Урысейпсо цIыхубэ фронтым (ОНФ) и «Равные возможности - детям» проектым хыхьэу, Къэбэрдей-Балъкъэрым и волонтёрхэм ныбжьыщIэхэмрэ гупыж зиIэ балигъхэмрэ хуагъасэ дыщэидэ, дыщэкI, IэпэIэсагъэм ехьэлIа пасэрей IэщIагъэ дахэхэм. ЩIэблэр а унэтIыныгъэхэм хэгъэгъуэзэным теухуа мастер-класс гъэщIэгъуэнхэр махуищкIэ ирагъэкIуэкIащ. Абы жыджэру хэтащ зи ныбжькIэ зэщхьэщыха пщащэхэр.
ЦIыхуиблым щыщIэдзауэ пщIым нэблагъэу къызэрагъэпэща ныбжьыщIэ гупхэм ядэлэжьащ КIэбышэ Алинэрэ Къущхьэ Iэсиятрэ. ПщIэншэу къызэрагъэпэща дерсхэм ятеухуа хъыбархэр интернетым щызэбграгъэкIащ, гукъыдэж зиIэ псори IэпэIэсагъэм хэзыгъэгъуазэ Iуэхугъуэхэм екIуэлIэну Iэмал яIэн папщIэ.
А зэхыхьэхэм я щхьэусыгъуэ нэхъыщхьэ хъуар хъыджэбзхэм зэрызагъэдахэ цIугъэнэхэмрэ хьэпшып цIыкIуфэкIухэмрэ езыр-езыру ящIыфу, дыщэидэ, уагъэ, хэдыкI IэпэIэсэ IэщIагъэхэр зрагъэщIэну зэрыщIэхъуэпсырщ. Бзылъхугъэхэм зэрызагъэдахэ цIугъэнэ зэмылIэужьыгъуэхэр гъущIым къыхэIущIыкIыным ехьэлIа дэтхэнэ зы художественнэ дерсри сыхьэтищым щыщIэдзауэ тхум нэблагъэкIэ екIуэкIащ, дыщэидэм хухахахэми хуэдэу. А зэхуэсхэм пщащэхэм щIэ куэд къыщащIащ.
Иужьрей мастер-классхэр езыгъэкIуэкIар проектым и волонтёр Къущхьэ Iэсиятщ. Абы зэрыжиIамкIэ, щIыналъэм ис щIалэгъуалэр лъэпкъхэм къадекIуэкI дыщэидэ IэщIагъэм куэд щIауэ дахьэх икIи а IэпэIэсагъэм республикэм исхэр хэгъэгъуэзэныр, абы зыщрагъэужьыныр щхьэпэу къалъытэ. Аращ унэтIыныгъэ зэмылIэужьыгъуэхэмкIэ мастер-классхэр иджыри къызэрагъэпэщыну щIаубзыхуар. Апхуэдэ дерсхэр зыфIэгъэщIэгъуэну екIуэлIа дэтхэнэми ехъулIэныгъэхэр зыIэрагъэхьащ. Псом хуэмыдэу ахэр къахуэсэбэпынущ а пасэрей IэщIагъэхэм хуеджэну зи мурадхэм.
КъищынэмыщIауэ, Урысейпсо цIыхубэ фронтым (ОНФ) и «Равные возможности - детям» проектым хыхьэу, Къэбэрдей-Балъкъэрым и волонтёр жыджэр-хэм жьакIуагъэмкIэ мастер-класс къыхузэрагъэпэщащ Налшык къалэм и гимназие №4-м и гъэмахуэ лагерым зыщызыгъэпсэху ныбжьыщIэхэм.
Зэхыхьэр ирагъэкIуэкIащ 2 - 8 классхэм щIэс еджакIуэхэм папщIэ. Абы къриубыдэу ныбжьыщIэхэр Iуэху зэIумыбз зэмылIэужьыгъуэхэм «хэхуащ» икIи дипломат Iэмалыр къагъэсэбэпурэ хэкIыпIэхэр къагъуэтащ. Апхуэдэт цIыху акъылыфIэхэм я жыIэгъуэхэр зэпкърыхыныр, театр теплъэгъуэ гъэщIэгъуэнхэм щыджэгуныр, жьакIуагъэмкIэ и лъабжьэхэм зыхэгъэгъуэзэныр.
НыбжьыщIэхэм къыхузэIуахащ жьакIуагъэм и щэхухэр - цIыху гупым я пащхьэм умышынэу икIи зэхуэсахэр уи псалъэхэм дахьэхыу укъызэрыщыпсэлъэну Iэмалхэр. Лъэпкъ зэмылIэужьыгъуэу 25-м ящыщ еджакIуэхэр зэкIуалIэ гимназием щынэхъыщхьэу къагъэлъэгъуар ныбжьыщIэхэм яку ныбжьэгъугъэрэ зэгурыIуэрэ дэлъу къызэдекIуэкIынырщ.
Дерсхэр езыгъэкIуэкIахэм къыхагъэщащ пэщIэдзэ, курыт классхэм екIуалIэхэм щIэныгъэр занщIэу «зыщIашэ» икIи жьакIуагъэм хуеджа ныбжьыщIэхэм класс нэхъыжьхэм ар IэщIагъэ ящIыну мурад ящIмэ, къахуэщхьэпэжынущ.
НыбжьыщIэхэм дерсхэр щIэщыгъуэ ящыхъуащ, псалъэухахэм я къэпсэлъыкIэр егъэфIэкIуэным, цIыхухэм я пащхьэм къыщыпсэлъэным ехьэлIа лэжьыгъэхэр яфIэгъэщIэгъуэну ирагъэкIуэкIащ.
Фигу къэдгъэкIыжынщи, Урысейпсо цIыхубэ фронтым и «Равные возможности - детям» проектыр 2017 гъэм и гъатхэпэ мазэм къыхалъхьащ, гупжьей зэмылIэужьыгъуэхэм екIуэлIэну дэтхэнэ зы сабийми Iэмал иIэн папщIэ. КъыжыIапхъэщ, ар гъэзэщIэным къэралым и щIыналъэ псоми иджыри зэрыщыпащэр икIи абы хыхьэу еджакIуэхэр республикэм и IуэхущIапIэхэм яшэну, творческэ мастер-классхэр, прикладной гъуазджэм и IэпщIэлъапщIэхэм я зэIущIэхэр къыхузэрагъэпэщыну зэраубзыхуар.