Къабарты-Малкъарда Коронавирус инфекциядан сакъланыу эмда аны жайылыууна контроль этиу жаны бла оператив штабны шартларына кёре, республикада 17 августха бу жукъгъан ауруугъа жагъылгъанланы битеу саны 6239-гъа жетгенди. Бир сутканы ичинде андан 32 адам ауругъаны ачыкъланнганды, ёлген а болмагъанды. Вирус жайылып башлагъанлы ёлгенлени саны уа битеу да 75 адамгъа жетгенди.
Бир сутканы ичинде 41 адам сау болуп, юйюне къайтханды. Бу къоркъуулу ауруудан къутулгъанланы битеу саны 5857-ге жетгенди.
Саулай Россейде болумну юсюнден айтханда, ахыр суткада COVID-19 жангы коронавирус инфекциядан РФ-ни 83 регионунда 4 892 адам ауругъанды. Пандемия башланнганлы уа Россейде 32,7 миллион тест бардырылгъанды, бу вирусха битеу да 927 745 (+5%) адам жукъгъаны ачыкъланнганды, 736 101 адам сау болуп чыкъгъанды. Озгъан сутканы ичинде уа бу вирусдан 3133 саусуз къутулгъанды. Ёлгенле уа 15 740-гъа жетгендиле.
РФ-ни Коронавирус жаны бла оператив штабы ауругъанланы санына аз къошулгъан регионланы тизмесин басмалагъанды:
1. Ненецк автономный округ, Чукотка автоном округ - 0,0%
2. Москва область, Шимал Осетия, Чечен республикала - 0,2%
3. Москва, Тыва Республика, Камчат край, Къабарты-Малкъар Республика, Брянск, Смоленск, Тула областьла, Забайкал край - 0,3%.
Саулукъ сакълауну битеудуния организациясы (ВОЗ) COVID-19 ёлгенлени сылтауларындан бирин туура этгенди. Хауа не къадар кирли болса, коронавирусдан ауругъанланы арасында ёлгенле ол къадар кёп болгъанларына шагъатлыкъ этген шартла аслам бола барадыла.
Озгъан ыйыкъда Великобританияны Статистика жаны бла миллет службасы тинтиулерини эсеплерин басмалагъанды. Алагъа кёре, кирленнген хауада кёп тургъан саусузну ёлюрге къоркъууу 7 процентге кёбейеди. Аллай статьяла талай къыралда да басмаланнгандыла. "Бу жангы жукъгъан ауруу бизни ёпкелерибизден ёте эсе, аланы буза эсе, кирленнген хауа аланы бютюн къарыусуз этгени баямды»,-дегенди ВОЗ-ну келечиси Нейра. Болсада бу шартны терен тинтирге керекди, ВОЗ битеу тинтиулени келишдириу бла кюрешеди, деп къошханды ол.
Аны бла бирге Саулукъ сакълауну битеудуния организациясыны келечиси хауаны кирлендирген сылтауланы билирге, аны тазалауну амалларын да излерге, ол санда энергияны аяулу хайырланыргъа, кондиционерлени, жылыу системаланы азыракъ ишлетирге, транспортну да экологиягъа хата салмагъан тюрлюлерин сайларгъа чакъыргъанды.
Жангы окъуу жыл башланыргъа кёп къалмагъанды. РФ-ни Жарыкъландырыу эмда бийик билим бериу жаны бла министерствосунда билдиргенлерине кёре, энди устазланы да медицина къапла киерге борчлу этерикдиле. Ала ол жорукъгъа сыйынмасала, ата-анала мектепни башчыларына тарыгъыргъа эркиндиле.
Окъуучуланы юслеринден айтханда,Роспотребнадзор школлагъа да энчи излемле тохташдыргъанды: хар классха энчи окъуу кабинет бёлюнюрюкдю. Сабийле битеу дерслени да анда ётдюрлюкдюле.
Алгъын билдиргенибизча, коронавирусдан сакъларгъа боллукъ «СпутникV» дарман бек алгъа медиклеге бла устазлагъа салынырыкъды. Асламлы вакцинация уа бир айдан башланырыкъды, деп билдиргендиле Эпидемиологияны бла микробиологияны Н.Ф.Гамалеи атлы миллет тинтиу арасында.
РФ-ни Саулукъ сакълау министерствосунда билдиргенлерине кёре уа, вакцинация экиге бёлюнюп бардырыллыкъды, хар юч ыйыкъдан. Аллай амал, ведомствода айтханларына кёре, иммунитетни эки жылгъа дери сакъларгъа онг берликди.
