Гъунапкъэм йокIуэлIапэ

Дызэрыщыгъуазэщи, Совет Союзыр лъэлъэжа иужькIэ, Кавказ Шытх Нэхъыщхьэм хыхьэ лъагапIэхэм зэрыдэкI лъагъуэхэм ярикIуэныр альпинистхэм щрагъэгъэтауэ щытащ. Иджы мис, абыхэм ящыщу 40-м нэблагъэр ди республикэм къыщызэIуахыжащ. А Iуэхугъуэр къыхигъэщащ КъБР-м туриз­мэмкIэ и министр ЩоджэнцIыкIу Мурат, иджыблагъэ иригъэкIуэкIа пресс-конференцым къыщы­псалъэм.
-Урысей Федерацэмрэ Куржымрэ къуршылъэхэмкIэ щаIэ я гъунапкъэм метри 100-м къриубыдэу ди лъэныкъуэмкIэ декIуэкI щIыпIэ зызыукъуэдиям цIыху ирамыгъэхьэжу къызэраублэрэ илъэс пщIы бжыгъэхэр блэкIат. АтIэми, абдежхэрат здэщыIэр Кавказ Шытх Нэхъыщхьэм къедза бгыщхьэ аранэ нэхъ цIэрыIуэ дыдэхэр. Ауэ щыхъукIи, ди республикэм и къуршылъэ щIыпIэхэм щызэхэзекIуэу щыта альпинистхэм я нэхъыбапIэм ди гъунэгъу КуржымкIэ зрагъэзэкIын хуей хъуат. Иджы мис, Урысей Федерацэм и ФСБ-м деж къыщызэIуаха гъунапкъэхъумэ IуэхущIапIэм Къэбэрдей-Балъкъэрым щиIэ и къудамэмрэ УФ-м альпиниз­мэмкIэ и федерацэмрэ я лIыкIуэхэр къытхэту, зэхэтша гупым щыщхэр щыхэплъэжым, къуршхэм я нэхъ папцIапIэ дыдэхэм (аранэхэм) яхуэкIуэ лъагъуэжьхэм ящыщу 60-м нэблагъэр альпинистхэмрэ туристхэмрэ къахуэдгъэунэхуж зэрыхъунур наIуэ къэхъуащ. АрщхьэкIэ, а псори зэгъэпэ­щыжыным зы илъэсым ­къриубыдэу дызэрыпэмылъэщынур нэрылъагъути, мурад тщIащ абыхэм ящыщу 39-р мы гъэм къызэIутхыжыну, - щыжиIащ и пэублэ псалъэм ЩоджэнцIыкIу ­Мурат.
УФ-м альпинизмэмкIэ и федерацэм и вице-президент Душарин Иван къызэрыхигъэщамкIэ, лъагъуэхэр зэ­рызэхуащIыжауэ щытам и зэран зэкIар альпинизмэм и закъуэкъым, атIэ Къэбэрдей-Балъкъэрым и экономикэми хэщIыныгъэ инхэр иритащ, къуршхэм зыщызыгъэпсэхун мурадкIэ ди республикэм къихьэу щытахэм я нэхъыбапIэр нэ­гъуэщI щIыналъэхэмкIэ «еплъэкIын» хуей зэры­хъуам къыхэкIыу.
Урысей Федерацэм и ФСБ-м деж къыщызэIуаха гъунапкъэхъумэ IуэхущIапIэм Къэбэрдей-Балъкъэрым щи­Iэ и къудамэм и унафэщIым и къалэнхэр пIалъэкIэ зыгъэзащIэ Бобров Дмитрий зэрыжиIэмкIэ, лъагъуэжь­хэм ящыщу 39-р къызэрызэIуахыжрэ куэд дэмыкIами, альпинист 30-м ­щIи­гъум ­иратащ Кавказ Шытх Нэхъыщхьэм и лъагапIэхэм нэсыну ­хуиты­ныгъэ зэраIэмкIэ тхылъхэр.
- Япэу зыкъытхуэзыгъэзахэм къыхаха лъагъуэхэр Джанги-Тау, Къуэ­кIыпIэмкIэ щыIэ Щхъэрэ, Ляльвер, Шхельдэ, Щуровскэм и аранэ лъагапIэхэращ зыкIэрыхьэр. Ауэ щыхъукIи, дэ къызэрытлъытэмкIэ, мы гъэм ­кърикIуэнум дигъэлъагъунущ къэдгъэунэхужа зекIуапIэхэм ящыщу дэтхэнэм нэхъ щIэупщIэ иIэнуми, мыхьэнэ ин зимыIэу къыщIидзыжынури. АтIэми къыжыIапхъэщ, къэрал гъунапкъэм и гъунэгъуу къызэIутхыжа лъагъуэхэм ярикIуэным, ди гуапэ зэрыхъущи, турист къызэрыгуэкIхэри зэрыдихьэхыр. Апхуэдэу, абыхэм ящыщу, бадзэуэгъуэм - цIыху мин ­16-м щIигъум, дызэрыт мазэм зэрыщIи­дзэрэ - мин 20-м нэблагъэм зи гугъу тщIы бгылъэ щIыпIэхэм зыщагъэпсэхуну хуитыныгъэ зэраIэмкIэ тхылъхэр яIэрыдгъэхьащ. ЩIыгъу­жыпхъэщ, бгъэдыхьэпIэ зыхуагъуэтыжа лъагапIэхэм я лъабжьэм щIэта альплагерхэу «Безенги», «Шхельда», «Уллу-Тау» зи фIэщыгъэхэм лэжьэн зэрырагъэжьэжари, - къыхигъэщащ Бобров Дмитрий.

КЪУМАХУЭ Аслъэн.

Поделиться:

ЧИТАТЬ ТАКЖЕ:

28.03.2024 - 09:03

АДЫГЭХЭМ Я КЪЕЖЬАПIЭР

   ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ.

28.03.2024 - 09:03

КАСПИЙСК ЩЫЗОХЬЭЗОХУЭ

Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм.

27.03.2024 - 13:58

БИЙМ ЗЫ ГУПУ ПЭЩIИГЪЭУВАТ

Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I

27.03.2024 - 12:25

ДУНЕЙПСО ЗЭХЬЭЗЭХУЭР Я ПЛЪАПIЭУ

Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх

27.03.2024 - 09:03

СИ ЖЭНЭТ

(ГъащIэ теплъэгъуэ)