Нальчикде Арсений Головкону атын жюрютген орамда белгили адмиралны эсгертмеси ачылгъанды. Къууанчлы ишге республиканы Башчысы Казбек Коков, Парламентни эмда Правительствону председательлери, жамауат организацияланы эмда власть органланы келечилери, шахарчыла да къатышхандыла. Сыйлы къонакъланы санында Головкону къызы эмда туудугъу да бар эдиле.
Казбек Валерьевич хурметли адмиралны жашау жолуну, шимал флотну айныууна, къыралны къоркъуусузлугъун кючлендириуге ол нечик уллу къыйын салгъанын белгилегенди. Аны аты аталгъан орамда орнатылгъан эсгертме айтхылы аскерчини жигитлигини, Уллу Хорламны жуукълашдырыргъа этген къошумчулугъуну белгиси боллукъду, дегенди.
- Аныча адамларыбыз жанларын аямай фашизмни ууатхандыла, бизге – жангы тёлюлеге - мамыр жашауу этер онг бергендиле. Айтхылы жерлешибизни, деменгили къыралыбызны белгили адамларыны жигитликлерини юсюнден унутмай, аны юсюнден ызыбыздан келген тёлюлеге да билдирирге борчлубуз, - деп къошханды республикабызны таматасы.
Дагъыда эсгертмени орнатыу эмда аны тёгерегинде ариу сквер къурау ишни башлагъанлагъа, аны барын да къысха заманны ичинде тындыргъанлагъа да ыразылыгъын билдиргенди.
«Жанынгы окъуна бер, алай Ата журтунгу уа къоруула» деген сёзлени Арсений Головкоча аллай жигит адамны юсюнден айтыргъа тийишлиди», - дегенди ызы бла сёлешген Башир Сокуров, отставкада биринчи ранглы капитан, КъМКъУ-ну ветеранларыны советини келечиси. Ол шимал флотда аскер къуллукъ этген кезиуюнде айтхылы жерлешибизни иш кёллюлюгюню, оноу эте, низамлыкъны тохташдыра билгенини юсюнден къаллай хапарла жюрюгенини юсюнден кёп шартла келтиргенди.
Адмиралны къызы Наталья Головко: «Быйыл 23 июньда – атамы туугъан кюнюнде - манга Москвагъа сёлешип, жууукъ кезиуде Нальчикде аны эсгертмеси ишленирикди дегенлеринде, ийнаннган окъуна этмеген эдим. Ким кюреширикди аллай ишле бла шёндю къоркъуулу пандемия баргъан кезиуде. Алай проектни башлагъанла кюн сайын суратла жиберип тебирегенлеринде уа, бек къууанама.
Бюгюн а мен къызым бла бу ариу шахарда, огъурлу жерде къонакъдама. Айтылгъанны бла этилгенни арасы алай къысха болур деп а ким сунар эди…
Бютюнда сейир неди десегиз, жезден ишленнген эсгертмени аллында ауурлугъу юч жюз килограмм болгъан (кемеде) сынжыргъа тагъылгъан темир ыргъакъ. Айтханларына кёре, аны Кронштадта мажарып келтиргендиле бери. Бек уллу къыйын салгъансыз, сау болугъуз», - дегенди.
Ызы бла Казбек Коков Наталья Головко бла эсгертмени ачхандыла. Ала бла бирге бирсиле да аны аллына гюлле салгъандыла эм суратха тюшгендиле.
