Къэбэрдей-Балъкъэрым и Iэтащхьэ КIуэкIуэ Казбек шыщхьэуIум и 16-м лэжьыгъэ IуэхукIэ щыIащ республикэм и Бахъсэн, Iуащхьэмахуэ районхэм.
ЩIыналъэм и УнафэщIым зригъэлъэ­гъуащ ХьэтIохъущыкъуей кIуэ гъуэгур, мы гъэм и накъыгъэм зыщIадзэу зэрагъэпэщыжар. Абы ехьэлIа лэжьыгъэ ­псори зэфIагъэкIащ «КъБР-м транспорт IэнатIэм зыщегъэужьын» къэрал прог­раммэм зэрыщыубзыхуам тету.
КIуэкIуэ Казбек апхуэдэуи щыгъуазэ зищIащ къуажэ амбулаторэм и Iуэху зыIутми. 1936 гъэм ящIа унэр зэгъэ­пэщыжын хуейщ. Республикэм и Уна­фэщIым абы ­теухуа лъэIукIэ зыкъыхуа­гъэзащ къуа­жэдэсхэмрэ медицинэ IуэхущIапIэм и лэжьакIуэхэмрэ.
ЩIыналъэм щызэгъэпэщыжын хуейхэм ящыщт Зеикъуэ къуажэм ЩэнхабзэмкIэ и унэр. Мыбы иджыпсту лэжьыгъэхэр ­щокIуэкI КъБР-м «Къэбэрдей-Балъкъэрым и щэнхабзэр» и къэрал программэм щыубзыхуахэм тету икIи Къэбэрдей-Балъкъэрыр къызэрызэрагъэпэщрэ илъэси 100 зэрырикъум зыхуэгъэхьэзырыным ехьэлIауэ зэфIагъэкIхэм ящыщщ.
КъыкIэлъыкIуэу Iэтащхьэр щыIащ Iуа­щхьэмахуэ щIыналъэм хыхьэ ЛашкIутIэ къуажэм. Жылэм и унафэщIым абдежым и гугъу щищIащ япэ игъэщыпхъэу къапэщыт къалэнхэм. Ар цIыхухэр псыкIэ къызэгъэпэщынырщ, спортзалыр зэгъэ­пэщыжынымрэ къуажэ уэрамхэр къэгъэнэхунымрэщ.
КIуэкIуэ Казбек еплъащ къуажэм и уэрам нэхъыщхьэм и гъуэгур, километрищым щIигъур, зэрызэрагъэпэщыжам. А лэжьыгъэр зэфIагъэкIащ «ФIагъ лъагэ зиIэ автомобиль гъуэгу шынагъуэншэхэр» лъэпкъ проектым зэрыхагъэхьам и фIыгъэкIэ. Гъуэгур зэрагъэпэщыжам и мызакъуэу, псы щIэжыпIэхэр хуащIащ, абы ­къедза щIыпIэхэри зыхуей хуагъэзащ.
КIуэкIуэ Казбек апхуэдэуи щыгъуазэ зищIащ Бахъсэн псым и Iуфэхэр гъэ­быдэным теухуауэ екIуэкI лэжьыгъэхэм. Республикэм и Iэтащхьэм гулъытэ нэхъыщхьэ мыбдежым зыщыхуэщIыпхъэу къилъытащ Тырныауз къалэм деж хуэзэу иIэ ятIэпс щIэжыпIэр и чэзум гъэкъэбзэн зэрыхуейр. Iэтащхьэм зи гугъу ищIа лэжьыгъэхэм мыгувэу щIадзэну я мурадщ.
ЩIыналъэхэм зыщыщиплъыхьым гу зылъитахэм япкъ иткIэ КъБР-м и Iэтащхьэм гъэзэщIакIуэ властым и зыхуэфащэ органхэм я унафэщIхэм пщэрылъхэр яхуищIащ социальнэ, инженернэ инфраструктурэм хыхьэ ухуэныгъэхэр щIыным, зыкIэлъыIэбапхъэхэр зэгъэпэщыжыным теухуа проект-сметэ тхылъ зыхуэны­къуэхэр ягъэхьэзырыну, ахэр щIыналъэ, къэрал программэхэу зэман благъэм ягъэзэщIэнухэм хагъэхьэн хуэдэу.