22 сентября, 2020 - 07:12
ФокIадэм и 11-м «Черкесский язык и трансформация квадрата Малевича» фIэщыгъэм щIэту сурэтыщI Iэзэ Црым Руслан и IэдакъэщIэкIхэм я гъэлъэгъуэныгъэ Налшык къыщызэIуахащ.
Нэхъ ипэкIэ тлъэгъуа гъэлъэгъуэныгъэхэм мыр куэдкIэ къазэрыщхьэщыкIыр гурыIуэгъуэ ищIырт ар къыщызрагъэпэща щIыпIэм. Куэд щIауэ ябгынэжа «Победа» киногъэлъэгъуапIэм Црымым псэ хилъхьэжат а махуэм (щIыпIэр гъэлъэгъуэныгъэм и хьэтыркIэ къызэIуахат). ЗэрытщIэщи, Малевич и «Черный квадрат» сурэт цIэрыIуэр «Победа над Солнцем» спектакль-оперэм хуищIа декорацэхэм щыщщ. Аращ Црымым и гъэлъэгъуэныгъэр «Победа» киногъэлъэгъуапIэм утыку къыщрихьэну щIытегушхуам и щхьэусыгъуэр.
Руслан и IуэхущIафIэкIи лэжьыгъэкIи адыгэ сурэтыщIу зэрыщытым куэд щыгъуазэщ. Иджырей IэдакъэщIэкIхэри абы и щыхьэтщ. Гъэлъэгъуэныгъэм хыхьа сурэт 46-р адыгэ макъхэм я сурэтщ. Макъ къэс езым и сурэт, и къэIуэтэкIэ дегъэлъагъу Руслан.
Сурэтхэм ябгъурыт штрих-кодхэм телефонкIэ сурэт тепхмэ, макъыр щылажьэ псалъэхэр, абыхэм я къэIукIэр къыбжеIэ.
Црым Руслан гъэлъэгъуэныгъэр къыщызэIуихым къыдэIэпыкъуа псоми фIыщIэ яхуищIри, сурэт-хэм я гупсысэр Бер Хьикмэт и «Макъыбзэ» тхылъым къигъэушауэ, илъэс куэд щIауэ зэрелэжьыр къыхигъэщащ. Адыгэбзэм хуиIэ еплъыкIэр щIэныгъэлIым ей мыхъуу, сурэтыщI бгъэдыхьэкIэу зэрыщытыр жиIащ Црымым.
Адыгэбзэм и макъ къэс мыхьэнэ иIэу къэзылъытэр мащIэкъым, ар бзэм и зэхэлъыкIэр зыщIэ дэтхэнэми къыбжиIэфынущ. Гъуазджэм и плъыфэхэмрэ бзэм и щIагъыбзэмрэ екIуу щызэхэухуэна мы гъэлъэгъуэныгъэм гупсысэм щиIутIыжт. Руслан и плъыфэхэмрэ дамыгъэхэмрэ «къопсалъэ», зыхэщIыкI гуэр пхэлърэ адыгэбзэр пIурылъмэ, ар «зыхыумыхынкIэ» Iэмал иIэкъым. Сурэт къэс, макъ къэси хуэдэу, гупсысэм и псыкъуий лъащIэншэм уеIэ- бых хуэдэщ…
Гупсысэхэр нэхъри кърагъэблырт а гъэлъэгъуэныгъэм къеблэгъахэу Апэпш Бибарсрэ ХьэцIыкIу Баширрэ ягъэзащIэ пасэрей уэрэдыжьхэм.
Црымым и IэдакъэщIэкIхэм, дауи, хужаIэнур мащIэкъым, ауэ сэркIэ мы лэжьыгъэхэр адыгэбзэм, лъэпкъ гъуазджэм, щэнхабзэм ипэкIэ яча лъэбакъуэ дахэщи, Тхьэм иригъэфIакIуэ!