Къабарты-Малкъар къырал аграр университетде озгъан ыйыкъны ахыр кюнлеринде «Алтын кюз арты» деген тёрели кёрмюч болгъанды.
Анга жыйырмадан артыкъ эл мюлк эмда агропредприятие къатышхандыла, аграрий алимле уа илму жетишимлерин туура этгендиле.
Быйылгъы кёрмюч инновациялы проектлени «Ёсюмню энергиясы» деген Регионла аралы жаш тёлю форумну чеклеринде къуралгъан эди, деп билдиргендиле вуздан. Университет аны Жаш тёлюню ишлери жаны бла федерал агентствону (Росмолодёжь) грант болушлугъуну хайыры бла бардыргъанды. Форумну баш мураты - жаш тёлюню ахшы башламчылыкъларына себеплик этиудю, ёсюп келген тёлюню фахму кючюн илму-техника сферагъа бурууду, жаш алимлени биригиуюн къурауду.
Кёрмюч башланырны аллында жыйылгъанла Керчьде бушуулу ишде жоюлгъанланы бир минут шош сюелип эсгергендиле. Ызы бла университетни ректору Аслан Апажев къонакъланы алгъышлагъанды. Россейни ара шахарында алгъаракълада ётген «Алтын кюз арты - 2018» кёрмючде илму проектлерин кёргюзтюп, анда майдаллагъа тийишли болгъанлагъа саугъаларын къолларына тутдургъанды эмда дипломла бергенди.
Университетни баш мекямыны аллында къуралгъан кёрмюч бек бай болгъанды дерчады. Къонакълагъа тахта кёгетле, жемишле, тюрлю-тюрлю консервала эмда ашарыкъла кёргюзтгендиле. Ары келгенлени барын да татлы суула эм локъумла бла сыйлагъандыла.
Кёп белгили агрофирмала эм компанияла бла бирге бу ишге талай гитче иели мюлкле да къатышхандыла. Аланы арасында сютню жарашдырыу, андан аш-азыкъла хазырлау бла кюрешген Лана Кочесокованы стендине, аны кесини да иш кёллюлюгюне къонакъла бийик багъа бергендиле.
Алай бла бу жолгъу кёрмюч КъМКъАУ-да алгъын жылладан байлыгъы, кенглиги бла бир да артха къалмай, къууанч халда, жарыкъ ётгенди.
