Гуапэ зэрыхъущи, ди республикэм ­хъарзынэу щолажьэ УФ-м и Президентым илъэс зыбжанэ ипэкIэ къыхилъ­хьауэ щыта лъэпкъ проект зэмылIэу­жьыгъуэхэр. Абыхэм ящыщу гулъытэ хэха егъуэт «Егъэджэныгъэ» къэралпсо проектым къыщыгъэлъэгъуа Iуэхугъуэ­хэм, проектым и унэтIыныгъэ зэмы­лIэу­жьыгъуэхэм. Абыхэм ящыщщ «Зыу­жьы­ныгъэм и къежьапIэ» («Точка роста») центрхэр ди щIыналъэм къыщы­зэIухыныр.

Къэралпсо проектым хыхьэ «Иджы­рей школ» федеральнэ проектым къигъэув Iуэхугъуэхэм ящыщщ «Зыужьыныгъэм и къежьапIэ» центрхэр. ЩIэблэм бжыгъэр зи лъабжьэ, гуманитар щIэ­ныгъэ етыным хуэунэтIа а егъэджэныгъэ IэмалыщIэр ди щIыналъэми щолажьэ иджы. ФокIадэм и пэщIэдзэм апхуэдэ центр къыщызэIуахащ Шэрэдж районым хыхьэ Балъкъэр Ипщэ жылэм дэт курыт школ №2-м. Абы теухуа гуфIэгъуэ зэIущIэм хэтащ КъБР-м ЦIыхухэр егъэ­джэ­нымкIэ, щIэныгъэмрэ щIалэгъуалэм я IуэхухэмкIэ и министерствэм, егъэджэ­ныгъэмкIэ щIыпIэ IэнатIэм я IэщIагъэлI­хэр, щIыналъэм и курыт школхэм я унафэщIхэр, еджакIуэхэр.
- «Зыужьыныгъэм и къежьапIэ» центрхэм я къалэн нэхъыщхьэр ныбжьыщIэхэм ябгъэдэлъ щIэныгъэм и фIагъым хэгъэхъуэнырщ. Апхуэдэу а IэнатIэхэм хэп­щIыкIыу ирагъэфIэкIуэнущ ар зэпха еджапIэхэм я мылъку-техникэ лъабжьэр, - жиIащ зэхуэсым къыщыпсэлъа Мыз ­Маринэ, КъБР-м ЦIыхухэр егъэджэнымкIэ, щIэныгъэмрэ щIалэгъуалэм я Iуэху­хэмкIэ и министерствэм и къудамэм и унафэщIым. - Центрхэм щеджэну школа­кIуэхэм Iэмал яIэнущ технологие лъагэхэр хуиту лэжьыгъэм къыщагъэсэбэпыну.
Лэжьэн щIэзыдза IэнатIэм ныбжьы­щIэхэм я щIэныгъэр щрагъэфIэкIуэнущ «Технологие», «Информатикэ», «ОБЖ» предметхэмкIэ. Апхуэдэу егъэджэныгъэм къыхыхьэнущ IT-технологиемкIэ, медиатворчествэмкIэ, шахматхэмкIэ, проект лэжьыгъэ зэмылIэужьыгъуэхэмкIэ унэ­тIы­ныгъэхэр. Псори зэхэту центрым программэм и лейуэ щIэныгъэ гуэдзэн щызрагъэгъуэтыфынущ еджакIуэ 300-м щIигъум. Абы къыдэкIуэну фIагъхэм ящыщщ ныбжьыщIэхэм ябгъэдэлъ зэфIэкIхэр нэхъ наIуэ зэрыхъунури, сабий зэчиифIэ­хэм нэхъ ядэлажьэгъуафIэу къызэ­ры­щIэкIынури.
Зэхуэсым зэрыщыжаIамкIэ, дызэрыт мазэм къриубыдэу ди республикэм иджыри къыщызэIуахынущ «Зыужьыныгъэм и къежьапIэу» 42-рэ.