Урысей гвардием Къэбэрдей-Балъкъэрым щиIэ къудамэм Налшык къалэ ведомствэм щIэмыт и хъумакIуэ IэнатIэм и унафэщIым и къалэнхэр пIалъэкIэ зыгъэзащIэ, полицэм и полковник КIарэ Заур шыщхьэуIум и 22-м къулыкъум пэрыхьэну гуп щхьэхуэр щигъэгъуэзащ а махуэм ягъэлъапIэ Урысей Федерацэм и къэрал ныпым теухуауэ Конституцэм къыщыгъэлъэгъуам.
Офицер нэхъыщхьэм я лэжьакIуэхэм ягуригъэIуащ плъыфищу зэхэт Урысейм и ныпым и мыхьэнэр, апхуэдэуи ягу къигъэкIыжащ хабзэр къызэпызыуду ар къэзыгъэсэбэпхэм УФ-м и законхэм къызэрыщыгъэлъэгъуам тету жэуап зэрихьынур.
- Къэралыгъуэм и сыт хуэдэ махуэшхуэри мыхьэнэ ин зиIэщ, лIыгъэм, Хэкум худиIэ пэжыгъэмрэ фIылъагъуныгъэмрэ я нэщэнэщ, лъэпкъхэм и псэкупсэ къарумрэ зэкъуэтыныгъэмрэ я лъабжьэщ. Апхуэдэ махуэшхуэхэм къэралымкIэ диIэ гушхуэныгъэм хегъахъуэ, Урысейм и къэкIуэнум фIыкIэ дыхуегъаплъэ. УФ-м и къэрал ныпым и махуэм къуаншагъэ зезыхьэхэм, хабзэр къызэпызыудхэм екIурабгъуншэу фахущыт, хэкупсэ гурыщIэхэр фымыгъэпщкIуу хэкум и дамыгъэ лъапIэхэм пщIэ зэрахуэщIыпхъэм и щапхъэ къэвгъэлъагъуэ, - захуигъэзащ Урысей гвардием къулыкъу щызыщIэхэм КIарэ Заур.