Бабугентни бла Бызынгыны арасында жолгъа тынгылы ремонт этиу андан ары барады. Бу кюнлеге подряд организацияны ишчилери аны 7,7 километр кесегинде эки къатлы асфальт жайып бошагъандыла. Дагъыда суу ашамазча жолну жанларын кючлендиргендиле, юсюне тёшледен таш тюшмезча габион конструкцияла да тизгендиле. Аны юсюнден бизге КъМР-ни Транспорт эмда жол мюлк министерствосундан билдиргендиле.
Жол тау тийреледе баргъаны ючюн аны машиналаны чархлары игирек илинирча чыдамлыракъ, суу да юсюнде турмазча этедиле. Аны хайырындан ол аслам заманны тозурамай турлукъду, дейдиле специалистле. Шёндю аны жанларын тапландырыу эмда белгиле орнатыу иш барады. Аны бла реконструкцияны ахыргъы кезиую жетгенди дерге боллукъду.
Эсигизге сала айтсакъ, бу объектни жангыртыу «Къоркъуусузлу эмда качестволу автомашина жолла» деген миллет проектге кёре, кеси да экиге бёлюнюп алай барады. Аны биринчи кесеги былтыр тамамланнганды. Ол кезиуде 4,6 километрлик участкасында мадар этилгенди. Быйыл а къалгъан 7,7 километр кесеги жангыртылып бошала турады.