КъМР-ни Башчысыны къуллугъун болжаллы халда толтургъан Казбек Коков республиканы Парламентини президиуму эмда депутат фракцияланы таматалары бла тюбешгенди. Регионну оноучусу депутатлагъа къыйматлы ишлегенлери, толтуруучу власть органла бла  бирге ишлеуню тап къурагъанлары ючюн жюрек ыразылыгъын билдиргенди. Халкъны жашауун игилендириу бла байламлы борчланы бютюн тынгылы толтурур ючюн арада байламлыкъланы кючлендире барыргъа кереклисин  айырып айтханды.
Ушакъны кезиуюнде республиканы жамауатыны болумун, къууумларын, оюмун билип, сурап туруу - экономикада бла социал сферада белгиленнген кёрюмдюлеге жетиуню  баш жолларындан бирине саналгъанды.
-Къабарты-Малкъарны айныуун андан ары тутхучлу бардырыр, дайым да алгъа атлар ючюн,-дегенди Коков,- адамлагъа тынгылай билирге, аланы эшитирге, сейирлерине, жарсыуларына, сурамларына эс бурургъа, алагъа кёре  тийишли мадарла этерге, ишни заманны излемлерине кёре къураргъа керекди.
Тюбешиуню кезиуюнде КъМР-ни Парламентини Председатели Татьяна Егорова, парламент фракцияланы таматалары: «Единая Россиядан» Михаил Афашагов, «Жашилледен» Сафарби Шхагапсоев, «Справедливая Россиядан» Светлана Азикова, «ЛДПР»-ден Валерий Гриневич, «КПРФ»-ден Борис Паштов сёлешгендиле.