбгъэдэлъыр.
Зи гугъу тщIы тхылъ тыкуэныр тыкуэн къудейуи щыткъым. Ар икIи тхылъ ­хъу­мапIэщ. Дэтхэнэ библиотекэми хуэ­дэу, абы тхылъ гуп щызэхуэхьэсащи, ахэр пщIэншэу ­къеIыпхыу, уеджа нэужь, ептыж ­мэхъу. Лей хъуа и тхылъыжьхэр тыкуэным тыгъэу къезытхэри мащIэкъым. Нэхъыщхьэращи, КIуэкIуэ ­Мурат нэIуасэ къыхуэхъуа и псэлъэ­гъухэм уахэплъа иужь, цIыхуфIхэр зэрынэхъыбэри, щIыналъэм щIэблэ хъарзынэ къызэрыщIэтаджэри уи нэкIэ уолъагъу.
Мы тыкуэным тхылъ игуэшкIэрэ псапэ къэзыхьыну хуейхэми Iэмал ­хъарзынэ ярет. Абы хуэгъэпсащ «тхылъ кIэрыщIахэр» зыфIаща гу­пыжыр. Щхьэж игуэ­шыну зыхуей тхылъ­хэр къещэхури, ехъуэп­сам пщIэншэу къищтэн хуэдэу, тыкуэным абыхэм щыхухаха щIыпIэм деж ­къыщегъанэ.
Тхылъ дэлъхьэхэр, ди щIыпIэм и щэнхабзэр къызыхэщ открыткэхэр, къинэ­мыщI тхылъымпIэхэкI гурыхьхэр ядэ­щIыбгъу мэхъу фIыуэ плъа­гъухэм унэм укъыщIэмыкIыу яхуэп­щIы­фыну тхылъ тыгъэхэм.
«Къэвгъуэтащ фызэлIэлIэн», «мы­хьэн зиIэ гуэр сыту фигу къэ­мы­кIарэ» жаIэурэ, Iуэхум Iуагъэщтыну Iэ­джэми зыкърапщыта щхьэкIэ, тхылъ тыкуэн­тетым зыкъызэриумысымкIэ, ар зыпэ­ры­хьа Iуэхум кIуэ пэтми нэхъ дехьэх. Псом хуэмыдэу, абы и щхьэу­сыгъуэкIэ зыкъыпызыщIэ цIыху гъэ­щIэгъуэнхэм. Иджы Мурат телег­рамкIэ зэджэ цIыхубэ зэпыщIапIэм и тыкуэным и цIэр зезыхьэ напэкIуэцI къыщызэIуихауэ, абы Iэ щIэ­зыдзахэр тхылъхэм щытре­гъэп­­сэ­лъыхь.
«Ди гуапэ мэхъу ди тыкуэныр ­Мэзкуу, Сочэ, Осетием, Адыгэ республикэм, КъШР-м къратхыкIыурэ зыкъызэрыхуа­гъазэр, - къыддо­гуашэ Мурат и ехъу­лIэныгъэхэмкIэ. - Щхьэхуэу дащогуфIыкI тхылъым и хьэтыр зылъагъу Бахъ­сэн щыщ ­къалэдэсхэм».
Дэри щIалэфIым «афэрым» жыдоIэ.