Къэбэрдей-Балъкъэрым и Iэтащхьэ КIуэкIуэ Казбек шыщхьэуIум и 19-м иригъэкIуэкIащ КъБР-м и Правительствэм, муниципальнэ щIыналъэхэм, къалэ округхэм я администрацэхэм я унафэщIхэр зыхэта зэIущIэ. Абы кърихьэлIащ «Росреестр»-м КъБР-м щиIэ Управленэм и унафэщI Дмитриев Виталий.
ЗэIущIэм япэщIыкIэ щыхэплъащ Урысей Федерацэм и щIыналъэхэм хьэрычэт Iуэху щегъэкIуэкIыныр нэхъ тынш щыщIыным хуэунэтIауэ яубзыхуахэр зэрагъэзащIэм, мылъку зиIэхэм инвестицэхэр республикэм къыхегъэлъхьэным тегъэгушхуэным ехьэлIа Iуэхухэм. Абы теухуауэ къэпсэлъащ «Росреестр»-м КъБР-м щиIэ Управленэм и унафэщI Дмитриев Виталий.
ЗэIущIэм къыщыхагъэщащ «Росреестр»-м КъБР-м щиIэ Управленэмрэ муниципальнэ щIыналъэхэм, къалэ округхэм я администрацэхэмрэ республикэм щыпсэухэм Iуэхутхьэбзэ яхуэщIэн и лъэныкъуэкIэ нэхъ быдэу зэпыщIауэ зэдэлэжьэн зэрыхуейр.
ЦIыхухэм щIэныгъэ щрагъэгъуэт IуэхущIапIэхэр гъэ еджэгъуэщIэм зэрыхуагъэхьэзырым, 2020 гъэм фокIадэм и 1-м ЩIэныгъэхэм я махуэр зэрырагъэкIуэкIыну щIыкIэм теухуауэ видеозэIущIэм къы-щыпсэлъащ КъБР-м цIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министрым и къалэнхэр зыгъэзащIэ Езауэ Анзор.
Министерствэм и унафэщIым жиIащ республикэм цIыхухэм щIэныгъэ щрагъэгъуэт и IуэхущIапIэхэр гъэ еджэгъуэщIэм хуэгъэхьэзырыным ехьэлIа лэжьыгъэхэр зэрынагъэблэгъар. Псалъэм папщIэ, къуажэ школхэм ящыщу 18-м спорт залхэр зэгъэпэщыжын щаух, апхуэдэуи бжыгъэр зи лъабжьэ, гуманитарнэ унэтIыныгъэхэмкIэ щIэныгъэ щрат «Зыужьыныгъэм хуэзышэ лъагапIэ» центр 42-рэ къызэгъэпэщынри и кIэм нагъэсащ. ЕджапIэхэм щыщIадзащ тхылъхэр пщIэншэу тыным. Дызэрыт илъэсым абы трагъэкIуэдэн папщIэ КъБР-м и бюджетым щыхухахащ сом мелуан 46,4-рэ.
КъБР-м щыщ егъэджакIуэ минитхум щIигъум фокIадэм и 1-м къыщыщIэдзауэ яIэрыхьэнущ классхэм я унафэщIу зэрыщытым папщIэ ират ахъшэм хущIагъуахэр. Абы текIуэдэну мылъкур Къэбэрдей-Балъкъэрым къыхуаутIыпщынущ 2020 - 2022 гъэхэм ятещIыхьа къэрал бюджетым щыщу. КъимыдэкIэ, 1 - 4-нэ классхэм кIуэ еджакIуэ мин 50-м щIигъур махуэ къэс ягъэшхэнущ къэуат зыщIэлъ ерыскъы пщтыркIэ.
Сабийхэр пщIэншэу гъэшхэныр къызэгъэпэщынымрэ класс унафэщIхэм я лэжьыгъэм пэкIуэр етынымрэ ехьэлIауэ къыкъуэкI упщIэ псоми щыхэплъэн папщIэ КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм и сайтым къыщызэIуахынущ «линэ пщтыр».
2020 гъэм фокIадэм и 1-м къыщыщIэдзауэ дыгъэгъазэм и 31 пщIондэ еджапIэхэмрэ сабий садхэмрэ щыпащэнущ эпидемием пэщIэтыным хуэгъэза лэжьыгъэхэм. Абы хохьэ дезинфекцэ зэращI IэмэпсымэхэмкIэ пэшхэр махуэ къэс ялъэщIыныр, хьэуам инфекцэр зэрыхагъэкъэбзыкIхэр къагъэсэбэпыныр, ерыскъыр зыгъэхьэзырхэмрэ ар сабий-хэм езытхэмрэ узыфэм зэрызыщахъумэ хабзэхэм ткIийуэ тетыныр.
ЩIэныгъэхэм я махуэм ехьэлIа дауэдапщэхэр ирагъэкIуэкIынущ санитар-эпидемиологие мардэхэм къызэрагъэувым тету. Егъэджэныгъэ IуэхущIапIэхэм ар къызэрыщызэрагъэпэщыну щIыкIэр щаубзыхунущ коронавирус уз зэрыцIалэм республикэм зыщемыгъэубгъуным хуэунэтIа Iуэхухэр зэкIэлъызыгъакIуэ Оперативнэ штабым и зи чэзу зэIущIэм.
КIуэкIуэ Казбек КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэмрэ администрацэхэм я унафэщIхэмрэ къалэн ящищIащ гъэ еджэгъуэщIэм зэрызыхуагъэхьэзыр щIыкIэм кIэлъыплъыну, абы зэпымыууэ я нэIэ трагъэтыну, егъэджакIуэхэмрэ адэ-анэхэмрэ быдэу япыщIауэ ядэлэжьэну, а Iуэхур еджапIэ щхьэхуэхэм щызэблэу къэхъумэ, ныкъусаныгъэхэр икIэщIыпIэкIэ зэрагъэзэкIуэжыным яужь итыну.
Лъэпкъ проектхэм щIыналъэр зэрыхэт и Iыхьэхэр муниципалитетхэм гъэзэщIа зэрыщыхъум, къыхуаутIыпща мылъкур къызэрагъэсэбэпым теухуауэ зэIущIэм къыщыпсэлъащ КъБР-м и Правительствэм и УнафэщI Мусуков Алий.
Лъэпкъ проектхэр КъБР-м и муниципальнэ щIыналъэхэм щыгъэзэщIэным трагъэкIуэдэн папщIэ къэрал, республи-кэ бюджетхэм мы илъэсым щыхухахащ сом мелард 1,2-рэ. ШыщхьэуIум и 18-м ирихьэлIэу а мылъкум и процент 56-р къагъэсэбэпакIэщ. И кIэм ноблагъэ муниципальнэ зэгурыIуэныгъэхэр зэщIылIэным ехьэлIа лэжьыгъэр.