Къабарты-Малкъарда жашагъан тюрклю месхетин «Ватан Ёлунда» («Ата журтха жол») деген биригиулери къуралгъанлы бу кюнледе тамам онюч жыл болгъанды. Республиканы Маданият фондунда къууанчлы ингир анга аталгъанды. Аны фондну председатели Владимир Вороков ачып, сёзню Къабарты-Малкъарны Парламентини культура, инсан обществону айнытыу эм информация политиканы жаны бла комитетини келечиси Борис Паштовха бергенди.
Ол быллай культура арала республикада мамырлыкъны, келишиулюкню сакълаугъа уллу себеплик этгенлерин белгилегенди. Ол: «Биз кёп затны кёре келебиз, бек къыйын заманла да болгъандыла журтубузда, алай бир бирге тынгылай, бир бирни ангылай билгенибизни хайырындан чачылмагъанбыз, бирлигибизни сакълагъанбыз.
Тин къарындашлабыз биз, бары да анданды. Ол хазнадан уллу байлыгъ а жокъду», – дегенди эм жыйылгъанланы «Ватан Ёлунда» биригиуню кезиулю туугъан кюню бла алгъышлагъанды. Аны таматасы Бекташ Ампашулиннге кёп жерледе сыналгъан адамлыгъы, огъурлулугъу ючюн ыразылыкъ сёзюн айтханды.
КъМР-ни Граждан обществону институтлары бла байламлыкъла къурау эмда миллетлени ишлери жаны бла министрни орунбасары Гергъокъланы Жамболат жыл жарымны ичинде бир бирни кёрмей, онлайн халда байламлыкъ жюрютюп туруп, бюгюн быллай жылыулу тюберча онгла къурагъанлары ючюн Владимир Вороковха, башхалагъа да ыразылыгъын айтханды эм Бекташны хайырындан тюрклю месхетинлилени маданият аралары чачылмай къалгъанын, бюгюн ол бютюнда бирлешип ишлегенин, келлик тёлюлени миллет тёрелерине юйретип тургъанын, Бекташ кеси уа – арый-тала билмеген адам, таукел атламла бла алгъа баргъанын белгилегенди.
КъМР-де тюрклю месхетинлилени «Ватан Ёлунда» культура араларыны таматасы Бекташ Ампашулин халкъыны къыйын тарыхыны юсюнден къысха хапар айтханды. Ала 1828 жылдан бери алгъа Россейни, артда СССР-ни, андан сора жангыдан Россейни къурамында болгъанларын белгилегенди.
Ол аны халкъын, таулуланы, башха миллетленича, ала жашагъан жерге фашистле жетмей тургъанлай окъуна, душман жанлы болгъансыз деп, жалгъан терсликле тагъып, Орта Азиягъа бла Къазахстаннга кёчюргенлерин эсгертгенди.
Ол тюрклю месхетинлиле къыралны жашаууна тири къатышханларын, Уллу Ата журт урушну кезиуюнде аланы да кеслерини жигитлери болгъанларын белгилеп: «Бюгюн мени гитче, аз адам санлы халкъым тогъуз къыралгъа бёлюнюп жашайды. Къабарты-Малкъарда уа биз кесибизни экинчи ата журтубузну тапханбыз.
Таулуланы тёртюнчю тёлюлери ёседи туугъан журтларында, Аллах бизни халкъгъа да аллай насып берир деп ийнанама», – деп, аланы кесине жыйгъан, тёрюне ётдюрюп, къууанч этдире тургъан культура фондда ишлегенлеге, бу байрамда ала бла болургъа сюйюп келгенлеге да ыразылыгъын билдиргенди.
Республиканы  Жазыучуларыны союзуну правленини председатели, КъМР-ни халкъ поэти Беппайланы Муталип: «Кёчгюнчюлюк уллу сынау эди. Аллахха шукур, сиз да, биз да къутулгъанбыз андан. Мындан арысында аллай къыйынлыкъланы бир халкъ, бир миллет да кёрмесин.
Биз къарындашлабыз, жюреклерибиз ачыкъды. Ол татлылыкъны сакълап турсакъ, тамблабыз булутсуз боллугъуна ышанама», – дегенди эм месхетин тюрклюлени маданият араларына китап саугъала этгенди.
Журналистлени союзуну правленини председатели, КъМР-ни сыйлы журналисти Шауаланы Разият бу огъурлу кюнде быллай ариу тюбешиу къурагъанлагъа ыразылыгъын айтханды. «Бизде кёп миллет жашайды. Ала бир бирге къарындашлача татлыдыла. Ишчи халкъсыз, жигер, таукел. Аны ючюн сизге бютюн хурмет этебиз. Сау болугъуз, жаратмагъан жеринде адам жашамайды. Сиз а бизни бласыз къууанч, бушуу кюнлерибизде да», – дегенди.
Азербайджан миллетни «Азери» атлы маданият арасыны атындан аны таматасы Алий Дадашев сёлешгенди. Ол да тюрклю месхетинлиле ата журтларын къайтаралмагъанларына жарсыгъанды. Аны бла бирге ала эл болуп, бизни республиканы Май эм Прохладна районларында жашагъанларын, ишден къачмагъан, огъурлу адамла болгъанларын чертгенди эм бу халкъгъа келлик кюню ариу болурун, ол умутуна жетерин тежегенди.
Дагъыда алгъыш сёзлери бла Къабарты-Малкъарда эрменлилени «Ахбор», эбизелени «Риони», татарлыланы «Туган-тел», украинлыланы «Днипро», эстонлуланы «Кодума», дагъыстанлыланы «Дагестан», корейлилени «Самчели», Нальчикни, Терк-Малка округну, регион жамауат биригиуню къазакъларыны эм башха маданият араланы таматалары сёлешгендиле.
Владимир Вороков, Бекташны къолун тута, анга, аны халкъына уллу хурмет этгенин, аны тамата къарындашча сюйгенин айтханды. Сора: «Къулийланы Къайсын битеу да адам улун сюйген тынчды, къоншунгу сюерге юйрен», – деген терен ангыламны къойгъанды бизге. Анга келиширге керекбиз, алай да болгъанды. Сюймеклик берсенг, артха да аны аласа. Жашауубузда, тарыхыбызда да алай келеди», – дегенди.