«Мэшыкъуэ»-2020
Кавказ Ищхъэрэм и щIалэгъуалэр хабзэ хъуауэ щызэхуэс «Мэшыкъуэ» форумым иджыблагъэ и хьэщIащ Урысей Федерацэм ЩIэныгъэмрэ цIыхухэм щIэныгъэ нэхъыщхьэ егъэгъуэтынымкIэ и министерствэм ЩIалэгъуалэ политикэмкIэ и департаментым и унафэщI Аширов Денис.
ЗэIущIэм и пэщIэдзэм тепсэлъыхьащ пандемием и хабзэу дуней псор зытетым и лъэхъэнэм лэжьыгъэ къызэгъэпэщыкIэщIэм хуэкIуэн хуей зэрыхъуам, абы хэлъ щхьэхуэныгъэхэм.
Ашировым щIалэгъуалэм и гугъу яхуищIащ цIыхухэм щIэныгъэ егъэгъуэтыныр онлайн щIыкIэм тету къызэгъэпэщынымкIэ къагъэщхьэпа Iэмалхэм. Гугъуехь мымащIэ хэлъами, пIалъэ кIэщIым къриубыдэу а лэжьыгъэр зэтраухуэн яхузэфIэкIащ – еджапIэхэр мардэщIэм псынщIэу техьэфащ. Апхуэдэу щытми, Ашировым къыхигъэщащ цIыхухэр зэIущIэрэ я нэгу зэхуэгъэзауэ щызэпсалъэм деж зыхащIэр зыкIи зэрыпхузэмыхъуэкIынур, сабийхэр зэпэIэщIэу егъэджэныр Iэмалыншагъэм ущиувэм деж къэбгъэсэбэпыну аркъудейуи зэрыщытыр.
Апхуэдэу щытми, зи пIалъэ къащIа а лэжьэкIэр властым и орган, IуэхущIапIэ, жылагъуэ институт языныкъуэхэм къыщыбгъэсэбэп хъуну къилъытащ къэпсалъэм. Къапщтэмэ, бжыгъэр зи лъабжьэ лэжьэкIэр IэнатIэхэм щыхэпщэным щыхуэкIуэкIэ ар тегъэщIапIэ ящI зэрыхъунур, ар къэралым и зыужьыныгъэм и унэтIыныгъэхэм ящыщ зыуэ зэрыщытыр къыхигъэщащ Ашировым.
ЗэIущIэм гулъытэ хэха щыхуащIащ Урысейм щIалэгъуалэ политикэм зыщегъэужьыным ехьэлIа Iуэхухэм.
ХьэщIэм къызэрилъытэмкIэ, щIалэгъуалэм ехьэлIа политикэр зыхуэдэнур къэрал къулыкъущIэхэм яубзыхуу щымыту, атIэ езы ныбжьыщIэхэм къыхалъхьэ жэрдэмхэм ятещIыхьынырщ нэхъыфIыр.
- Дэ щIалэгъуалэм жаIэхэм дыщIодэIу, абыхэм къыхалъхьэхэм дыхоплъэ, зыдогъэуIури, ди лэжьыгъэр ахэр и лъабжьэу идогъэкIуэкI. Иджыпсту гъунэжу щыIэщ щIалэгъуалэ жылагъуэ советхэр, зэгухьэныгъэхэр икIи ахэр сэбэпышхуэ мэхъу къытщIэхъуэ щIэблэм я Iуэху еплъыкIэхэр, абыхэм нэхъ тэмэму къалъытэхэр къэрал унафэщIхэм я деж нэхьэсынымкIэ, - жиIащ Аширов Денис.
Абы къызэрилъытэмкIэ, а Iуэхум зезыгъэужьхэм ящыщщ щIалэгъуалэ зэхуэсышхуэхэр. Абыхэм я щапхъэ нэхъыфIхэм ящыщу хьэщIэм жиIащ «Мэшыкъуэ» зэхыхьэр, абы и макъыр лъэщу къызэрыIур. Апхуэдэ форумхэм сэбэпынагъыу къадэкIуэр щызэпкърихым, департаментым и унафэщIым къыхигъэщащ, псом япэрауэ, ахэр лэжьыгъэм ухэзышэ, абы утезыгъэгушхуэ лъабжьэу зэрыщытыр икIи уигу нэхъ дыхьэ Iуэхум зеппщытыну, къыхэпхыну хуитыныгъэ къузэратыр.
- Зэхуэс зэмылIэужьыгъуэхэм я фIыгъэкIэ ныбжьыщIэхэм унэтIыныгъэ нэхъ яфIэгъэщIэгъуэнхэр къыхахыф икIи заужьурэ ехъулIэныгъэхэр абыхэм щызыIэрагъэхьэ. Сэ езым зэрызгъэунэхуамкIэ, нэхъыбэм зеппщытыхукIэ, нэхъыбэм зыщыбогъэгъуазэ икIи уи гъащIэр зытебухуэну унэтIыныгъэр нэхъ къыхэхыгъуафIэ мэхъу, - жиIащ Ашировым.
Форумхэм къадэкIуэу, щIалэгъуалэ парламентхэри щытщ ныбжьыщIэхэм жылагъуэ-политикэ гъащIэм жыджэру хэтынымкIэ Iэмал щагъуэт щIыпIэу. НыбжьыщIэр политикэм хыхьэну и мурадмэ, ар абы хуэзышэ гъуэгу нэхъ кIэщIхэм ящыщщ. Апхуэдэ органхэм щылэжьам политикэм къыщыхуэщхьэпэну щIэныгъэ егъуэт, абы щекIуэкI лэжьыгъэм и пIалъэ зрегъащIэ, псом нэхърэ нэхъыщхьэращи, къэрал властым и ухуэкIэм, зэхэлъыкIэм нэсу щыгъуазэ мэхъу. ЗэIущIэм и кIэухым Аширов Денис къыхигъэщащ зыхуагъэувыж мурадхэм ялъэIэсынымкIэ къэралым нобэ щIалэгъуалэм IэмалыфIхэр зэраритыр.
- ЗэвгъэхъулIэну фызыхуейхэр фубзыхуи, тегушхуэныгъэ фхэлъу абыхэм фахуэкIуэ, фи къарум фIэкIа нэгъуэщIым фыщымыгугъыу. Проектхэр гъэзэщIэным яужь фыщиткIи зыщывмыгъэгъупщэу къэвгъэсэбэп къэралми, фи унагъуэхэми, хьэрычэт IэнатIэми къывит хэкIыпIэхэр. Зэи хуэмыдэжу ди зэманым щыкуэд дыдэщ апхуэдэ Iэмалхэр, - щIалэгъуалэм сэлам къащрихыжым апхуэдэ чэнджэщ къаритащ хьэщIэм.
