Былтыр студент отрядлагъа 60 жыл толгъанды. Ол кезиуге ала къыралда эм кёп санлы жаш тёлю организация деген даражагъа жетгендиле. Россейни студент отрядларыны ишлерини эм аланы айныу онгларыны юсюнден «Машук» Шимал-Кавказ жаш тёлю форумгъа къатышханлагъа «Россей студент отрядла» МООО-ну ара штабыны командири Михаил Киселёв хапарлагъанды.
- Студотрядлада тамата – ол жигит,тири инсанды (студент отрядны къауумунда ишлерге атланнган школчу неда студент). Мында студенчествону тёрели жорукълары ишлейдиле: билеклик, болушлукъ, бирлик. Жаш адамла, бир коллективге жыйылып, биринчи ахчаларын ишлейдиле, бирлешген жолоучулукъгъа тебирейдиле, - деп белгилегенди Михаил.
Организацияны къурамында иш 14 ызлыды. Алай болгъанлыкъгъа, терк-терк жангы проектле жаратыладыла, сёз ючюн, геолого-разведывательный, бухгалтер, IT-отрядла. Къымылдауну айныу онгларыны юсюнден айтханда, Киселёв бир ненча проектни белгилегенди, ала бла байламлы иш бюгюнлюкге башланыпды: студотрядлагъа экосистеманы жарашдырыу, къымылдауну жаш тёлю брендча къуралыуу эм тохташыуу.
Михаил Киселёвну айтыууна кёре, къымылдауну иши уллу кюч-къарыуну излейди эм аны мурдору жаш тёлюню кёлленип кюрешиуюдю. «1990-чы жыллада бизни къыйын кезиуюбюз эди, алай экономиканы айныгъаны бла отрядла да тиргизилгендиле: жаш адамла къурулушчула, проводникле, сабий лагерьледе вожатыйле болуп, урунуп башлагъандыла. 2020 жылда жангы жарсыу чыкъгъанды – ишчи жерлени жетишмегени, былтыр бла тенглешдиргенде, ол жаны бла кёрюмдю 4 кереге азайгъанды. Эндиги жылда болум тюзелирча къолдан келгенни этебиз», - деп ышандыргъанды къонакъ ол тюбешиуде.
Организация Беларусь, Къыргъызстан, Эрмен, Азербайджан, Тюрк бла халкъла аралы байламлыкъланы тири къурайды. Энди тыш къыраллы гражданланы ишге тохташдырыргъа онг бериуню юсюнден законодательствода тюрлениуле бла байламлы бирси къыралла бла байламлыкъла жюрютюу бютюн тири боллукълары да белгиленнгенди ушакъда.