Къабарты-Малкъар Республиканы Башчысы Казбек Коковну бла ДОМ.РФ компанияны таматасы Виталий Муткону Москвада  ишчи тюбешиулери къуралгъанды. Аны чегинде льготалы ипотека программаланы жашауда бардырылыулары сюзюлгенди. 2020 жылда январьдан июньнга дери аллай 253 кредит берилгени белгиленнгенди. Ол а 2019 жылны ол кезиуюндеги кёрюмдюлеринден 10 процентге кёбюрекди. Ахча бла алып айтханда, ёсюу 14 процент болгъанды.
- Къабарты-Малкъар Республикада бусагъатда льготалы ипотека кредитование программала жашаугъа жетишимли кийириледиле. Жылгъа 6,5 процент болгъан ипотекагъа, августну аллында кёрюмдюлеге кёре, 361 берилген заявкадан 180-ни къабыл кёрюлгендиле. Эки эм андан аслам сабийлери болгъан юйюрлеге деп къуралгъан программа бла, июльдагъы кёрюмдюлеге кёре, 71 кредит берилгенди.
Юч эм андан аслам сабийлери болгъанлагъа ипотекаларын тёлерча 450 минг сом берилген программагъа кёре 200 миллион сомдан артыкъ ахча аллай юйюрлеге берилгенди. Биз субъектни правительствосу бла бирге ДОМ.РФ Банкны льготалы ипотеканы регион программасын башларча онгларына къарай турабыз, - деп белгилегенди Виталий Мутко.
Бийик сурамы болгъан энчи жашау журтланы регионда къурулушларын бардырыу соруулагъа да эс бурулгъанды. Бёлюмню айныууна хайырланылмагъан федерал жерлени оборотха алыу да болушлукъ этеди.
-Къабарты-Малкъар Республиканы бла ДОМ.РФ-ни байламлыкълары жетишимли айныйдыла. Компанияны ипотека программалада эм жашау журт-къурулуш бёлюмде саулай сынамы бизге бек магъаналыды. Ала жарашдыргъан аслам амалланы регионубузда жашаугъа кийирип, жетишимли хайырланырча онгларыбыз барды. ДОМ.РФ бла байламлыкъда ишлеу «Жашау журт эм шахар болум» миллет проектни чегинде салыннган борчланы теркирек тамамларгъа амал берликди, - деп чертгенди КъМР-ни Башчысы Казбек Коков.